መጎሎጓ ከዮሃንስ 3

1"ቆት ከሰ ገትጋ አል ገሙንፀ ደ ገዴራ ካል ሳርዴስ፤ 'ኤኤለአ በከለካ ኤተ በጨካ ገፉጨ ረባ ሥሠ በንድ ከቢዣ ሥሠ በንድኳ።' "በርገምካ መደዳሉ፤ አም ካሥ ፄያ መኢማ፥ ዳኸን መሸማ። 2ኣምበናሥ፥ ዥገሥ ኤተ ባሸካኽ በርካ ከመሻኳ፤ በርዸበከሠንዥገን መደዳሉ ኤበበፀካ መዳ መዪጮቆማ ነኸ ረባ። 3ካ ሳንዘሥ ዳ ኤተ ባርኮቆ ባገሰኮቆኳ፤ ኣራቆካሥ፥ ኮለኬ! ኤከምበፃኣ ማምበናኣሠኸን፥ ከምዎሬ ኮገኡ ኤያሥ ናዌቆ አገልኳ ጸጋ፤ ከምገማኣኼ አምኳ ኦከ ከምዎሬ ካምኼ። 4ነደንኳ፥ ባጨካ ነሳርዴስ ጸጋ ዱፀን ደ በበፀካ መኽ ኣለማም። ከፄ በደካ አመሮቆ በና ከማም፥ ከምኢሱሥ እምፑ ኣ ከመንዹዋ ከአራ። 5ኤተ ከምሙቾቆ ኤያሥ ኤያ ከምኢሱከሥ ከመፑ ኣ። ከምደራ ኸገሻ ከመዳለማ ኤተ መሁል ቾጎም ነታሰ ባባ ከሰ ገትጋ አል ጎዛኳ፥ ከመንዝለርኸኼ ፄማ ነሎርገ መኢያኼ። 6ነገሶቆ ኤተ በጨካ ፄያ ዳ ኤተ በከለካ አመዪዥሥ ገፉጫ ከገሙንፀ ደ ገዴራ።" 7"ቆት ከሰ ገትጋ አል ገሙንፀ ደ ገዴራ ካል ፊላዴልፊያ፤ 'ኤኤለአ በከለካ ኤተ መዪዥሠማ ዝንዜን፥ ኤተ ኸገሻ፥ ኤተ በጨካ ገፋሌያ ኤያል ዳዊት፤ ዳ ኤተ በኮርከስ አ፥ አፈለከሸኼ መሃንሰማ ጸጋ ሜተልኼ፥ ዳ ኤተ በሃንከስ አኳ፥ አፈለከሸኼ ጸጋ ሜተል መኮርሰማኼኳ።' 8"በርገምካ መደዳሉ! ዪር፥ በርኮርከስ ግሰማ ነኸኡ ኤተ በሃለከሽ ጸጋ ሜታ መሃንሰማ፤ በርገምካ ኤበደካ መዥጋሉ ዱፀን፤ ነደንኳ፥ ባዜከኽ እገሻለም፥ ኣሽጠካንኼ ፄምኼ። 9ደ ቢዎኬ ነገሙንፀ ሴጠና፥ በላ መዱዋን ዶጎ ዪሁዳ፥ ደ ቢከለካ 'አይላ ዶጎ ዪሁዳ፥' ደ ቢደካ ደ ጎልጎዛኳ፥ ከምጦራ እማም ኤከምዎዉዌ ከምፋቱዋ ነታተብ ቾገኡ፥ ኤከምገሙዋን ኤበርሄከሽ አምኳ። 10ከፄ ባዜከኽ እገሻለም ኤተ በርገሸከሥ ካም ባቀመኮቋኳ፥ ከምጦር አርኳ ኤከምፓኽ ኖከ ማዻምባ፥ ኤተ ከምዌ ከኤባ አል እኔያ ኮዎማ፥ ከመዻምብ ጸጋ አል ኤበ እኔያኳ። 