ወጌላ ማርቆስ 11

1ኖከ ቢያርቻቆ እማም ከዬሩሳሌም፥ ቢዳሽ ከቤትፋጌ ከቢታንያ ከሸ ዶላ ኤተ ቤፐካን ቆሻ፤ ቤትግ ያሱስኳ ነደ መሁል ቾጎማ ጸጋ እምበንድ፥ 2ቤከከል ከማም፥ "ዸኻ ኮጎ ኤባ ካል ታሰኻ፤ ኤያሥ ከምኩኻኳ፥ ከምዸበኾቆ ዱ ናኑዋ፥ ኤተ በበፀካ ጸጋ መቶኮሠን መፉንጨሸማ፤ ጨገኼስ፥ ርኼቆኳ! 3ኤከምከላ ጸጋ ካኻ፥ 'ኣሥ በኸከደካ' ከለኸካ፥ 'አኤታ በኣጎካ፥ ከምኮሌቆ ፈላ።"' 4ቢፐሥ እማምኳ፥ ቢዸቦቆ ዱ ናኑዋ መፉንጨሸማ ነግሰ መፃ ኮጎ ሰ እንዶዋ፤ ቢጨጌስ አኳ። 5ቤከከል ነጸጋ ደ ቤኢቾጎ ነጓ አሜታ ሜታ፥ "ኤያላሥ ቤኸጨገስ ዱ ናኑዋ አለአ?" 6ቢኮሎቆ ደ መሁል ቾጎማኳ ኤያሥ ቤገሸሥ ያሱስ ከማም፤ ቢበፀሽ ጸጋኳ እማም። 7ቢሬቆ ዱ ናኑዋ አኳ ከያሱስ፥ ቢያምብኸን ኣለማም ነቸቸማ፥ ቤኢሸን አኳ። 8ጸጋ በበኽኳ ቢያምብኽ ኣለማም ኒል እንዶዋ፤ ጃጀንዳኳ ቢንሾቆ ቌለ ፃንጃ ነቼ ቢያምብኽኳ። 9ጸጋ ደ ቤቼስ እንዶዋ ከያሱስ ከደ ቤሁል ቸቻ ቢፈሮቆ ሰማም ቢከል፥ "ሆሳእና፥ ማሄሸማ ኤተ በዎኬ ከፄ ረባ፥ 10ማሄሸማ ገፋሌያ አል በፈጎኳ አል ዳዊት፥ ኤተ ከምዌያ፥ ሆሳእና ረባ አል ጎዛ።" 11ቤዽ ያሱስኳ ከዬሩሳሌም ቤኩ ከመዪዥሥ መፀ ገዴራ አል ዶጎ ዪሁዳ፥ ቤዪር ዳ ኮዎማ። ኖከ ቤልም ኦካ፥ ቢፐሥ ከደ መሁል ቾጎማ ከአሤር ኖቆማ እምበንድ ከቢታንያ። 12ኖከ ቢፐሥ እማም ነጀንደ ኦከማ ነቢታንያ፥ ቤሺል ያሱስ ኤዴበና። 13ቤገመሥ አኳ ጸት ጅ ቦዋ ኤተ ቤጭ ፄማ። ቤዽ ከማኣጎ ኸማ ነጃ ና። ኖከ ቤዳሽ ያሱስ ኮጎ ጃ ካኳ፥ ቤዸቦቆ ኣሥ ፄማ። አንጅ ማኳ ኦከ ገረ ቦዋኼ። 14ቤከል ያሱስኳ ከጅ ቦዋ ካ፥ "ካል ግዢ ግዥ መሱዳኼ አጸጋ ሜተል ኸማ ነጸገኡኼ፤" ቤገሶቆ ደ መሁል ቾጎማኳ። 15ቢዌ እማምኳ ከዬሩሳሌም። ቤኩ ያሱስ ከመዪዥሥ መፀ ገዴራ አል ዶጎ ዪሁዳ ቤያጦሽ መፖቆ ደ መኮዶቆማ ከደ መኮደማ ነመዪዥሥ መፀ ገዴራ፤ ቤያገልብዶቆ ዳ አል ደ መንዠኽ ለማና፥ ከቱጎ ደ መኮዶቆ ደራሪያኳ። 16ኤዠሰኼ ኤከምጹራ ጸጋ ዳ ከምተርካ ኒል ኸለ መዪዥሥ መፀ ገዴራኼ። 17ቤትገሥ ያሱስኳ ከማም ቤከል፥ "አቆተካንኼያኽ ነሎርጋ ሳ ኤተ በከለካ፥ 'መፃለም ከሾካ ከኮዎማ ነድ ከመፀ ገዴራ።' አኻኸን በኸጦካ ከሆ ገልኳ።" 