መጎሎጓ ከዮሃንስ 16

1ነለአ ነቸቻ በርገሰኮቆ በቦቆ ሳ መከፔሥ ኒል መዪዥሥ መፀ ገዴራ፥ በከለካ ከሰ ገትጋ አል ጎዛ ከሥሠ በንድ፥ "ዸኻ፥ ዻ ኣርከኸኽ ኒል እንሤ ማመሠ ረባ ሥሠ በንድ ከኔያ።" 2በዸካ አሰ ገትጋ አል ገሲቋኳ፥ ባርከከኽ ኒል እንሤ ማመሠ ረባ ከኔያ፤ ኖከ በጦካ አለአ፥ በደካ ነጸገ ደ በጨካ ሻኪይ ደ ግዚያ አ በዴረካ ከመኮሣለማ አገንሠ ብሳ ኤተ በሰኪል ጸገ ጸጋ። 3ባርከከኽ አሰ ገትጋ አል ጎዛ አል እል እምበንድ ኒል እንሤያለማ ኪል ኤያያ፤ በደካ ኤያያኳ ኤመሃ ጸጋ ኤተ በናሻ፥ በሸሸኮቆ ደ መዘዛ አል እል ኤያያ ኮዎማኳ። 4ባርከከኽ አሰ ገትጋ አል ጎዛ አል እል ኦካግ ኒል እንሤያለማ ኪል ገቸ ኣያ ከጋጨ ኣያኳ፤ በደካ አኳ ከመሃ። 5በርገሰኮቆ ኤበከለካ አሰ ገትጋ አል ጎዛ፥ ኤተ በጨካ ገፋሌያ ነኣያ፥ "አም ኤተ ባኢካ፥ ቤያኢ ገፀኳ፥ አም መዪዥሠማ ዝንዜን፥ መኸሠማሉ ኤኤለአ መዘረማ። 6ከፄ ባርከከኽ ጸጋ መሃ ደ መዪዥሣ ካል ደ መዪርጓኳ፥ ባጦካ ዳ ኤተ ከምዳ ከማም፥ ባኸኮቆ መሃ ከማምኳ።" 7በርገሰኮቆ ሳ ሜተምኳ ኖጎ ሲላ ኤተ በከለካ፥ "ኣዬ፥ ረባ ኤታ፥ ኤተ ባሙቸኮቆ ነደ መዘዛ ኮዎማ፥ መኸሣሉ ኸማ ከመዘረማኳ።" 8ባርከከኽ አሰ ገትጋ አል ጎዛ አል እል እንዝኽ ኒል እንሤያለማ ከኸ ኦካ፤ ቢከኸካ ከኦካ ኤከምጥጦቆ ጸጋ ከመበ ጣለማ። 9በጥጠካ ጸጋኳ ከበቦቆ መበ ጥ ኦካ፤ ነደንኳ፥ ቢካ ጸጋ ፄ ረባ፥ ኤተ በጨካ ገፋሌያ ነማቀርጨኻ ና፤ ኢኮለኬንኼ ነገንሣለማም ከምሂንሥ ረባኼ። 10ባርከከኽ አሰ ገትጋ አል ጎዛ አል እል ማቁስ ኒል እንሤያለማ ኖቆ ለባበ ደ ግዚያ፤ ባልምኮቆ አመጓ ገፋሌ ደ ግዚያኳ፥ ባቀከሥ ጸጋ ጠጠማም ከፄ ማፉንጮቋ ከአ። 11ቢካ ጸጋ ፄ ረባ አል ጎዛ ከፄ ማፉንጮቋለማም ከብሳኳ። መከደን ኤለኣኳ፥ ኢኮለኬንኼ ነመደዳለማምኼ። 12ባርከከኽ አሰ ገትጋ አል ጎዛ አል እል ማያ ኒል እንሤያለማ ኪል በቦቆ ገቸ ኣያ ኤተ ቢኦካ ፄማ ኤፍራጥስ። በኼኤካ ኣÄማኳ፥ ኤከመገሠን እንዶዋ ከዶጎ ጥሳ ደ ከምዌ ከንዶጎ እምፐ ኦካ። 13በርገምከሥ አርኳ ገንሠ ገፉጫ ኦካግ ደ በኢካ ኤያጎቋ፥ ኤቢፐኬሥ እማም ነሰ ከለላ፥ ነሰ ደ ግዚያ፥ ነሰ ኤተ መዪርጓ ከጎልጎዛኳ። 14እማም ገፉጫ አል እምሙሳ፥ ደ በትገከሥ ዳ አል ገተምዛ፤ ኤከምሙንፁቆ እማም ከማሻ ነበቦቆ ኦካ አል ረባ፥ ኤተ በሙቸኮቆ ነደ መዘዛ ነኮዎማ፥ ቢፐኬሥ እማም ቢዸካ ከዶጎ ጥሳ አል ኤባ አል እኔያ ኮዎማ። 15በከለካ አሳ ሜታ፥ "ገሶቆ፥ ከምብሸሬቆ መዌያ ኤያል ገልኳ። ናገይል ጸጋ ኤተ ከምበፃ መታሽ አኸ መዥጋ መትሾቆ ኣለማኳ፤ ካ ከምደካኼ መንዻ ከጸጋና ከምገመሠኼ ጸጋኳ ጸጋናለማኼ።" 16ቢሙንፀኮቆ አመገፉጫ አኳ ዶጎ ጥሳ ከኔያ ከሜታ፥ ኤተ ቢኦካ ፄማ ከሰ ዶጎ ዪሁዳ "ሃርማገዶን።" 17ባርከከኽ አሰ ገትጋ አል ጎዛ አል እል ሥሠ በንድ ኒል እንሤያለማ ኪል ዙባ። በፐኬሥ አበቦቆ ሳ ኒል መዪዥሥ መፀ ገዴራ ኖጎ ለባበ፥ በከለካኳ፥ "በደከንዥገና።" 18በደካ አማንደኸ ደማ፥ ሰ ሆመ ደማ ከሳ ጃጀንዳ፥ ከማንዙበሽ እኔያኳ፤ ማንዙበሽ እኔያ አለአ ዝንዜን በቦቆማ፥ አደካንኼ ሾካ አለአ ካል ቢከዘዜ ጸጋ ነኤባ ናል እኔያኼ። 19ባጹሸካይል በቦቆ ኤዬባ ከኦካግ፥ በንቼካሽ ኤዬባ አል ሾከ ጸጋ አል እኔያኳ፤ በከሳንዘከሥ አረባ በቦቆ ባቢሎን፥ በከኸካ ሸፓ ኤተ በከዪጨካቆ ከኬ በቦቆ ማመሣለማ። 20በቴካ ኤባ አል እል ኣያ ኮዎማ፥ ኣገምካሠኼ ዶላኳ ናሥ መኢማኼ። 21ኤገሂን በቦቆ ዠገዳ በሃንቀኬ አመበቦቆ ኽ ከጸገጸጋ ነጎዛ፤ መከደን ኤኤለአ፥ ቢካ አጸጋ ረባ ከፄ ማቀርጨኽ ኽ፥ ከፄ በደካ አማቀርጨኻ አ ዝንዜን በቦቆማ።

will be added

X\