ወጌላ ሉቃስ 3

1ነግዣ አሤር ኖቆማ ማቁስ ነኤተ ቤሙቾቆን አጥቤሪዮስ ጥስ ዶጎ ሮማ፥ ኖከ ቤድ ጴንጦስ ጵላጦስ ጥስ ኤበ ዪሁዳ፥ ሄሮድስኳ ጥስ ጋጦቆ ገሊላ፥ ዱዌበማ ፍልጶስኳ ጥስ እጡርያ ካል ጥራኮኒቶስ፥ ቤድ ሊሳንያስኳ ጥስ አብሊኒስ። 2እምሃናስ ከቃያፋኳ ቢድ እምጥስ መፀ ገዴራ አል ዶጎ ዪሁዳ እምበቦቆማ። ኖካ ና ቤዌ እገሸ ረባ ከዮሃንስ ዱ ዘካርያስ ነኸ እኔያ። 3ዮሃንስ ቤዽ ከጋንዲ ገቸ ዮርዳኖስ ኮዎማ ቤያቲስ ቤከል፥ "ኣንዠኺል እልኻ፥ ኣጩጸኻቆ ከማምበፀሽ ገንሣለኻኳ።" 4ኤኤለአ ቤትታቆ ኤተ ቢቆት ነሎርገ እገሸ ኢሳያስ ኤተ መዪርጓ፥ "ሰ ጸጋ ኤተ በሉገካ ነኸ እኔያ፥ ኤተ በከለካ፥ 'እገ ኸሥ እንዶዋ ከኤታ፥ ዦኸሽ እንዶዋ ኤተ ከምዻን አ። 5ነቱፓይል ሃንዦ ኮዎማ፥ ናንዘይል ቆ ዶላ ኮቆ ቱኩሳኳ፤ ነዦዋሽ መቁል ኸ እንዶዋ፥ ነዥግልስ አመኩርዡ ቆ እንዶዋኳ። 6ከምገመሥ ጸጋ ኮዎማኳ መብዳ ኤተ ከምዌ ኖጎ ረባ።"' 7ቤከል ዮሃንስ ከበበኽ ጸጋ፥ ደ ቤፔሥ ኮጎማ ከማጩጻቋ ከአ፥ "አኻ ኢደ ሆላ አለአ፥ ኦዴ በትገከሥ ካኻ ኤከምፐኸኸን ማመሠ ረባ ኤተ ከምዌያ? 8ደኻ መገ ዳ ኤተ ከምገሙካ ማንዠሥ እልኻ፥ መሸኸኮጎኼ ነመከላ ኪልቆኻ፥ 'አይላ ሾከ ኣብራሃም።' ከመገሸርሥ ካኻ፥ ረባ ከምፈለሽ መዘዝ ኢዳ ነግሻ ነለአ ከኣብራሃም። 9እኽላኳ ቢጦከሠንዥገን ዸላ ከመር ጃ ነትማ፤ ከምሩሽ ጃ ኤተ ከምበፃ መጫ ኸማ ገሸለማ ኮዎማኳ፥ ከምኣምብሽ ኪል ማንጃ።" 10ቤሎቆሥ በበኽ ጸጋኳ ዮሃንስ ቢከል፥ "ኣሤ በኢካ አመደማ ካይላ?" 11አኳ ቤኮሎቆ ከማም ቤከል፥ "ኤተ በጨካ ኣ እምበንድ፥ ነከኾቆ ሜታ ከኤተ ባንዢገካ፤ ኤተ በጨካ ደ መሳኳ፥ ነጦ ኤያሥ ኤያ!" 12ደ መሮቆ ፈቃኳ ቢዌ ኮጎማ ከማጩጻቋ ቢከከልኳ፥ "ኤተ መትገሠማ፥ ኣሤ በኢካ አመደማ ካይላ?" 13አኳ ቤከል ከማም፥ "መንተርኾቆኼ ነኤተ ቢርካ መርኾቆንኼ።" 14ቤሎቆሥ አለጋዪዳኳ አ ቢከል፥ "ኣሤ በኢካ አመደማ ካይላ?" ቤከል አኳ ከማም፥ "መተገኸኸኼ ጸጋ ሜታ መቼኸሠኼ ለማና ነጸገማኼ፥ መተምበኸኮቆኼ ጸጋ ሜታ ከጎልጎዛኼ፤ ነትት ኣሥ በነ መደዳለኻ ካኻ።" 