ከደ ፊሊጲሲዩስ 4

1ከለኣኳ ደ በኻሄካሽ ኢዴበም ደ በራኣጎካ መገመሠማ ከእለም፥ ደ በኸደካ ማገ ላለም፥ ዠለ ገሂንለምኳ፤ እምመዠም፥ ዥገኻ፥ ኢኸካ ከኤታ! 2ኢዴበምላ ጋፈማ እምኤዎዲያ ከስንጢኬ፥ በርገሸካ ከማም ኤከማገሱዊል ከፄ ኤታ። 3አም መገሚለማ መዠም፥ በርሎቆከሥ አም ኤከምተጻሥ ጋፋ አለአ። እማም ከክሌሜንስ ከጸጋ ደ ቢልደካ ዳ ኮዎምላ ጃጀንዳኳ፥ ደ ቢቆተካ ፄማም ነሎርገ መኢያ፥ ቢሻምበካ ከአራ ነመደዳ አል ሰ ማገ ላ አል ረባ። 4መዱጎክ ኣገ ኻይል ከኤታ፤ በራኮለኪል በርከለካ፥ ኣገኻይል! 5ናገማይል መሌአ እላለኻ ኖጎ ጸጋ ነኮዎማ፤ ባርቸካዬቆንዥገን መዌ ኤታ። 6ነዳ ነኮዎማ፥ ከዳ ኤተ ከማኣጓ አመኢያለኻ ዴረኻ ከመገ ላ፥ እገሸኸከሥ ከረባ ሎቆኸሥ፤ መሳንዘኻኼ ከዳ ሜተልኼ። 7ማገ ጓ አል ረባ ኤተ በንተርኮቆ ነማምባለሠማ ናል ጸጋ ኮዎማ፥ ከምዜኽ ቁንዘኻ ከእልኻ ኤከምዳ ከያሱስ ክርስቶስ ሜተም። 8ኮጎ መርሸማኳ፥ ኢዴበም፥ ራቆኸሥ ከእልኻ ኣሥ ኤተ በደካ ኸማ፥ ኣሥ ኤተ በጨካ ገሂን፥ ካሥ ገሸለማ ከመዪዥሠማ፥ ከማሄሸማ፥ ካሥ ኤተ በካገ ካይል ፄ ጸጋ፥ ኣሥ ዳ ኤተ በደካ መገማ፥ ኤተ በጨካ መገ ላኳ። 9ዳ ኤተ በኸገምከሽ ኖጎም በኸርኮቆኳ፥ ዳ ኤተ በኸገሰኮቆ ኖጎም በኸገምከሥኳ፥ አኻኳ ደኻ ኤያሥ ኤያ! ረባ ኤተ በኸካ መገማ ከምኢያ ከአኻ። 10አኻ ነኦኪል በበኽ ነቸቻ እኽላኳ ከምትጌ ደ መኻ ካራ፥ ከፄ በኸትገከሥ ኤበኸሳንዘከሥ አራ፥ በራገካይል በቦቆ ከኤታ፤ ኸገሻ በኸሳንዘከሥ መዱጎክ አራ፥ አርዸበካንኼ አንጅ ማ ከመትገሥ አለኣኼ። 11መከላለም ኤለኣኳ በራንዢገካ ዳኼ፤ በርገምከሸንዥገን መንዲል ዳ ኤተ በርጨካ። 12በርገምከሽ አር መንዲለማ ከበበኸማኳ፤ ነድ ገነ፥ ኤዴበናኳ፥ በበኸማ ከማንዢገማኳ፥ በርካገምከንዥገን መዱጎክ ከዳ ኮዎማ። 13ከምፈለርከሽ መደዳ ኮዎማ ከመዥጋ ኤተ በኸኬ አክርስቶስ ካራ። 14ነደንኳ፥ በኸደካ ገሸለማ ኖከ በኻጹሸከኽ ነማፉንጮቋለም። 15ነማጦሽ መገሸሥ ሰ ማገ ላ አል ረባ፥ ኦከ በርፈርኬሥ ነማቀዶኒያ፥ ኤተ በኳገምኪል ነመኸማ ከመሮቆማኳ፥ በኸገምካ ኤበኸደካ ኣሥ አኻ ደ ፊሊጲሲዩስ፥ ኤበሜካን ገሙንፀ ገዴራ ጀንዳ። 16ኖከ በራፉንጨካዬቆ ነተሳሎቄኳ፥ በኸኮለኬይል በኸትገኬ ማተጸሣ ካራ። 17መከላለም አለአ፥ ኤከምፈጋኸን በነ መሌአ እላለኻ፥ ከፄ በርአጀበካ ማተጸሣለኻ ኪልቆምኼ። 18እኽላ በርዸበከንዥገን ዳ ኮዎማ፥ በርጨካ ኤተ ከምትታ ካራ በቦቆኳ፤ ካል ኦከ በርርኮቆ ደ መኻለኻ ነኤለ ኤጳፍሮዲጦስ፥ አኢካንኼ ዳ ኤተ ባሸካዬኽ ካራ ሜተልኼ፤ ደ መኻለኻ አለአ ገሸል ዳ፥ መኺሥ ዳ ኤተ በካገካይል ረባኳ። 19ካ ከምዪጮቆ ረባለም ካኻ ነበቦቆ ገሂንለማ ከንዶጎ ያሱስ ክርስቶስ ዳ ኤተ ከማኣጓ አመኢያለኻ። 20ነድ ገሂን ከረባ ከበቦኳ ግዢ ግዥ ካሥ አል ግዢ ግዥኳ። ኣሜን። 21ኸኸካ ዳገ ከፄ ያሱስ ክርስቶስ ከደ ገዴራ ኮዎማ፤ ኢዴባ ደ በኢካ ኖጎምኳ ቢትገካ ዳገ ካኻ። 22ደ ገዴራ ኮዎማ፥ ከበቦቆኳ ደ ገዴራ ደ በኢካ ነመፀ ጥስ ዶጎ ሮማ፥ ቢትገካ ዳገ ካኻ። 23ነድ አመገ አል ኤቶኳ ያሱስ ክርስቶስ ከአኻ!

will be added

X\