ወጌላ ማርቆስ 2

1ኖካ ዱፀን ነቸቻ ቤኮል ያሱስ ከቅፍርናሆም፤ ቤገሶቆ ጸጋኳ ኤበኢካ አ ነመፃ። 2ካሥ ጎ ቤሜ አጎ መኢቾጓ ነግሰ መፃኳ፥ ቤሙንፆቆ አበበኽ ጸጋ። ቤገሸሥ አያሱስ ሰ ማገ ላ አል ረባ ከማም። 3ቢዌ ጸጋ እንዝኽኳ ቢጹሬ መዣ ኤተ ቤሽ አጋቸቸ ጸገማ፥ ቢሬቆ ኮጎ ያሱስ። 4ከፄ ቤፈጋኽ ጸጋኳ ኢፈለሸንኼ መኩቆ መዣ አ ኮጎ ያሱስ። ካ ቢያጽጨኽ ቆ መፃ ከንዶጎ ቤኢ ያሱስ። ኤቢያምቦቆ ነቸቻ ቢብቶቆ እንተላ ኤተ ቤዥገን አመዣ ኤተ ቤሽ አጋቸቸ ጸገማ። 5ኖከ ቤገመሥ ያሱስኳ መገሚላለማም፥ ቤከል ከመዣ ኤተ ቤሽ አጋቸቸ ጸገማ፥ "ዱዋለም፥ ባምበፀካሸንዥገን ገንሣሉ ካም።" 6ነደ መትገሥ ማቶቋ አል ሙሴ ሜታ ሜታ ደ ቤኢሽ ነጓ፥ ቢከል ኒለማም፥ 7"ካሤ በከገሸካ መዣ አለአ ኤለአ? ረባ በ ካ፤ ኣሥ ረባ ኪልቆማ፥ ኦዴ ከምፈለሽ መበፀሽ ገንሣ?" 8ናሥ ኦካ ና ቤያገሚል ያሱስ ከገፉጫ ገሳንዛለማም ቤከል ከማም፥ "ካሤ በኸከሳንዘከሥ ሾከ ዳ አለአ ኒልኻ? 9አባሲቆ ከምፐፐላ? መከላ ከመዣ ኤተ በሸካ አጋቸቸ ጸገማ 'ባምበፀካሸንዥገን ገንሣሉ ካማኽ?' በላ መከላ 'ፈርሥ፥ ጹር እንተላሉ፥ ዸካ?' 10ኣምባለኸሥ እኽላ ኤበጨካ አዱ በናደማ ገፋሌያ ከምበፀሽ ገንሣ ነኤባ ናል እኔያ።" ቤከል ከመዣ ኤተ ቤሽ አጋቸቸ ጸገማኳ፥ 11"ከመገሸርሥ ካም፥ ፈርሥ፥ ጹር እንተላሉ፥ ዉካ ከመፀኡ።" 12ሚከዪርሽ ኮዎማምኳ፥ ቤፈርሥ መዣ አ ፈላ፥ ቤጹር እንተላለማ ቤከዳሻ። ቢተምዝ ኮዎማምኳ፥ ቢከኽ መገ ላ ከረባ ቢከል፥ "አኮገምከሠንኼ ሾከ አለአ ሜተልኼ።" 13ያሱስ ቤፐሥ እኽላኳ ቤዽ ከሰ ኤያያ፤ ቤዾዌ ጸጋ ኮዎማ ኮጎማ፥ ቤትገሥ አኳ ከማም። 14ኖከ ቤተር ነጓኳ፥ ቤገመሥ ሌዊ ዱ አልፌዎስ፥ መከኢሽ ኖጎ ቢንሽለኮቆ ፈቃ፥ ቤከከል፥ "ዌ፥ ሁሌ ቾጎ አራ።" ቤፈርሥ ሌዊኳ ቤሁል ቾጎ አ። 15ነለአ ነቸቻ ቤኢሽ ያሱስ ከምሶጓ ነመፀ ሌዊ። በበኽ ደ ፈቃ ከደ ገንሣኳ ቢሁል ያሱስ፤ ቢማኢሽ ነማም ጎ በበኽ ከምያሱስ ከደ መሁል ቾጎማኳ ከምሶጓ። 