ወጌላ ማርቆስ 13

1ኤያሥ ቤፐሥ ያሱስ ነመዪዥሥ መፀ ገዴራ ናል ዶጎ ዪሁዳ፥ ቤከከል ነደ መሁል ቾጎማ አሜታ ካ፥ "ኤተ መትገሠማ፥ ዪር አም ግሻ አለአ ከመንዳጎን መዶቆማ አለአ!" 2ቤኮሎቆ ያሱስኳ ቤከከል ካ፥ "ኣዪርካ አም መዶቆ ዳ እምበቦቆማ አለኣኽ? ከማምብቆ ኮዎማኳ፥ ከማሻኸኼ ግሻ ሜተል ኖቆ ግሻኼ።" 3ያሱስ ቤኢሽ ኖቆ ዶለ ቆሻ ቤካንዘ ል ከመዪዥሥ መፀ ገዴራ አል ዶጎ ዪሁዳ፤ ቢሎቆሥ እምጴጥሮስ፥ ከያይቆብ፥ ከዮሃንስ፥ ከኣንድራስ ከጺማም ያሱስ ቢከከል፤ 4"እገሼሠና ካይላ፥ ከማሥ ከምዳ ዳ አለአ? ኣሤ ማቲሣ ኤተ ከማምባልለከሥ ኤባርቸካዬቆ መርሸማኳ?" 5ቤከል ያሱስኳ ከማም፥ "አዪርኸካ፥ ኤከምበፃ ጸጋ ሜተል መንጠኽ አኻ። 6ከምዌ አበበኽ ጸጋ ከፄም ከምከሉዋ 'አራ ክርስቶስ፥' ከመንጡኽ በበኽ ጸጋኳ። 7መተምዘኻኼ ኤከምገሰኾቆ ማሸማ ከገሸ ማሸማኳ! በኢካ አለኣኳ ከመዳ፥ ነደንኳ መደማ አለአ መርሸማኼ። 8ሾካ ከምፈርሥ ከማሻ ከሾካ፥ ገፋሌያ ከገፋሌያኳ፤ ከምዳ አማንዙበሽ እኔያ ነኤባ ነሜታ ሜታ፥ ከምዳ ኤዴበናኳ፤ አለአ ማጦሽ ማኣንሠሣ፥ ኤያል ማጦሽ መቀ ዱዋ። 9"አዪርኸካ አኽኳ፥ ከመሩቆ አኻ ከኸ ተምባ፥ ከምኦቹዋ አኻ ነመፀ ገሙንፃ አል ዶጎ ዪሁዳኳ፤ ከምሂኢዩቆ ከምተምብቆ አኻ ከፄም ነኸ እምጥሳ ከጅኤለ ጥሳኳ፤ አኻኳ ከምደኻ ኸገሻ ካራ። 10ከምዳ ነመሲቆማ አማቲስ ሰ ማገ ላ አል ረባ ከሾካ ከኮዎማ። 11ኖከ ከመሩቆ አኻ ከማተገሩቆ ከኸ ተምባ፥ መሳንዘኻኼ ነገሲቋ ከዳ ኤተ ከመገሸኸሣኼ። ኖከ ከምዌ ኦከማ አ፥ እገሸኻ ዳ ኤተ ከማኻዬሽ ካኻ፤ ኤተ ከመገሻ፥ አመዪዥሥ ገፉጫ፥ አኻኼ። 12ከማተገሮቆ ዱዋ ዱዌበማ ከመሻ፥ በበማኳ ዱማ፤ ከማምብቱዋ ኢዳኳ ከዶጎ ኤበማ፥ ከማሹቆኳ። 13ከፄም ከማቸከካኽ ጸጋ ኮዎማ ካኻ። ኤተ ከምቀሞቆ ማኣንሠሣኳ ካሥ አል መርሸማኸን፥ ከምኢያ።" 14ያሱስ ቤከል፥ "ኤከምገመኸሥ ዳ ኤተ ከመንሥ እልኽ ጸጋ፥ ኤከምኢቾጎ ኤተ ከምዦገሥ ጎ መዪዥሠማ ኖጎ በበፀካ መኸከሥ ከአ -- ናገሚል ኤተ ከምሎቆሥ አለአ -- ኖካ ና ኒያምቤ ጸጋ አል ኤበ ዪሁዳ ኮቆ ዶላ። 15ጸጋ ኤተ በኢካ ኖቆ መፃ፥ መብቴኼ መኩዳኼ ከመሮቆ ዳ ኒል መፃለማኼ። 16ኤተ በኢካ ኒል ቼኳ፥ መኮለኸኼ ከን ከመሮቆ ኣለማኼ። 17ኖካ ና እንዳዌ ከደ ገዘሞ ከደ መኾቆ ኩዋ ከኢዳ። 