ከደ ፊሊጲሲዩስ 2

1ነመኢያ ኤተ በኸከኢካ ከክርስቶስ በኸከኣገሸከሣ፥ በኸካተጸከሥ ከማሄሻለማ፥ በኸከኢካ ሜተም ከመዪዥሥ ገፉጫ፥ በኽኦከካሥ ከጸጋ ከመሌአይላኳ። 2ካ ዪጨኸኮቆ ማገጓለም ከመዳ እላ ሜተም፥ ከመጭ ማሄሻ ሜተም፥ ከሳ ሜተም፥ ከመሪል እገሻ ሜተምኳ። 3ከመጦኽ ጸገኻ ከገቻ ዪርኸካ ጸጋ ጀንዳ ከበቦቆማ ነጸገኻ፥ መደኻኼ ሜተል ከምዸብ በና ኪልቆኻ ኤያሥ ኤያ ከመሾጓ። 4ነዪር ሜታ ሜታማለኻ ገሸል ዳ ከጃጀንዳ፥ መዪርዳኼ ኣሥ አል እልቆማኼ። 5ጨኻ እላ ኤተ በጨካ አያሱስ ክርስቶስኳ። 6መከኢ አ ኸገሻ ረባ፥ አኣጎካንኼ መራቆሽ መሸ ከኤለ ከመኢያለማ ከረባ በባ ሜተምኼ። 7በበፀከሽ ገሂንለማ፥ በደካ ኤያል ዎደ፥ በካንዘ ከሥ ጸገማ ከጸጋ፥ በደካ ኤጸጋኳ። 8አ በጦከኽ ጸገማ ከገቻ፥ ባገሰካሥ ካሥ አል ኦከ መሻ፥ ካሥ አል ኦከ ከምቱዋ ነጋገድ ጃ ከመሻኳ። 9ከለኣኳ በጦከኽ አረባ አ ነዳ ነኮዎማ ከምጻ፥ በከኸከንዥገን ፄያ ኤተ በንተርኮቆ ነኮዎማኳ። 10በከጦካ አረባ አለኣኳ፥ ኤከማኩኩኑዋ ከምዴሩካ ፄ ያሱስ፥ ደ በኢካ ነጎዛ፥ ነኔያ፥ ኒል እንዝ እኔያ ኮዎማኳ፥ 11ኤከምትገሥ ጠጣ ኮዎማኳ ከገሂን ረባ በባ ከምከላ፥ "ያሱስ ክርስቶስ ኤታ።" 12ካ ደ በኻሄካሽ ኢዴበም፥ ኤያሥ በኻገሰካሥ መዱጎክ፥ በላ መዳን ናሥ ኦከ በርኢካ ኖጎኻ፥ ከበቦቆ ኖከ በርሜካ ኖጎኻኳ፥ ሻምበኻ ከመብዳለኻ ከገጤያ ከማሰሲያሣኳ። 13ረባ በጦካ ኒልኻ ኤከምኦኸሸን መደ ገሸለማ፥ ኤከምደኻን ኤያሥ መኦሻለማኳ። 14ደኻ ዳ ኮዎማ በላ መገሸኺል ሰኻ ማንሰኻኳ። 15ኤከምደኻ ኤለአ፥ ከምደኻ መዪዥሠማ ከደ በበፀካ መቱሥ እላ፥ ከምደኻ ከኢደ ረባ ደ ባንዢገካ ቆቆማኳ፤ ከምዪዥኾጎ ኤቢዣ አል ጎዛ ነኤበ እኔያ ነለአ ኖጎ ጸጋ ደ ገንሣ ከደ በበከኽ እንዶ ረባኳ። 16ራቆኸሥ እገሸ መኢያ! ኖካ ና ከምሸርኮጎ ከአኻ ኖከ ከምዌ ክርስቶስ፥ ከፄ በበፀካ መዳ አመደዳለም ከመሻምባለም መገ ። 17በርኢከቾጎ ነታሰ ረባ፥ ኤከምርዾቆ መገሚላለኻ ከማገሳሣለኻ ኤያል ደ መኻ። ኢገም ከምዳ ካራኳ ኤከምከሰሮቆ መሃለም ኤያል ደ መኻ። ኤከምዳን ኤለኣኳ ከማገራይል፥ ከመዞ ኲል ማገ ላለምኳ ኮዎኳ። 18ከምዳ ማገይላ ካኻኳ፥ ኣገ ኻይል ከአራኳ! 19ኤከምዳ መሄሸማ አል ኤታ፥ ከምትገራ ፈላ ጢሞቴዎስ ኮጎኻ፤ ከመንዥገራይልኽ ኤከምገሰሮቆ ፄኻ ከንዶጎማ። 20በርጨካ ኣሥ ጢሞቴዎስ ኤተ በምሻምበካ ካኻ በደካ እለማ ኤያሥ አለም፥ አርጨካንኼ ጸጋ ጀንዳኼ። 21በኣጎካ ጸጋ ኮዎማኸን ኣሥ ኤተ ከምገ ኪልቆማም፥ ኢያኣጎካኼ ኤተ ከምገ ከያሱስ ክርስቶስኼ። 22በኸገምካ አኽኳ ኪልቆኻ፥ ኤበደካ ጢሞቴዎስ ኤተ ቢዪርከሥ መደዳለማ ባገምካይል ከገሸል ጸጋ፤ ቢለገሰኪል አይላ እምበንድ ኤዱዋ ከበበማ፥ ቢላቲከስ ሰ ማገ ል አል ረባ። 23ኤያሥ ከማገመር ቾጎ እገሻለም፥ በራጦኪል ከመትግ አ ኮጎኻ። 24በራጦኪል አርኳ ነጸገ ኤታ፥ ኤከምዎሬ ኮጎኻ ፈላ። 25ዱዌበም ኤጳፍሮዲጦስ ኤተ በኸትገኬ ኤከምተጸሥ አራ ነማፉንጮቋለም፥ ኤተ ቢልደካ ቢልቱከሥ አይላ እምበንድኳ፥ መኮለሬቆ መትገሬ ኮጎኻ በኢካ ካራ ኤገሸለማ። 26በሄከሽ አ ዝንዜን ኤበምገመሥ አኻ፥ በሳንዘካ አኳ፥ ከፄ በኸገሰኮቆ መንሰሣለማ። 27ኸገሻ አኳ በንሰካሥ በርካ ከመሻ፤ ረባኸን በከሌአካይል በብደኮቆ አ፤ በላ መዳን ካሥ አ፥ በሌአካይል ካራኳ ኤከምበፀራን መተጸራ ነገሳንዛ ገሳንዛ። 28ካ ከምትገራ አ ፈላ ኮጎኻ፥ ኤከማገኻይል ኖከ ከምኮለኼ ከምገመኸሥ አ፥ ኤከምፐፐላን ገሳንዛለምኳ። 29ካ ሄኸሽ አ ከፄ ኤታ ከበቦቆ ማገ ላ፤ ኸኸካ ገሂን ከሾከ ጸጋ ከለአ፥ 30ከፄ በርካ ከምሸከሥ አ ከመደዳ አል ክርስቶስ፤ ከመኸ ማተጸሣ ነኤተ በኸሃለከሽ አኽ መኸማ ካራ፥ በርከሽ እለማ ከመኸ መኢያለማ።

will be added

X\