ከደ ፊሊጲሲዩስ 1

1አይላ እምጳዉሎስ ከጢሞቴዎስ ደ መደዳ አል ያሱስ ክርስቶስ፥ ቢልቆተካ ገትጋ አለአ ከደ ገዴራ አል ኤበ ፊሊጲሲዩስ ኮዎማ፥ ደ በዪዥካሥ ከያሱስ ክርስቶስ፥ ከደ መቼስ እንዶዋ ከደ ገዴራ፥ ከደ ማተጸሣኳ። 2ነድ መገ ከመገማ ካኻ ኖጎ ረባ በቦኳ፥ ኖጎ ኤቶኳ ያሱስ ክርስቶስኳ። 3ኖከ በርሳንዘከሥ አኻ፥ መዱጎክ በርኸካ መገ ላ ከረባለም። 4መዱጎክ ኖከ በርዴረካ ካኻ ከኮዎኻ፥ በርዴረካ ከማገ ላ። 5ዳ በርከደካ አለአ፥ ነማጦሽ ኤተ በኸርኮቆ ሰ ማገ ላ አል ረባ ካሥ አል ኦካ አለአ፥ ከፄ በኸምጹሸኪል ከአራ ነመደዳ አል ሰ ማገ ላ። 6በርገምኪል ረባ ኤተ ባጦከሽ ገሸል መደዳ ኖጎኻ፥ ኤከምትቶቆን አ ካሥ አል ኦከ ከምኮሌ አያሱስ ክርስቶስኳ። 7ዳ በከኢካ እለም ኖጎኻ፥ በኢካ ካራ ኤገሸለማ፥ ኤከምሳንዘርሥ አኻ ኤኤለአ መዱጎክ። ኖከ ቢፉንጨካ አራ ኤያሥ ኤያ ነመገሸኻ ከሰ ማገ ላ መርከኮሽ ከመዥግሸማኳ፥ በኸምጹሸኪል አኽኳ ነገሸል መደዳ ኤተ በኸኬ አረባ ካራ። 8ኤያሥ በሄከሽ ያሱስ ክርስቶስ አኻ፥ ከምዳ ረባ ኸገሻ ካራ፥ ኤበርሄከሽ አርኳ መገመሥ አኻ በቦቆ። 9በርዴረካ፥ ኤከምፈጋቆ ማሄሻለኻ ነማምባለሠማ ነማገሚለማኳ፥ 10ኤከማገመኺል ዳ ኤተ በደካ ገሸለማ ከገንሠማኳ። ኤኤለአ ከኦከ መዌ ክርስቶስ ከምደኻ መዪዥሠማ ከደ ባንዢገካ ቆቆማኳ። 11ከለአ ከማገምካሥ ኖጎኻ በበኽ ገሸል መደዳ ኤተ ከምጦሥ ያሱስ ክርስቶስ ኒልኻ። ከምዳ አለኣኳ ከገሂን ከመገ ላ አል ረባ። 12ኢዴበም፥ በራኣጎካ ኤከምገመኻን ዳ ኤተ በደካ ነጸገም ኮዎማ፥ ኤበተጸከሥ ከመፈጊል ሰ ማገ ል አል ረባ። 13ኤቢያርፉንጨካ ከፄ ክርስቶስ፥ ባገምካይለንዥገን ኖጎ ጸጋ አል መፀ ገፋሌ ዶጎ ሮማ ኮዎማ፥ ኖጎ ጸጋ ጃጀንዳ ኮዎማኳ። 14ከፄ ቢኩኮቆ አራ ከመፀ ማፉንጫ፥ ቢንዥገካይልኽ ኢዴባ ጎ በበኽ ነመገሚላ ከኤታ፥ በላ መጤዉዋን ቢንዥገካቆ እት ከመገሸሥ እገሸ ረባ። 15ጸጋ ሜታ ሜታ ቢያቲከስ ክርስቶስ ከገንሠ እላ ከምንስ አራኳ፤ ቢያቲከስ ጃጀንዳኸን ከገሸል መኦሻ። 