16ነጸጋ አል ደ ፋርስ ደ ቤድ ደ መትገሥ ማቶቋ አል ሙሴ፥ ኖከ ቢገመሥ ያሱስ ነመሶጓ ከደ ፈቃ ከደ ገንሣኳ፥ ቢከል ከደ መሁል ቾጎማ፥ "ካሤ በከሰኮጎ አ ከደ ፈቃ ከደ ገንሣኳ?" 17ያሱስኳ ቤገሶቆ አለአ ቤከል ከማም፥ "ደ በኣጎካ ኤተ ቢያ አደ መዹሣ፥ አኣጎካኼ አኻምብድ ጸጋ ኤተ ጺያኼ። ዳ በርኮኬሥ አር፥ ከመኦ ደ ገንሣ፥ ከመኦ ደ መዪዥሣኼ።" 18ደ መሁል ቾጎ ዮሃንስ ከደ ፋርስ ቤያገመኽ መኮዋ፤ ካ ቤዾዌ ጸጋ ኮጎ ያሱስ ቢከከል፥ "ደ መሁል ቾጎ ዮሃንስ ከደ መሁል ቾጓ፤ አል ደ ፋርስ ቢኮኮጓ፤ ካሤ በከበፀካ መኮዎጎ አደ መሁል ቾገኡኳ?" 19ቤከል ያሱስኳ፥ "ከምኮዉጓኽ አደ ዴዋና መከኢ አርኸ ጋኺንጃ ኖጎማማ? እምበአ፥ ከምኮዉጎኼ መከኢ አርኸ ጋኺንጃ ኖጎማምኼ። 20ከምዌ ኦከማ ኤተ ከምቼዉሠን ርኸ ጋኺንጃ ኖጎማም። ከምኮዉጎ ኖካ ናኳ። 21አኢካንኼ ጸጋ ኤተ በካቹምኪል ኣ ኽኻ ከገደገናኼ፤ ኤከምጦዋ ኤያ፥ ከምጹርታ ኣ ኽኻ ገደገና፥ ከምዳ አመጹርተማኳ ናል ገሲቋ በቦቆ። 22ከምጸፀኸኼ ጸጋ ሜተልኳ ኬ ኽኻ ነመሌኤኽ ኮጋኼ። ኤከምጦዋ ኤለአ፥ ከምጼቂል ኬያ አ ኮጋ፤ ከማርካ ኬያኳ ከምቴያ፥ ከምጫኼ ኮጋኳ በናኼ። ካ በኣጎካ አኬ ኽኻ ኤከምጸፁኽ ነኮገ ኽኻ።" 23ኖከ ዱ ሙሳ ነሜታ ቤያትሺል ያሱስ ቼ ጋትጋ። ሚከኢ ነንዶዋ ቤያጦሽ አደ መሁል ቾጎማኳ መንሾቆ ማንዚ ጋትጋ። 24ቤከል አደ ፋርስ ከያሱስ፥ "ገመሠና፥ ቢደካ አደ መሁል ቾገኡ ዳ ኤተ ባ ጻንደካቆ መደማ ኖከ ሙሳ።" 25ቤኮሎቆ ያሱስኳ ቤከል ከማም፥ "አኸሎቆከሠንኼያኽ ዳ ኤተ ቤድ ዳዊት፥ ኖከ ቤሺል ኤዴበና ከጸጋ ደ ቤኢ ኖጎማ፥ ቢያንዢግ ደ መሳ? 26ቤኩ ከመፀ ረባ ነአንጅ ጥስ መፀ ገዴራ በቦቆማ ናል ኣብያታር፥ ቤስ እጋ ኤተ በዪዥካሥ ከረባ፥ ኤተ በኸከሥ አመሰማ ካሥ እምጥስ መፀ ገዴራ። ቤስ ዳዊት፥ ቤከኽ ከደ ቤኢ ኖጎማኳ።" 27ቤተጽ ያሱስ ቤከል፥ "ረባ በዘዘኬ ኦከ ሙሳ ከጸጋ፥ አዘዘኬንኼ ጸጋ ከኦከ ሙሳኼ። 28ከለአ ዱ በናደማ ከኦከ ሙሳ ኤተማ።"

will be added

X\