ወጌላ ማቴዎስ 11

1ኤቤትቶቆ ያሱስ መትግ ደ መሁል ቾጎማ አሤር ኖቆማ እምበንድ ነቸቻ፥ ቤፈርሥ ነጓ ቤዽ ከኤዬባ ካል ጋንዲ ካ ከመትገሠማ ከማቲሰማኳ። 2ኤቤገሶቆ ኤተ መጩጾቆማ ዮሃንስ ነመፀ ማፉንጫ ዳ ኤተ ቤጦ ክርስቶስ፥ ቤከትግ ነደ መሁል ቾጎማ ሜታ ሜታ ኮጎማ። 3ቢሎቆሥ እማምኳ ቢከል፥ "ኤተ ቢከለካ ከምዌ አማኽ፥ በላ ከምዜይልኽ ጀንዳ?" 4ቤኮሎቆ ያሱስኳ ቤከከል፥ "ኮለኻ፥ እገሸኼሥ ከዮሃንስ ኤተ በኸገሰኮቆ በኸገምከሣኳ። 5ከምገሞጎ አደ በፐሸካኻ፥ ከምዦሽ ገሙ፥ ከምዪዣሥ ደ በምጸለቀከሥ አገንሠ መዹማ፥ ከምገሶቆ ደ በድቀካ፥ ከምፈርሥ አደ በሸሸካ፥ ከማቲያስ ሰ ማገ ላ አል ረባ ከደ ዢጋኳ። 6ናገይል ጸጋ ኤተ ከምበፃ ማጤያ እል ከፄም።" 7ኖከ ቢኮሌ አደ ቢትጋኳ፥ ቤያጦሽ ያሱስ መገሸሠማ ከጸጋ ከፄ ኤተ መጩጾቆማ ዮሃንስ ቤከል፥ "ከመገመሥ ኣሤ በኸከዸከሥ አኽ ኮጎ ዮሃንስ ከኸ እኔያ? ከመገመሥ ሥዳ ኤተ በፉጨካ አዙባኽ? 8በላ ኣሤ በኸፐከሥ አኽ ከመዪረማ? ጸጋ ኤተ በኢሰከሥ ማሰኽ ኣኽ? ደ ቢኢሰከሥ ማሰኽ ኣኳ፥ ቢኢካ ነመፀ ዶጎ ጥሳ። 9ካ ከመዪር ኣሤ በኸፐከሣ? ከመዪር ኤተ መዪርጓኽ? ኣዬ፥ ከምከለራ ካኻ፥ በኸገምከሥ ኤተ በንተርኮቆ ነኤተ መዪርጓኳ። 10ቤገሸሥ መዪዥሥ ሎርጋ ከፄማ ቤከል፥ 'አለአ፥ ከምትገራ ሰ ገትጋለም ነታሰኡ፥ ከመገሥ አ እንዶዋሉ ካም።' 11ኸገሻ በርገሸከሥ ካኻ፥ ነጸጋ ደ ቢምፖቆካ ነኔያ ኮዎማ፥ አኢካንኼ ኤተ በንተርኮቆ ዮሃንስ ኤተ መጩጾቆማኼ። ነገፋሌያ ናል ረባኸን ኤተ በሃለካቆ ነኮዎማ፥ ከመንተሮቆ ና። 12ኖከ ቤያጦሽ ኤተ መጩጾቆማ ዮሃንስ መትገሠማ ካሥ አል ኦካ አለአ ቤያጽጬሥ ገፋሌ ረባ ዝንዜን፤ ቢሮቆ ደ ቤያጽጨሥ ከምኩናኳ። 13ካሥ ግዠ ኤተ መጩጾቆማ ዮሃንስ ቢገሸከንዥገን ደ መዪርጓ ኮዎማ፥ ማቶቋ አል ሙሴኳ ከፄ ገፋሌ ረባ። 14ኤከምርኾቆ አለአ ኤከምበፀኻኳ፥ ዮሃንስ አለአ ኤተ ቢከለካ ከምዌ ኣሊያስ። 15ነገሶቆ ጸጋ ኤተ በጨካ ፄማ። 