18ዴረኻ ኤከምበፃ አለኣኳ መዳ ነመደማ። 19ከምዳ አንጅ አ አንጅ ማኣንሠሣ፤ ኤደንኼ ሾከ አለአ ነማጦሽ ከኤተ ቤከዘዜ ረባ ኤበ እኔያ ካሥ ደኽላ፥ ከማኮሊልኼ መዳኼ። 20በምበፀካ አረባ መጸለሥ አንጅ አ፥ በምፈለሸኼ ጸጋ ሜታ ኤለአ መኢያኼ። ከምጸለከሥ አ አንጅ አኳ ከፄ ጸጋ ደ በሽለከሥ አ። 21መገመኺልኼ ኤከምከላ ጸጋ ሜተል ኖካ ና ካኻ፥ 'ዪርኻ፥ ክርስቶስ ነገአ በኢካ፥ ነገት በኢካኳ።' 22ከምፈሩሥ ደ መከላ ከጎልጎዛ 'አራ ክርስቶስ' ከደ መዪርጓ ከጎልጎዛኳ። ከምትጉሥ ዳ አል ገተምዛ ከጋገሸል ዳ፥ ኤከምፈሉሻ ከመንጡከኽ ጸጋ ደ በሽለከሥ አረባ። 23አዪርኸካ አኽኳ፤ በርሲኮቆ በረገሸከሠንዥገን ካኻ ዳ አለአ ኮዎማ።" 24ቤተጽ ያሱስ ቤከል፥ "ነአንጅ ና፥ ነማኣንሠሣ ነቸቻ፥ ከምሻኽ ኦካ ከምዪዦጎኼ ጽጃኳ። 25ከምሃ ቄ ቢዣ ነጎዛ ከኔያ፥ ከማንዙባሽ ዳ ኤተ በኸካ መዪዦጓ ነጎዛ ኮዎማ። 26ነለአ ነቸቻ ከምገሙሥ ዱ በናደማ መከዌ ኒል ኩንዱ ከምበቦቆ መዥጋ ከገሂንኳ። 27ከምትጋ አኳ ሰ ገትጋ አል ጎዛ ከጋንዘ ል እኔያ ከንዝኽ፥ ኤከማሙንፁቆ ጸጋ ደ በሽለከሥ አረባ ነኤበ እኔያ ነኮዎማ።" 28ቤከል ያሱስኳ፥ "ነድ ጅ ቦዋ ከመኮሣ ካኻ። ኤበኩቀካቆ ቌለማ በቸካቆ ፄማኳ፥ በኸገምካ ኤባርቸካዬቆ ጅፈራ። 29ኤያሥ ኤያኳ፥ ኖከ ከምገመኸሥ በደካ አለአ ኮዎማ፥ በኸገምካ አኽኳ ኤባርቸካዬቆ መዌ ዱ በናደማ። 30ኸገሻ ከመገሸርሥ ካኻ፥ ከምተራኼ አማፖቋ አለአ ካሥ አል ኦከ ከምዳ አለአ ኮዎማኳ። 31ከምተራ እኔያ ከጎዛኳ፤ እገሻለምኸን ከምተራኼ ሜተልኼ።" 32"ኣሥ ባብ በገምካ ኦከማ አ ከአንጅ ማኳ፤ አገምካኼ አጸጋ ሜተል፥ አሰ ገትጋ ኒል ጎዛ፥ አዱማኳ። 33ኣምበንኻሥ፥ መዥገኻኼ፥ ከፄ በኸኤምኪል ኖከ ከምዌ አንጅ ማ አ። 34ከምዳ ኤጸጋ ኤተ በበፀከሽ መፃለማ በዸካ ከመሃት ኤባ፤ አ ቤካተገሮቆ ገፋሌያ ከዋደለማ፥ ቤከንኽ ከሜታ ሜታ ዳ ኤተ ከምዳ፥ ቤከገሸሥ ከኤተ መዜኽ ግሰ መፃ ኤከምዜኽ ዝንዜን። 35ካ ኣምበንኻሥ፥ ከፄ በኸኤምኪል አንጅ ኤተ ከምዊዩን ኤተ መፃ፥ ኢገም ነሸጋዥጋ ፌት ኒል መጎኳ፥ ነመእሰ ጺ ሜታ፥ ነኸማቱቋኳ። 36ኤከምዌ ታፕኸን፥ መዸቤቆዳኼ አኻ ነመዥጋ። 37ዳ ኤተ ከመገሸርሥ አር ካኻ፥ ከመገሸርሥ ከጸጋ ከኮዎማኳ፥ ኣምበንኻሥ።"

will be added

X\