15ጸጋ ኮዎማ ቢዜኽ ከማጦዪላ ኤከምዌ መሲያ፥ ቢሳንዘሥ ኒለማም ቢከል፥ "መዣ አለአ መሲያኽ?" 16ቤኮሎቆ ዮሃንስኸን ከኮዎማም ቤከከል፥ "አራ ከኣያ በርጩጸኮቆ አኻ፥ ከምዌ ኤተ በሙቸኮቆ አራ፤ አራ ጸጋ ኤተ ከምዳ ከምጨገስ ሲ ቻፓለማኼ። አ ከማጩጸኮቆ አኻ ከመዪዥሥ ገፉጫ ከማንጃኳ። 17አ በጨካ መካ ነኤለማ ኤተ ከምዪዥገኽ ኸ ጋትጋለማ ከባሊተማ ኒል ርንጃ፥ ከማሙንፆቆ ኸ ጋትጋለማ ኪል ኩኳ፤ ባሊተማኸን ከምጥጦቆ ነማንጃ ኤተ በበፀካ መሻኽ።" 18በላ መዳን ኣሥ አለአ፥ ከማገሸሣ ጃጀንዳ ቤያቲስ ከጸጋ ዝንዜን። 19ኤተ ቤድ ጥስ ጋጦቆ ገሊላ ሄሮድስኸን፥ ዳ ቤከተሥ አዮሃንስ ከፄ ቤሮቆ ሄሮዲያስ እገፈ ዱዌበማ ከመሸ ሠማለማ ኤተ ቤድ አ ኮዎማኳ፥ 20ቤከንተጾቆ ነመሸ ሠማለማ ከጀንዳ፥ ቢከኩቆ ዮሃንስ ከመፀ ማፉንጫ። 21ኖከ ቤያጩጻቆ ጸጋ ኮዎማ፥ ቤያጩጻቆ ያሱስኳ፤ መከኢ አ ነገዴራኳ፥ ቤያኮራስ ጎዛ። 22መዪዥሥ ገፉጫኳ ቤብት ከጸገማ ከሚዪእ ዬርኩንዳ፥ ቤዌ ሳኳ ነጎዛ ቤከል፥ "አም ዱዋለም ኤተ በርሄከሻ፥ ከበቦቆ በራገ ካይል ካም።" 23ኖከ ቤያጦሽ ያሱስ መደዳለማ፥ ቤኢ ግዣለማ ኤግቸማ ሜታ ኖቆማ አሤር። ኤቤገሽ ጸጋ፥ ቢከል ዱ ዮሴፍ፤ ዮሴፍኳ ዱ ኤሊ፤ 24ፄ እምበፈገማ ጃጀንዳኳ፥ ማታት፥ ሌዊ፥ መልኪ፥ ያናይ፥ ዮሴፍ፥ 25ማታቲያስ፥ ኣሞስ፥ ናሆም፥ ሄስሊ፥ ናጋይ፥ 26ማኣት፥ ማታቲያስ፥ ሴሜኢ፥ ዮሴ፥ ዮዳ፥ 27ዮሃናን፥ ሬሳ፥ ዞርባበል፥ ሰላትዬል፥ ኔሪ፥ 28መልኪ፥ ኣዲ፥ ቆሳም፥ ኤልማዳም፥ ኤር፥ 29ዬሹዋ፥ ኤሊዬሴር፥ ዮራም፥ ማታት፥ ሌዊ፥ 30ስሚኦን፥ ዪሁዳ፥ ዮሴፍ፥ ዮናም፥ ኤልያቅም፥ 31ሜሌያ፥ ማይናን፥ ማተታ፥ ናታን፥ ዳዊት፥ 32እሴይ፥ ዮቤድ፥ ቦኣስ፥ ሳልሞን፥ ነኣሶን፥ 33ኣሚናዳብ፥ ኣራም፥ ኣርኒ፥ ሄስሮም፥ ፋሬስ፥ ዪሁዳ፥ 34ያይቆብ፥ እስያቅ፥ ኣብራሃም፥ ታራ፥ ናሆር፥ 35ሴሩግ፥ ራጋው፥ ፋሌቅ፥ ኤቤር፥ ሳላ፥ 36ቃይናም፥ አርፋክሳድ፥ ሴም፥ ኖህ፥ ላሜክ፥ 37ማቱሰላ፥ ሄኖክ፥ ያሬድ፥ ማላልኤል፥ ቃይናን፥ 38ሄኖስ፥ ሴት፥ ኣዳም፤ ኣዳምኳ አል ረባ።

will be added

X\