11አራ ከምዎሬ ፈላ፤ ራቆሽ ዳ ኤተ ባጨካ ከመዥግ ኤላ፥ ኤከምበፃን ጸጋ ጀንዳ መቼሥ ዠለ መሙቾቋሉ። 12ኤተ ከምሙቾቆ፥ ከምጦራ ከሙችና ነመዪዥሥ መፀ ገዴራ አል ረባለም፥ ከምፑቆኼ ሜተል ነጓኼ። ከምቆተራ ነጸገማ ፄ ረባለም ከፄ ኤዬባ አል ረባለም። ፄ ኤዬባ አኳ ዬሩሳሌም አል ኽኻ፥ ኤተ ከምብቴ ነጎዛ፥ ኖጎ ረባለም፤ ከምቆተራ አርኳ ፄ ኽኻ አለምኳ ነጸገማ። 13ነገሶቆ ኤተ በጨካ ፄያ ዳ ኤተ በከለካ አመዪዥሥ ገፉጫ ከገሙንፀ ደ ገዴራ።" 14"ቆት ከሰ ገትጋ አል ገሙንፀ ደ ገዴራ ካል ላዎዲቄያ፤ 'ኤኤለአ በከለካ ኤተ ቢኦካ ፄማ "ኣሜን"፥ ኤተ መደ ኸገሻ መገሚለማ፥ ኤተ በደካ ኸገሻ ከኸማኳ፥ ኤተ በከዘዘኬ አረባ ደ ገዘዛ ኮዎማ ከንዶጎማ።' 15"በርገምካ መደዳሉ፤ አም መጽሠማ ኤያሥ ኤያ  ጎከሠማኼ። ባመድ መጽሠማ ፌት ጎከሠማኳ፥ ባመድ ገሸለማ። 16አምኸን መበበዶቆማ፥ ጎከሠማኼ፥ መጽሠማኼኳ፤ ከለአ ከምጠቀርኽ አም ኒል ሰም። 17ባከለካ አምኳ፥ 'አራ ተቃ፥ ኤተ መጨማኳ፥ አኢካንኼ ዳ ኤተ ባሸካዬኽ ካራኼ፤' ኣገምካኼ ኤባደካ ዳ ኤተ ባዪፀከሥ ጸጋ፥ ዢጋ፥ ፐሻ ከጸጋናኳ። 18ካ ከመገሸራ ካም፥ ኤከምዳኣን ተቃ ኮድ ኖጎም መዪዥሥ ኣያ ኤተ ቢከጨኮቆ ከማንጃ፤ ኮድ እምፑ ኣ ኖጎም፥ ኢሰሥኳ፥ ኤከምበፃ መዪፆቆን አመዳሉ ከጸጋና አም፤ ኤከምፈላኣሸን መገሞጓኳ፥ ኮድ ቢይ እልኻ፥ ጦ ነኸኡ። 19ከደ በርሄከሽ አር ከምፐርኮቆ መሸ ሠማለማም ከማማርከሥኳ፤ ካ ሻምብ፥ ኣንዠሥ እሉ። 20አለአ፥ ከምኢርቾጎ ነግሰ መፃ ከምኦቸርሥ አኩድዳኳ፤ ጸጋ ኤተ ከምገሶቆ ሰም ከምኮርስ ካራ ከምኩራ ኮጎማ፥ ከምኢልሽ እምበንድኳ ከመሰሳ፤ አራ ከአ፥ አኳ ከአራ፥ ከምስላ ከምበንድላኳ። 21ኤያሥ በርሙቸኮቆ አር ቢልኢከሽ ከባብ ነለባበ ለማ አይላ በንድ፥ ከምጦራ አርኳ ከኤተ ከምሙቾቆ ኤከምኢልሽ አይላ በንድኳ ነለባበ ለም። 22ነገሶቆ ኤተ በጨካ ፄያ ዳ ኤተ በከለካ አመዪዥሥ ገፉጫ ከገሙንፀ ደ ገዴራ።"

will be added

X\