ከፍሌሞን 1

1አራ ጳዉሎስ ኤተ ቢያርፉንጨካ ከፄ ያሱስ ክርስቶስ፥ ከዱዌበም ከጢሞቴዎስ ቢልቆተካ ገትጋ አለአ ከማሄሽ መዥላ ኤተ ቢላተጸከሥ ነመደዳ፥ ከፍሌሞን፥ 2ከደ ገሙንፀ ደ ገዴራ ደ በሙንፀኮቆ ነመፃሉ፥ ከደጎናለምላ ከኣፍቢያ፥ ኤያሥ ኤያኳ ከኤተ መሻምባ ከአይላ ከኣርኪጶስ። 3ነኸ ረባ በቦኳ ከኤቶኳ ያሱስ ክርስቶስ መገ ከመገማ ካኻ። 4ኤበርሳንዘከሥ አም ነገዴራለም፥ መዱጎክ በርኸካ መገ ላ ከረባ፤ 5ከፄ በርገሰኮቆ ኤባሄከሽ ደ ገዴራ ኮዎማ፥ ባከገምኪል ከኤታ ከያሱስኳ። 6በርዴረካ፥ ኤከማምባላሠን ዝንዜን ገሸል ዳ ኮዎማ ኤተ በኮጨካ ኤከምኢኳ ከክርስቶስ፥ ኤከማገማሠን ነጸገኡኳ መገሚላሎኳ ኤተ በደካ ሜተም። 7ዱዌበም፥ ከፄ ባንዥገከሥ ቁንዘ ደ ገዴራ፥ ማሄሻሉ አለአ በኸከንዥገን በቦቆ ማገ ጓ ከመንዥጋሣ ካራ። 8ኤተ በርደካ ከንዶጎ ክርስቶስ ከዱዌበኡ፥ በርመንዥጋይልኽ ከመገሻ ካም ከዳ ኤተ በምኢ አመደማ ካም። 9ነደንኳ፥ በርሄከሽ መሎቆርሥ አም ከማገኻ፤ አራ ጳዉሎስ ኤተ በርደካ ጋዛ፥ ኤተ ቢያርፉንጨካ ከፄ ያሱስ ክርስቶስኳ፥ 10በርጨካ ዳ ኤተ ከምሎቆርከሥ አም ከፄ ዱዋለም ኦኔስሞስ፥ ኤተ በርከደካ በበማ ከንዶጎ ገፉጫ ነመፀ ማፉንጫ። 11ገፀ ኤደኼ ኦኔስሞስ ኸማ ካምኼ፤ እኽላኸን በደካ ኸማ ካራ ካምኳ። 12በርኮለኮቆ አ በርትገከንዥገን ኮገኡ፤ አ ኤያሥ እለም። 13ሚከፉንጭ አራ ከፄ ሰ ማገ ላ አል ረባ፥ በርሄከሽ ኤበርምጦሥ አ ኖጎም፥ ኤበምደዳ ካራ ኤአምኳ። 14ነደንኳ ናከምሄሸን አም፥ አራኣጎካኼ መጦሥ ዳ ሜተል ነመደዳኼ፤ በራኣጎካ ኤከምዳ ከማሄሸማሉ፥ አራኣጎካኼ መተገኽ አም ኤከምተጻሥ አራኼ። 15ኢገም፥ ዳ በከፐከሥ ኦኔስሞስ ከኦኪል ዱፀን ነጉ፥ ኤከምኢያን ነለአ ከገት መዱጎክ ነጉ። 16ነከምደን ኤዎደ ካለን፥ ኤተ ከመንተሮቆ ነለአ፥ ከመዳ ዱዌባ ማሄሸማ ካም፤ ኤበደካ ካራ ማሄሸማ፥ ከምዳኼያኽ ከበቦቆ ካምኳ ከኤተ መደዳ ከዱዌባ ማሄሸማ። 17ካ ኤከምዪራኣ አራ ኤመዠኡ፥ ኤያሥ ባሄከሽ አራ፥ ሄሽ ኦኔስሞስኳ። 18ኤከምኢያ በሸ ከሥ ካም፥ ኤያሥ ኤያ ኳ ኤከምጫኣ በና ነጸገማ፥ ጦሥ ናሥ እልቆም። 19አራ ጳዉሎስ በርከለካ በርቆተካ አለአ ከኤለም፥ "ከምኮለሮቆ ካም በና ኤተ ባጨካ ነጸገማ።" ነደንኳ፥ ከፄ በደካ አመገሚላሉ ከክርስቶስ ከንዶጎም፥ አራኣጎካንኼ መገሸሠማ ካም ኤባደካ አም ኪልቀኡ ኤተ በርጨካ በና ነጸገኡ። 20ካ ዱዌበም፥ ዪር ካራ ዳ አለአ፥ ትተካሮቆ ከፄ ኤታ ያሱስ። ዳ በኮኮደካ ከክርስቶስ ኢዴባ፥ ኣገ ል አራ። 21ዳ በርከቆተካ አለአ፥ ከፄ በርገምኪል ኤከምዳኣን ዳ ኤተ በርከሎቆከሥ አም፤ በርገምካ ኤከምዳኣ ነለአ በቦቆኳ። 22ናሥ አለአ፥ ኤከምገሶቆ ረባ ገዴራለኻ፥ ከማጦሪል ኤከምኮለራ ኮጎኻ። ከለአ እገ ካረሥ ደቤ ኮዶ። 23ኤጳፍራ ኤተ ቢፉንጨካ ከአራ ከፄ ያሱስ ክርስቶስ በትገኬ ዳገ ካም። 24ኤያሥ ኤያኳ ደ ቢላተጸከሥ ነመደዳ ማርቆስ፥ ኣርስጥሮቆስ፥ ዴማስ፥ ሉቃስኳ፥ ቢትገኬ ዳገ ካም። 25ነድ መገ አል ኤቶኳ ያሱስ ክርስቶስ ከአኻ።

will be added

X\