ወጌላ ሉቃስ 2

1ኖካ ናኳ ቤጦ አጥስ ዶጎ ሮማ አዉጎስጦስ ማገሸሣ፥ ከመንዘ ዋኽ ኤከምቆቱዋን ፄማም ጸጋ ደ ቤኢ ነገፋሌያለማ ኮዎማ። 2መንዘ ኽ ጸጋ አለኣኳ አል ማጦሸማ፥ ቤድ ነግዣ ኤተ ቤደን አቄሬኔዎስ ጥስ ኤባ ነሶሪያ። 3ካ ጸጋ ኮዎማ ኤከምቆቱዋን ፄማም፥ ቤዾ ከኤባ ኤተ ቢምፖቆኬን እማም። 4ከፄ ቤድ ዮሴፍኳ ነሾከ ደ መፀ ጥስ ዳዊት፥ ቤፐሥ ነናዘሬት አል ጋጦቆ ገሊላ፥ ቤዽ ከጋጦቆ ዪሁዳ ከቤትልሄም ኤተ ቢኦካ ኤዬበ ዳዊት። 5ኤከምቆቱዋን ፄማም ቢዽ ከማሪያም ከኤተ ማዪርሣለማ፤ ማሪያምኳ ኤተ ገዘሞ። 6ሚከኢ ነጓኳ፥ ቤትት አንጅ መፖቋለማ፤ 7ቤያታጎ ቤፖቆ ጉንዘ ዱማኳ፥ ቤከገተሥ ከኣ ቤጦሥ ኖጎ ዳ ኤተ በሰካን አለማና። ዳ ቤከጦ ኤለኣኳ፥ ከፄ ቢያንዢግ ጎ መዥግ ኮዶ። 8ነጋንዲ ናኳ ቢንዥግ አዶጎ መሸላ ሜተም ነኸ እኔያ ቢዜ ለማናለማም። 9ቤያገማሥ ሰ ገትገ ረባ ከማም፤ መዪዦጎ ገሂን ረባኳ ቤዪዦጎ ነጋንዲለማም፤ ቢጤ እማምኳ በቦቆ። 10ሰ ገትጋኸን ቤከል ከማም፥ "መጤኻኼ! ከመገሸርሥ ካኻ በቦቆ ማገ ጓ ኤተ ከምዳ ከጸጋ ከኮዎማ። 11ኖካ ነለአ ነኤዬበ ዳዊት ቢፖቆካ ኤተ መብዶቆማ፤ አኳ ክርስቶስ ኤታ። 12ከምዳ አለአ ከማቲሣ ካኻ፤ ከምገመኸሥ ሆር ኤተ ቢከገተከሥ ከኣ፥ በዥገካ ኖጎ ዳ ኤተ በሰኮጎን አለማና።" 13ናሥ ኦካ ና ቢያገማሥ በበኽ ሰ ገትጋ አል ጎዛ ኖጎ ሰ ገትጋ ና፤ ቢዬኤ እማም ከመኸ መገ ላ ከረባ ቢከል፥ 14"ገሂን ነድ ከረባ ካል ጎዛ፥ መገማ ነኔያኳ ከጸጋ ደ በሄከሽ አረባ ኮዎማ።" 15ኤቤፐሥ ሰ ገትጋ ኖጎማም ቢኮል ከጎዛኳ፥ ቢከል አዶጎ መሸላ፤ "ዎኼ፥ ዾኳ ከቤትልሄም፥ ዻ ዪርኳ ዳ ኤተ በደኮጓ አለአ ኤተ በገሸከሥ አኤታ ካኳ።" 16ኤቢዽ ፈላኳ፥ ቢገመሥ እምማሪያም ከዮሴፍ ከሆር ኤተ በዥገካ ኒል ዳ ኤተ በሰኮጎን አለማና። 17ኤቢገመሥ ዶጎ መሸላኳ፥ ቢያቲስ እገሻ ኤተ ቤገሸሥ አሰ ገትጋ ከፄ ዱዋ ከማም። 18ደ ቤገሶቆ አለአ ኮዎማኳ ቤሰሥ እለማም አዳ ኤተ ቤገሸሥ አዶጎ መሸላ ከማም። 19ቤራቆሥ ማሪያምኸን እገሻ አለአ ኮዎዋ ከእለማ፥ ቤከሳንዘሥኳ። 20ዶጎ መሸላኳ ቢኮል ኮጎ መኢሻለማም፤ ቢኽ ገሂን ከመገ ላ ከረባ ከዳ ኤተ ቢገሶቆ ቢገመሥ ኮዎማኳ፥ ኤተ ቤድ ኤያሥ ቤገሸሥ አሰ ገትጋ ከማም። 