ወጌላ ሉቃስ 4

1ኤቤከዪጫቆ ያሱስ ከመዪዥሥ ገፉጫ ነቸቻ፥ ቤኮሌ ነገቸ ዮርዳኖስ፤ ቤካይታቆ ከመዪዥሥ ገፉጫ ነኸ እኔያ 2ኦካ ግቸማ እምበንድ፤ ቤዻምብ ቁንዝ አሴጠና አ። ኖካ ና ኤሰንኼ ያሱስ ዳ ሜተልኼ፤ ነመርሽ ኦከማኳ ቤሺል ኤዴበና። 3ቤከል ሴጠናኳ ከያሱስ፥ "ኤከምዳኣ ዱ ረባ፥ ከል ከግሻ ከለአ፥ 'ዳ ከጋ።"' 4ቤከኮሎቆ ያሱስኳ ቤከል፥ "በቆተካንዥገን ነመዪዥሥ ሎርጋ፥ 'ከምኢካኼ ጸጋ ካሥ ደ መሳኼ።"' 5ነለአ ነቸቻ ሴጠና ቤፖቆ ያሱስ ኮቆ ዶላ ሜታ፥ ቤከትገሥ ሜታቆ ገፋሌ ኤበ እኔያ ኮዎማ። 6ቤከከል ሴጠናኳ፥ "ከምኸራ ካም ገፋሌያ ከገሂን አለአ ኮዎማ፤ ከፄ ባኸካዬሽ ካራ ዳ አለአ ኮዎማ፥ ከምኸርካ ከኤተ በራኣጎካ። 7አምኳ እኽላ ኤከማኩኩናኣ ከምዴራኣ ካራ፥ አለአ ኮዎማ አሉ።" 8ቤኮሎቆ ያሱስኳ ቤከከል፥ "በቆተካንዥገን ነመዪዥሥ ሎርጋ፥ 'አኩኩን ዴረካ ከረባ ከኤተኡ፥ ደካ ካሥ አኳ።"' 9ሴጠና እኽላኳ ቤሮቆ አ ከዬሩሳሌም ቤሂእቆ ነቆስ መዪዥሥ መፀ ገዴራ አል ዶጎ ዪሁዳ ቤከከል፥ "ኤከምዳኣ ዱ ረባ፥ ኣምብሽ ጸገኡ ነጎላ ከገቻ። 10በቆተካንዥገን ነመዪዥሥ ሎርጋ፥ 'ረባ ከምትጌ ካም ሰ ገትጋለማ ኤከምዜዉኸን አም፥' 11ኤያሥ ኤያኳ፥ 'ኤከምበፃን አግሻ መደሥ ቾገኡ፥ ከምጹሩዋ አም ነኤለማም።"' 12ቤኮሎቆ ያሱስ ቤከከል፥ "በከለካ መዪዥሥ ሎርጋ፥ 'መዻምብ ቁንዘኼ ረባሉ ኤተኡኼ።"' 13ኤቤርሽ ሴጠና መዻምብ ቁንዘ ያሱስ ከንዶጎ በበኽ ዳ ነቸቻ፥ ቤበፀሽ አ ካሥ አንጅ ማ፥ ቤዻ። 14ቤከኮል ያሱስ ከመዥግ መዪዥሥ ገፉጫ ከገሊላ፥ ቤያገሳቆ ፄማኳ ነጋንዲ ና ኮዎማ። 15አኳ ቤትገሥ ነመፀ ገዴራ አል ዶጎ ዪሁዳ፥ ቤከኽ አጸጋ ኮዎማኳ መገ ላ ካ። 16ያሱስ ቤዌ ከናዘሬት ከኤባ ኤተ ቤፈጋቆና፤ ኤማገመኻለማ ቤኩ ከመፀ ገዴራ አል ዶጎ ዪሁዳ ኖከ ሙሳ፥ ቤፈርሥ ከመሎቆሥ ሎርጋኳ። 