መጎሎጓ ከዮሃንስ 10

1በርገምከሥ መዥግ ሰ ገትጋ አል ጎዛ ጀንዳ፥ ኤተ በብተኬ ነጎዛ፤ አ በከገተካዬቆ ከኩንዱ፥ በጨካ ዋግላ ኒልቆማ። እልኸማ ባንደከኽ ኤኦካ፥ ቾጎማኳ በኢካ ኤቆሰ ማንጃ። 2አ በራቆከሽ ነኤለማ ማጨጊል ዱ ሎርጋ፥ በጦከሥ ቾጎማ ኤላ ጉንዛ ኖቆ ኤያያ፥ ቾጎማ ኤላ ረኳ ነኸ እኔያ፥ 3በሉገካ ከበቦቆ ሳ ኤያል ጉምባ። ኖከ በሉገካ አኳ፥ ቢእሰኬ ጺ አሆመ ደማ ሥሠ በንድ። 4በራኣጎካ መቆተማ ኖከ ቢእሰኬ ጺ አሆመ ደማ ሥሠ በንድ አ። በርገሰኮቆ ሳ ኤተ በዎኬ ነጎዛኸን፥ ኤተ በከለካ ካራ፥ "ዜኽ ከገጸፃ ዳ ኤተ በከለካ አሰ ሆመ ደማ አ፥ መቆታኣኼ።" 5በፈርኮቆ አሰ ገትጋ አል ጎዛ ኤተ በርገምከሥ አር በኢከቾጎ ኖቆ ኤያያ ነኸ እኔያኳ፥ ኤላ ጉንዛለማ ከጎዛ። 6በከዠገተካ ከፄ ኤተ ከምኢያ ካሥ ግዢ ግዥ፥ ከኤተ በዘዘኬ ጎዛ ከዳ ኤተ በኢካ ኒለማ፥ እኔያ ከዳ ኤተ በኢካ ኖቆማ፥ ኤያያ ከዳ ኤተ በኢካ ኒለማኳ፥ በከለካ "ከምፀቆኼ ነለአ ከገትኼ። 7ኖከ በፈርኮቆ አሰ ገትጋ አል ጎዛ አል እል ሥሠ በንድ ሰማ በእሰካ ለብሩጂያለማ፥ ኖካ ና ከምትቶቆ ረባ ማሄሻለማ ኤተ ቤያጸፃቋ ኤያሥ ቤገሸሥ አ ከደ መደዳለማ ከደ መዪርጓ።" 8ሳ ኤተ በርገሰኮቆ ነጎዛ ባኮለኪል በገሸካ ካራ እኽላኳ፥ "ዻ፥ ቼሥ መጨጊል ሎርጋ ነኤለ ሰ ገትጋ አል ጎዛ፥ ኤተ በኢከቾጎ ኖቆ ኤያያ ነኸ እኔያኳ።" 9በርዸካ ኮጎ ሰ ገትጋኳ፥ በርሎቆከሥ ኤከምኻ ካራ ዱ ሎርጋ አ፤ በከለካ አኳ ካራ፥ "ሮቆ፥ ሳ! ከማንጨ ኒሉ፥ ነሰኡኸን ከምሜና ኤከቻ።" 10በርርኮቆ አርኳ ዱ ሎርጋ ነኤለ ሰ ገትጋ፥ በርሰካ በርከርኮቋ። በምሜነካ ኒል ሰም ኤከቻ፤ ኤበርሰካ ነንኸን ባንጨከኽ እለም። 11ቢከለካ ካራ፥ "ከምዳ ካም መኮላ መገሽ መዪርጓ ከፄ በበኽ ሾካ ከኤማንጀ ጸጋ፥ ደ በገሸካ ሳ ከጅንሰማ ከጅንሰማ፥ ከፄ ዶጎ ጥሳኳ።"

will be added

X\