ከደ ፊሊጲሲዩስ 3

1ከበቦቆኳ ኢዴበም፥ ኣገ ኻይል ከኤታ። ነዳ ኤተ በርቆተካ ካኻ ናል ገሲቋ፥ ከመንሰሠኼ አራ አማኮሊል መቆተማኼ። አለኣኳ ኤተ ከመንዥገሥ አኻ። 2ዜኸኽ ጸገኻ ነቆዋ ና፥ ደ በትገከሥ ጎልጎዛ ከፄ መሸሣ። 3በላ መዳን እማም፥ ቢልዸበከንዥገን አይል መሸሣ ኸማ፤ ቢልደካ ከገፉጫ ከረባ፥ ቢልከሸኮጎ ከያሱስ ክርስቶስ፥ ቢልበፀከሸንዥገን መጦሠን ማጦዪላለምላ ነዳ ኤተ ባገምካሥ ነጸገምላኳ። 4አራ ኪልቆምኳ ከዳ ኤተ ባገምካሥ ነጸገም፥ በርምጨካ ዳ ኤተ በርከምሾጓ። ኤከምኦሥ ጸጋ ጀንዳ በጨካ ዳ ኤተ ከምሸኮጎ ከዳ ኤተ ባገምካሥ ነጸገማ፥ በርጨካ አርኸን ዳ ና በቦቆ። 5ቢያርሸከሥ ነኦኪል ዬሰናኮ፥ ነዶጎ እስራኤል፥ ሾከ ቤንያም፥ ከፄ ቢድ እምበበምላ ዶጎ እብሮታ አራ መዪዥሥ ዶጎ እብሮታ፤ ነመዜኽ ማቶቋ አል ሙሴኳ አራ ደ ፋርስ። 6ከፄ ቤርከጥጣይል ከማቶቋ ካ፥ ቤራሙቾቆ ገሙንፀ ደ ገዴራ፤ ኤበምኢ በዪርካ አረባ ጸጋ ከመዪዥሠማ ከንዶጎ መትቶቆ ማቶቋ አል ሙሴ፥ አርመጨንኼ ቆቆማኼ። 7ኤተ ቤርዪር ነገፀ ኤዳ ቤጭ በና፥ በርዪርካ እኽላኳ ከፄ ክርስቶስ ኤዳ ባንዢገካ በና። 8ኸገሻ ከፄ በንተርኮቆ አመገም ኤተም ያሱስ ክርስቶስ ነዳ ነኮዎማ፥ በርዪርካ ዳ ኮዎማ ኤዳ ባንዢገካ በና። በራምብከሽ ከፄማ ዳ ኮዎማ፥ ከምዸብ ከክርስቶስ ኤበናኳ፥ በርዪርካ ዳ ኮዎማ አለአ ኤንችጃ። 9በርኦከሽ አር መኢያ ከክርስቶስ ሜታ፥ በራኣጎካ መዪዥሣ ኤተ በዎኬ ነመገሚላ ከክርስቶስ፥ ኤተ በኸኬ አረባ ከፄ መገሚላኳ፥ አራኣጎካኼ መዪዥሣ ኤተ በዎኬ ካራ ነማቶቋኼ። 10ዳ ኤተ በራኣጎካ አር፥ ማምባለሥ ክርስቶስ ከመዥግ መፈርሣለማ ነመሻኳ፥ መንዘ ል ማኣንሰሣለማ፥ መዳ ኤያለማ ከመሻለማኳ። 11በራጦኪል ኤኤለአ፥ ኤከመንዘ ሪል ነመፈርሣ ነመሻኳ። 12መከላለም፥ በርዸበከሥ አለአ ኮዎማ፥ ኤያሥ ኤያ በርደካ ጸጋ ኤተ መትቶቆማኼ። ከፄ በጦካ ክርስቶስ አራ ካለማኸን፥ ኤከምዸበራ አርኳ ዠላ፥ በርኢካ ነመዱጓ ከምዳሻ ከሰ ጋኸማ። 13ኢዴበም፥ አርዪርካኼ ጸገም ኤጸጋ ኤተ ናዸብ ዠላኼ፤ ነደንኳ በርደካ ዳ ሜተልኳ፤ በላ መሳንዘርሥ ዳ ኤተ በኢካ ነቸቸም፥ በርጽጨከኽ ከዳ ኤተ በኢከኽ ኮጎ እልኸምኳ። 14ሰ ጋኸማ ኮጎ እልኸም፥ በርኢካ ነመዱጓ ነቾጎማ ከምዸብ ዠላ፤ ዠላ አለኣኳ ማኦዋ አል ጎዛ፥ ኤተ በኸኬ አረባ ካኳ ከንዶጎ ያሱስ ክርስቶስ። 15አኳ ደ በኮዥገካኽ ከገፉጫ፥ ከፄ አለአ ከምዳ ካኳ መኢያ እልኳ ሜተም። ኤከመንሰ አእልኻ ነዳ ነሜተልኳ፥ ከምትገሥ አረባኳ አለአ ካኻ። 16ነዳ ነኮዎማ፥ ራቆኮሥ ኢኮኳ ካሥ ጎ ኤተ በኳምባለከሣ። 17ኢዴበም፥ ኮኸሥ አኽኳ አራ፤ ዪርኻ ጃጀንዳ ደ በሁለካ መኮሣለም። 18ኤተ በርገሸከሥ ካኻ ነገሲቋ፥ ከማኮለሪል መገሸሠማ ካኻ ከኸ ጹሻ፤ ቢኢካ ጸጋ በበኽ፥ ደ በጦካ አመንዻለማም ከብተ ጋገድ ጅ ክርስቶስ። 19ኮጎ መርሸማ ከምዸብዋ መቴያ አል ግዢ ግዥ፤ ኤተ ቢከዴር እማም ከመአጀበ በጫለማም፥ ቢዪርካ ገዪፆቋለማም ኤገሂን፥ ቢጦከሥ እለማምኳ ናሥ ዳ አል ኤበ እኔያ። 20አይላኸን ሾካ አል ጎዛ፤ ኤከምዌ ኤተ መብዶቆ አይላ ነጓ፥ ቢልዜከኽ ኤታ ያሱስ ክርስቶስ። 21ከማንዢል አ ጸገምላ ኤተ ገማዋ ኤጸገ ገሂንለማ፤ ኤተ ከምፈለከሽ አ መጦ አለአ፥ ከመዥጋለማ ኤተ በከጦከሥ አ ዳ ኮዎማ ኒል ኤለማ።

will be added

X\