17ቢከኽ ሎርጋ አል ኢሳያስ ኤተ መዪርጓ፤ ኤቤኮሪል ፄያኳ፥ ቤዸብ ጎ ቢቆተካ በከለካ፤ 18"ገፉጨ ረባ በኢካ ነጸገም፥ በደከሠንዥገን አራ ኤከመገሸርሥ ሰ ማገ ል አል ረባ ከደ ዢጋ፥ በትገኬንዥገን አራ ከማቲስ ኤከምዡስ ደ ቢፉንጨካ፥ ኤከምገሞጎ አደ በፐሸካኻ፥ ኤከምፐሠን ነዎደ አደ ቢላንጨከቋኳ፥ 19ኤያሥ ኤያ ከመገሸሥ ግዣ ኤተ ከምብዶቆን አረባ ሾካለማ።" 20ያሱስ ቤለጭል ሎርጋ አ፥ ቤኽ ከኤተ ቢንትገካ ነመፀ ገዴራ ና፥ ቤኢሽኳ። ደ ቤኢ ነመፀ ገዴራ አል ዶጎ ዪሁዳ ኮዎማኳ፥ ቤራቆ ኸማም ከጸገማ። 21አኳ ቤያጦሽ መከላ ከማም፥ "ሰ ሎርጋ ኤተ በኸገሰኮቆ አኽ አለአ፥ በትተካቆ ኖካ ነለአ።" 22ኮዎ ጸጋኳ ቢገሽ ገሸለማ ከፄማ፥ ቤሰሥ እለማም ከመገ  እገሻ ኤተ ቤፔሥ ነሰማ ቢከል፥ "አለአ ዱ ዮሴፍኼያኽ?" 23አኳ ቤከል ከማም፥ "በርገምካ ኤከማከልኸካ ከአራ፥ 'አም ኤተ ቢያ፥ ብዶቆ እልቀኡ፤ ኤያሥ ቢልገሰኮቆ ኤባጦኬ ነቅፍርናሆም፥ እኽላኳ ጦ ነኤበ በበኡ ነገአ።"' 24ቤተጽ ቤከልኳ፥ "ኸገሻ በርከለካ ካኻ፥ ኣሄካሸኼ ኤተ መዪርጓ ሜተል ነኤበ ዶጎ ኤበማኼ። 25ኸማ ከመገሸርሥ ካኻ፥ ቤኢ ነእስራኤል ጋፈ ዢጋ በበኽ ኖከ ኣሊያስ፥ ኖከ ቤሃንስ ጎዛ ቤር ደማ ግዣ ኦካግ ከጽጃ ማያ፥ ኖከ ቤኩ ኤዴበና ነኤባ ና ነኮዎማኳ። 26ቤትግ አረባ ኣሊያስኸን ካሥ ጎ እገፈ ዢጋ ሜታ ከኤበ ሰራጵታ አል ጋጦቆ ሲዶና፥ ኤትገንኼ ኮጎ ጋፈ ዢጋ ጃጀንዳኼ።" 27ኤያሥ ኤያ ቤኢ ነእስራኤል ኖከ ኤተ መዪርጓ ኤሊሻ አደ ቤምጸለቀሥ አገንሠ መዹማ በበኽ። ቤዪዥሥ ኣሥ ናኤማን ጸጋ አል ሶሪያ፥ ኤዪዣሠንኼ ነማም ጸጋ ጀንዳ ሜተልኼ። 28ኖከ ቤገሶቆ አለአ አደ ቤኢ ነመፀ ገዴራ አል ዶጎ ዪሁዳ ኮዎማ፥ ቤነ ስ አገቱዋ እማም። 29ቢፈርሥ ቢንኸት ያሱስ ቢፖቆ ኒል ኤዬባ ኮቆ ሰ ዶላ ጎ ቢዶቆን ኤዬባለማም፤ ዳ ቢከጦ ኤለአ፥ ከመኸተሽ አ ከገቻ። 30ቤያፐሥ አኸን ናሥ እለማም ቤዳሻ። 