ወጌላ ማቴዎስ 7

1ቤከተጽ ያሱስ ቤከል፥ "ኤከምበፃን አረባ መራ ካኻ፥ መርኻኼ ከጸጋኼ። 2ካሥ ኤተ በኸከርካ አኽ ከጸጋ፥ ከምኸርካ ረባኳ ካኻ፤ ኣሥ ዳ ኤተ በኸከዻምበካ አኽ ጸጋ፥ ከምዻምበካ አረባኳ አኻ። 3ካሤ ባከዪርካ ሱብራ አል እል ኸ ዱዌበኡዋ? ኣገምከሠኼ ሙችና ኤተ በኢካ ኒል ኸኡዋኽ? 4ናከምገመሠን ሙችና ኤተ በኢካ ኒል ኸኡ፥ ኤያላሥ ባከከለካን አም ከዱዌበኡ 'ቼርሥ ሱብራ ኤተ በኢካ ኒል ኸኡዋ?' ገመሥ፥ በኢካን ሙችና ኒል ኸኡ። 5አም ኤተ መሾጓ አለአ፤ ሲቆ መቼሥ ሙችና ኒል ኸኡ፥ ነለአ ነቸቻ ከምገማሥ ዝንዜን፥ ከምፈላሽ መቼሥ ሱብራ ኒል ኸ ዱዌበኡኳ። 6"መኸኻኼ መዪዥሥ ዳ ከቆዋ፥ ከማገሉዌኽ እማም ከመቀዋ አኻ፤ መኣምብኸሸኼ ሚንዛለኻኳ ነኸ ኤሉጓ፥ ከመንተብዋ እማምኳ።" 7"ሎቆኸሥ ከምኹዋ ካኻ፥ ኣኣጎኻ ከምዸበኻ፥ ኦቸኸሥ ግሰ መፃ ከምኮራስ ካኻ። 8ኤተ ከምሎቆሥ ኮዎማ ከምሮቆ፥ ኤተ ከማኣጓኳ ከምዸባ፥ ከምኮርካስ ከኤተ ከምኦቸሥ ግሰ መፃኳ። 9አኢካናኽ ናኻ ጸጋ ኤከምቆና አዱማ እጋ፥ ኤተ ከምኸካ ግሻ? 10ኤያሥ ኤያኳ ኤከምቆና አዱማ ዉ፥ ከምኸካ ሆላኽ? 11አኻ መኸከድ ገንሠማ፥ በኸገምከሽ መኸ ገሸል ዳ ከኢዳለኻ፤ በበኻ አል ጎዛኳ እንዘሥ ከመንተሮቆ ከምኸካ ጋገሸል ዳ ከደ በሎቆከሥ አ። 12"ዳ ኮዎማ ኤተ በኸሄከሽ አኽ ኤከምጦዋ ጸጋ ካኻ፥ ጦኸካ አኽኳ ከማም ኤያሥ ኤያ፤ ዳ ኤተ በትገከሥ አማቶቋ አል ሙሴ ከደ መዪርጓኳ፥ ኣሥ አለአ።" 13"ኩኻ ነማጥፂል ተከላ፤ ተከላ ኤተ በርኮቆ ኪል መቴያ በቢለማ፥ እንዶማኳ መፈጊለማ፤ ጸጋ ደ በዾካናኳ ኤማንጀማ። 14ተከላ ኤተ በርኮቆ ኮጎ መኢያ ማጥፂለማ፥ እንዶማኳ መሃሊለማ፤ ጸጋ ደ በዸበካ አ ዱፀን።" 15ያሱስ ቤከል፥ "ዜኸኽ ጸገኻ ነደ መዪርጓ ከጎልጎዛ፤ ከምኩዌሥ እማም ጃጃ ከምኢሱዌሥ ቤ ጃጃኳ ከምዎዉኬ ኮጎኻ፤ ኒለማምኸን ደ መሦ ማ ኤዬላዉዋ። 16ከማገመኸኪል እማም ከኸ መደዳለማም፤ ካፈላሻኽ መሆቆ ኸ ባጉዋ ነኽኻ፥ ኸ ቦዋኳ ነበፖዋ? 17ኤያሥ ኤያኳ በረካ ገሸል ጃ ኻ ገሸለማ፥ በረካ ገንሠ ጃኳ ኻ ገንሠማ። 18ከምፈለሸኼ ገሸል ጃ መረ ኻ ገንሠማ፥ ገንሠ ጃኳ መረ ኻ ገሸለማ። 19ጃ ኤተ ከምበፃ መረ ኻ ገሸለማ ኮዎማ፥ ከምራሽ ከምጦዉዋ ከማንጃ። 20ካ ከማገመኸኪል እማም ከኸ መደዳለማም።" 21ቤከተጽ ያሱስ ቤከል፥ "ኤተ ከምኩ ከገፋሌ ረባ ኣሥ ኤተ ከምጦዋ መኦሻ አል ባብ አል ጎዛ፥ ከምኩኼ አደ ከምከላ ካራ 'ኤተም፥ ኤተም' ኮዎማኼ። 22ኖከ መኸሣ ከምከላ ኤማንጀ ጸጋ ካራ፥ 'ኤተም ኤተም! ኢልገሸካንኼ አይል ከፄኡ መዪርጓኽ? ኢለምፖኮቆንኼ ከፄኡ ጋገንሠ ሙሳኽ? ኢልደካንኼ ከፄኡኳ ዳ አል ገተምዛኽ?' 23ከምከለራ አርኳ ኖካ ና ከማም፥ 'አርገምካኼ አኻ ሜተልኼ፥ ፐኸሥ ነኸም፥ አኻ ደ መምፑቆ ማቶቋ አል ረባ።"' 24"ካ ጸጋ ኤተ በካጦኪል ፄ ከገሻለም በጦካን ኤያሥ አለአ ኮዎማ፥ ኤጸጋ ኤተ መገመኻ ኤተ በደኮቆ ሸ መፃለማ ነግሻ። 25በቸካ ደማ፥ በለጎደካ ኣያ፥ ባሸካ ዙባኳ በትርከሥ መፃ፤ ኣቼካሸንኼ መፃ አኳ፥ ከፄ በኮካሸንዥገን ሸማ ነግሻ። 26ጸጋ ኤተ በካጦኪል ፄ ከገሻለም በበፀካን መዳ ኮዎማኳ፥ ኤጸጋ ተሞ ኤተ ናኮሽ መፃለማ ነሳሰማ። 27በቸካ ደማ፥ በለጎደካ ኣያ፥ ባሸካ ዙባኳ በትርከሥ መፃ፤ በቼካሽ መፃ አኳ፥ በደካ መቼሸማኳ ሰ ሜተል።" 28ኤቤርሽ ያሱስ እገሻለማ አ፥ ቤተምዞቆ መትገሠማለማ እል ጸጋ፥ 29ከፄ ቤትገሥ ከገፋሌያ፥ ኤትገሠንኼ ኤያል ደ መትገሥ ማቶቋ አል ሙሴኼ።

will be added

X\