16ከፄ በገምካ ጸጋ ሜታ ሜታ፥ ኤበጦከሥ ረባ አራ ነገአ ከመገሸኻ ከሰ ማገ ላ አለማ፥ ቢያቲከስ ክርስቶስ ከማገኻ። 17ጃጀንዳኸን ከምዸብ በና ኪልቆማም ቢያቲከስ ክርስቶስ ካሥ ቆቤሰማም። እማም አለአ መርከኢ ነማፉንጫ፥ ቢያኣጎካ ከመተጽ ማኣንሠሣ ካራ። 18አለኣኳ ኣሥ ከምዳና? ኒያቲስ ከገንሠ እላ ከመገኽ እላኳ፥ ከንዶጎ ኮዎማ ባቲካስ ኣሥ ክርስቶስ፤ በርካገ ካይል አር ከለአ። ከማገርካይል ካለንኳ፥ 19ከፄ በርገምካ፥ ኤከምጨገርካስ ከገዴራለኻ ከማተጸሣ አል ገፉጫ ካል ያሱስ ክርስቶስኳ። 20በርዜከኽ ከማጦዪላ፥ ኤከምበፃን መዪፆቆ መደዳለም አራ ነዳ ነሜተልኳ፤ ኤያሥ በርጦካ መዱጎክ፥ ከመኢያለምኳ ነድ ከመሻለምኳ፥ ከመንዥገራይልኽ እኽላኳ ከመኸ ገሂን ከክርስቶስ ከጸገም ከኮዎማ። 21ካራ ክርስቶስ መኢያ፥ መሻኳ ኤተ ከምዸበርካ በና። 22ኤከምፀ ራቆ ነኔያ፥ ከምፈለርሽ መደዳ ኤተ ከምጫ ኸማ፤ ከለአ አርገምካኼ ዳ ኤተ ከምሽለርሠንኼ። 23በሳንዘከሥ እለም ዳ እምበንድ፤ በርምበፀሽ ኤበ እኔያ አለአ በርመኢ ከክርስቶስኳ፥ በመገ  አለአ ካራ። 24ነደንኳ፥ በርምፀቆ ነኤባ ናል እኔያ ነለአ ካኻ ዝንዜን ገሸለማ። 25በርገምኪል ኤከምፀ ራቆ ኖጎኻ፥ በርገምካኳ። ከምኢርሽ ኖጎ ኮዎኻ፥ ኤከመንዥገኻሥ ነመገሚላ ከማገኻይለንኳ። 26ካ ኤከምኮለሬ ከምዎሬ ኮጎኻ፥ ከምፈጋቆ ዝንዜን ማገጓ ኤተ ከምጨኻኽ ከፄም ከንዶጎ ክርስቶስ። 27ከበቦቆ፥ ኢኸካ ኤያሥ በኣጎካ ሰ ማገ ል አል ክርስቶስ። ኤከምዎሬ ከምገመርሥ አኻ፥ ኤከምበፀራ መዎሬኳ፥ ኤከምኢኸቾጎ በላ መንደኸሠን ከገፉጫ ከሜተም ከእላ ከሜተምኳ፥ በራኣጎካ መገሶቆማ ኤከምሻምበኻ ከመገሚላ አል ሰ ማገ ላ አል ረባ። 28መጤኸካኼ ከደ በንሰካ አኻ ነዳ ነሜተልኼ። ከምትገሥ መዥግ እልኻለኻ መቴያለማም፥ ካኻኸን መብዳለኻ ኤተ ከምዌ ኖጎ ረባ። 29በላ መዳን መገመኸኪል ካሥ ክርስቶስ ባኸካዬሸንዥገን ካኻ፥ ኤከማኣንሠኻሥ ከፄማኳ። 30ኤያሥ በኸገምከሥ ነገሲቋ ማቱሣ ነጸገም፥ በኽኢካ እኽላ ነመገሶቆማኳ፥ አኻኳ ከምፈለኸሽ መቱኮሥ ኮዎኳ።

will be added

X\