16"ካሤ ከማንዘ ርከሥ ማፖቋ አል እኽላ? እማም ኤያል ኢዳ ደ ናኢሽ ኒሊሳ፥ ደ ቢላኮካ ከመዠማም፤ 17'ቢልእሰካ ቆሜያ፥ አኸጸካንኼ፤ ቢልእሰካ ገዱዋኳ፥ አኸሳንዘካኼ።' 18ኖከ ቤዌ ዮሃንስ፥ ኤሰኼ ኤፈኼኳ፤ ቢከል ጸጋኸን 'በጨካ ገንሠ ሙሳ'። 19ኖከ በዎኬ ዱ በናደማ በሰካ በፈካኳ፤ ቢከለካ ጸጋኳ፥ 'ገመኸሥ አኽ ኤተ መሄሽ መሰማ ከመፈማ አለአ፥ ኤተ ማገኻ ከደ ፈቃ ከደ ገንሣኳ።' ነደንኳ መገመኻ አል ረባ ከማገማሥ ኸማ ከኸ መደዳለማ።" 20ጸጋ አል ኤዬባ ኖጎ ቤድ ያሱስ በበኽ ጋገሸል መደዳ፥ ኢያንዠሠንኼ እለማምኼ። ካ ቤያጦሽ ያሱስ መተስ እማም ቤከል፤ 21"እንዳዌ ካም ኮራዚን፥ እንዳዌ ካም ቤተሳይዳኳ፤ ጋገሸል መደዳ ኤተ በደካ ኖጎኻ በምደካ ነጥሮስ ከሲዶና፥ በምኮሌ ጸጋለማም እኽላ ነገንሠኽ እንዶዋ፥ ቢምኢሰሥ አ ገሳንዛ ቢምኢሽ ነመፋኳ። 22ኸገሻ ከመገሸርሥ ካኻ፥ ናኻ ከምሌአይል ረባ ኖከ መኸሣ በቦቆ ከዶጎ ጥሮስ ከሲዶና። 23አምኳ ቅፍርናሆም፥ ኣኣጎካ ማፈራቋ ካሥ ጎዛኽ? ከማኣምቧኣሽ ኪል መሃቲል ሆ አል እል እኔያ፤ ጋገሸል መደዳ ኤተ በደካ ነጉ በምደካ ነሶዶም፥ በምኢካ ካሥ አል ኦከ አለአ። 24ካ ከመገሸርሥ ካኻ፥ ነኤዬባ ነለአ ከምሌአይል ረባ ኖከ መኸሣ በቦቆ ከሶዶም።" 25ኖካ ና ቤከል ያሱስ፥ "ኤተም አል ጎዛ ካል እኔያ፥ አም ባባ! ከምኸራ መገ ላ ካም፥ ከፄ ባጸፀኮቆ ዳ አለአ ከደ መገመኻ ከደ መገመሸማ፥ ባትገኬሠን ከኢደ ገናሠማ። 26ኣዬ ባብ፥ ባሄከሸንዥገን መደማ ኤለአ። 27ባኸካዬሸንዥገን ዳ ኮዎማ ከንዶ ባብ ካራ፤ ኤተ በገምካ ዱማ ኣሥ በበማ፤ ኤተ በገምካ በበማ ኣሥ ዱማ ከኤተ በኣጎካ አ መከትገሠማኳ፥ አኢካንኼ ኤተ በገምካ በበማ ኤበደካ ዎዴያኼ።" 28ያሱስ ቤከተጽ ቤከል፥ "አኻ ደ በኸማዎካ ነገጹራለኻ ኮዎማ፥ ዎኼ ኮጎም፤ ከምኸራ አርኳ ማፉጮቋ ካኻ። 29ሃኢኸካ ከመትገሠማለም፥ ገመኸሽ ነጸገምኳ፤ አራ መሌእለማ ከኤተ መዻቆኽ ጸገማ ከገቻ፥ ከማፉጨኻቆ አኻኳ። 30ዳ ኤተ ከምትገርሥ አር መደማ ካኻ መፐፐለማ፤ ዳ ኤተ ከምጹርኻ አኽ ከፄምኳ፥ ገጹራኼ።"

will be added

X\