18ኖከ ቢገሶቆ አመጥስ መፀ ገዴራ አል ዶጎ ዪሁዳ እምበቦቆማ ከደ መትገሥ ማቶቋ አል ሙሴ መከላ አለአ፥ ቢያኣጎ እንዶዋ ኤተ ከምሹቆን አ። ቢከጤካ ከአ፥ ከፄ ቤተምዞቆ እል ጸጋ ኮዎማ ነመትገሣለማ። 19ኖከ ቤድ አሸጋዥጋ፥ ቤፐሥ ያሱስ ከደ መሁል ቾጎማ ነኤዬባ ና። 20ኖከ ቢተር ነጀንደ ኸማቱቁማ ነገዳዱ፥ ቢገመሥ ኤቤኼኤ ጅ ቦዋ አ ነትማ። 21ቤሳንዘሥ ጴጥሮስ ዳ ኤተ ቤዶጓ፥ ቤከል፥ "ኤተ መትገሠማ፥ ገመሥ ጅ ቦዋ ኤተ ባሆተካ፤ በኼኤከንዥገና።" 22ቤኮሎቆ ያሱስኳ ቤከል፥ "ገመኺል ከረባ። 23ኸገሻ ከመገሸርሥ ካኻ፥ በላ ማጤያ እለን፥ ኤተ ከምከላ ከዶላ ከለአ፥ 'ኣፈራቆ፥ ኣኣምቧሽ ኪል ትል ኣያ፥' ኤከምገሚል መዣ አኳ ኤከምዳ አዳ ኤተ በገሸከሣ፥ ከምደካ። 24ካ ከመገሸርሥ ካኻ፥ ዳ ኤተ ከምዴረኻ ከምሎቆኻኳ፥ ገመኺል ኤዳ በኸርኮቆ አ፤ ኖካ ና ከማኻሽ ካኻ። 25ኖከ ከምኢኸቾጎ ከገዴራ፥ በፀኸሽ ከጸጋ ከኤተ በሸከሥ ካኻ፤ ኖካ ና ከምበፀሽ አበበኻ አል ጎዛ መምፑቆማለኻ ካኻ። [ 26ኤከምበፀኻ አኽኸን ማምበፀሸማኳ፥ ከምበፀሸኼ አበበኻ አል ጎዛ ገንሣለኻ ካኻኼ።]" 27ቢኮሌ እማምኳ ቢዌ ከዬሩሳሌም፤ መከኢ ያሱስ ነመንዻ ነመዪዥሥ መፀ ገዴራ አል ዶጎ ዪሁዳ፥ ቢዾዌ እምጥስ መፀ ገዴራ አል ዶጎ ዪሁዳ እምበቦቆማ ከደ መትገሥ ማቶቋ አል ሙሴ ከደ እምፈጋ ኮጎማ። 28ቢሎቆሥ እማምኳ ቢከከል፥ "ከገፋሌያ ካል ኣሤ ባከደካ ዳ አለአ ኮዎማ? ኤከምዳኣን አለአ ኮዎማ፥ ኦዴ በኸኬ ገፋሌያ ካማ?" 29ቤኮሎቆ ያሱስኳ ቤከል፥ "አራኳ ከምሎቆርከሥ አኻ ካሥ እገሻ ሜታ፤ ኮለኼቆ ካራ፥ ኖካ ና ከምከለራ አርኳ ካኻ፥ ከገፋሌያ ካል ኣሤ ኤበርደካ ዳ አለአ። 30ከንዶ ጓብ ባኸካዬሽ ገፋሌ ማጩጾቋ ኤተ ቤጩጾቆ አዮሃንሳ? ኖጎ ረባኽ በላ ኖጎ ጸጋ? ኮለኼቆ ካራ!" 31ቢሳንዘሥ እማምኳ ቢከል ኣሥ እልኸማም፥ "ኤመከሎኳ፥ 'ኖጎ ረባ' ከምከላ ካኳ፥ 'ካሤ በኸከበፀናኽ መገመኸኪላ?' 32ከሎኳ 'ኖጎ ጸጋ ባኸካዬሻኽ?"' ነደንኳ፥ ቢከጤ ከጸጋ ከምከላ ኤለአ፥ ከፄ ቢገሚል በበኽ ጸጋ ኤበደካ ዮሃንስ ኤተ መዪርጓ። 33ካ ቢከኮሎቆ ቢከል ከያሱስ፥ "ኢልገምካኼ ከንዶጎ ባኸካዬሻኼ።" ቤከል ያሱስኳ ከማም፥ "ከመገሸርሠኼ አርኳ ካኻ፥ ከገፋሌያ ካል ኣሤ ኤበርደካ ዳ አለአ።"

will be added

X\