31ነለአ ነቸቻ ያሱስ ቤብቴ ከቅፍርናሆም፥ ከኤዬባ ኤተ ቤኢ ነጋጦቆ ገሊላ፤ ቤትገሥ ኖከ ሙሳ ኖከ ሙሳ ከማም። 32ከፄ ቤድ እገሻለማ ከገፋሌያ፥ ቤተምዝ ጸጋኳ ዝንዜን ነመትገሣለማ። 33ቤኢ ኒል መፀ ገዴራ አል ዶጎ ዪሁዳ ናኳ ጸጋ ሜታ ኤተ ቤራቆ አገፉጨ ገንሠ ሙሳ፤ አኳ ቤሉግ ከበቦቆ ሳ ቤከል፤ 34"አም ያሱስ፥ መዣ አል ናዘሬት፤ ኣሥ በኩኬቆ አም ነመኢያለምላ? ኣዎኬ አም ከምቴቆ አይላኽ? በርገምካ ኤባደካ አም ኦዴ፤ አም መዪዥሥ ዱዋ አል ረባ።" 35ቤሉገሥ ያሱስኳ አ ቤከል፥ "ጦ ፄ ትል፥ ፐሥ ነጸገማ፤" ገንሠ ሙሳኳ ቤፋቶቆ መዣ አ ኖጎ ጸጋ፥ ቤፐሥ ነጸገማ በላ መዳን ዳ ሜታ። 36ኮዎማምኳ ቤሰሥ እለማም ከገተምዛ ቢከል ኣሥ እልኸማም፥ "ኣሤ ሾከ እገሻ አለአ? በ ተኮቆ ጋገንሠ ሙሳ ከገፋሌያ ከመዥጋኳ፥ ቢከፐሥ እማምኳ።" 37ቤያገሳቆ ፄ ያሱስ ነኤባ አል ጋንዲ ና ነኮዎማ። 38ያሱስ ቤፈርሥ ነመፀ ገዴራ አል ዶጎ ዪሁዳ፥ ቤኩ ከመፀ ሲሞን። እሸ ሲሞንኳ ቤዻቆ ዝንዜን አመንሰ ጎከሣ፤ ቢሎቆሥ ያሱስኳ ኤከምተጸሠን አ። 39ቤችርሽ ኮጎ እልቆማ፥ ቤቶቆ ጎከሣ፤ ቤበፀሽ ጎከሣኳ አ። ቤፈርሥ እገፋ አኳ ናሥ ኦካ ና፥ ቤደዳ ከማም። 40ኖከ ቤልም ኦካ፥ ቢሮቆ ኮጎ ያሱስ ጸጋ ደ ቤንዻቆሥ አሾከ መንሰሣ ኮዎማ። ቤጦሠን አኳ ኤለማ ነጸገ ሜታ ሜታማለማም፥ ቤምብዶቆ እማም። 41ቤፐሥ ጋገንሠ ሙሳ ነጸገ ኤማንጀ ጸጋ ቤሉግ ቤከል፥ "አም ዱ ረባ።" ከፄ ቢገም እማም ኤበደካ አ ክርስቶስ፥ ቤሉገሥ ያሱስ እማም ቤጻንዶቆ ነገሻ። 42ኖከ ቤጅባጓኳ ቤፐሥ ያሱስ ነጓ፥ ቤዽ ኮጎ ቤሜ ጸጋ። ቤያኣጎ በበኽ ጸጋኳ አ፤ ኖከ ቢዳሽ ኮጎማኳ፥ ቢያኣጎ መጻንዶቆማ ኤከምበፃን አ መፐሥ ኖጎማም። 43ቤከል አኸን ከማም፥ "ከምዳ ካራ አመዻ ከማቲስ ሰ ማገ ል ገፋሌ ረባ ከኤዬባ ጃጀንዳ። ዳ ኤተ በከትገኬ አረባ አራ፥ ካሥ አለአ።" 44ቤኢ ነማቲሰማ ነመፀ ገዴራ አል ዶጎ ዪሁዳ ነጋጦቆ ዪሁዳኳ።

will be added

X\