21ኖካ ዬሰናኮ ነቸቻ፥ ኤቤትት አመሸሥ ዱዋ፥ ቢከንዠሥ ፄያ "ያሱስ።" ፄያ አለአ ኤያሥ ቤገሸሥ ሰ ገትጋ በላ መዘሞን ማሪያም ነገሲቋ። 22ኤቤትት ኦከ መዪዥሣለማም ነማዪ ዱኻ ኤማቶቋ አል ሙሴ፥ ቤሮቆ ዶጎ ኤበማ ዱዋ ከዬሩሳሌም ከመትገሠማ ከረባ። 23ዳ ቢከድ አለአ፥ ከፄ ቢቆተካ ነሎርገ ማቶቋ አል ረባ፥ "ኒከኽ ከረባ ታገ ጉንዘ ዱዋ ኮዎማ፥ ነከዪዣሥ።" 24ኤያሥ ኤያኳ ቢያኣጎካ መኸ ደ መኻለማም፤ አኳ ኤያሥ ቢቆተካ ነሎርገ ማቶቋ አል ረባ፥ "ኤያጂያ እምበንድ ፌት ዬርኩንዳ እምበንድ።" 25ነግዣ ና ጸጋ ኤተ ቢኦ ፄማ ስሚኦን ሜታ ቤኢ ነዬሩሳሌም። አ ኤተ መዜኽ ማቶቋ አል ረባ መዪዥሥ ጸጋ፥ ቤዜኽ ኤከምብዶቆ ረባ ሾከ እስራኤልኳ፥ ቤኢ አመዪዥሥ ገፉጫኳ ነጸገማ። 26ቤካትጋሥ ከንዶጎ መዪዥሥ ገፉጫ ኤከምበፃ አ መሻ በላ መገመሠን መሲያ ኤተ ቤትጌ አረባ። 27ቤካራቆ ከመዪዥሥ ገፉጫ፥ ቤኩ ከመዪዥሥ መፀ ገዴራ አል ዶጎ ዪሁዳ። ኖከ ቤኩቆ አዶጎ ኤበማ ዱዋ ከመፃ፥ ከመትቶቆ ዳ ኤተ በኣጎካ አመኢ ማቶቋ 28ቤሮቆ አስምኦን ዱዋ፥ ቤያ ደሥ ቤኽ መገ ላ ከረባ ቤከል፤ 29"ኤተም፥ ኤያሥ ባገሸከሥ አም እኽላ ዠቾጎ አራ ኤተ መደዳሉ ከመገማ። 30ከፄ በገምከሥ አኸ መደዳ አል መብዶቆማሉ፥ 31ኤተ ባጦከሥ ነኸ ሾከ ጸጋ ነኮዎማ። 32አ ከምዳ መዪዦጓ ኤተ ከምትገሥ ኸገሻ ከጸጋ ደ በበፀካ መዳ አል ረባ፥ ከምሬቆ ገሂን ከሾካሉ ካል እስራኤልኳ።" 33በበማ ዱዋ ከኤዬማኳ ቢተምዝ እል ዳ ኤተ ቤገሸሥ አስምኦን ከፄ ዱዋ። 34ቤገሥ ስሚኦንኳ እማም ቤከል ከኤዬማ ዱዋ ከማሪያምኳ፥ "ዱዋ አለአ ከበበኽ ጸጋ አል እስራኤል ከምዳ ከፄ መሥ አለማም፥ ከበበኽ ጸጋኳ ከፄ መብዳ አለማም። አ ማቲሣ አል ረባ ኤተ ከምንሰካ ጸጋ። 35ከንዶጎ አለአ ከማትጋሥ ገሳንዘ ኤማንጀ ጸጋ ከኸ እኔያ፤ አምኳ ኤዳ ቤቆሽ ቻጋ እሉ ከምኢያ ካም።" 36ቤኢ ኖካ ና እገፋ ኤተ መዪርጓ ሜተም ኤተ ቢኦ ሃና፥ ዱ ፋኑኤል፥ ነሾከ አሴር፤ ቤዥጋኸንዥገን አኳ፤ ኤቢሮቆ ነመኢ ደጎናለማ ነቸቻ፥ ቢኢ ከጉንዘማ ኣሥ ግዣ ሥሠ በንድ። 37ካሥ አል ኦከ ቤድ አግዣለማ ግቸማ እንዝኽ ኖቆማ እንዝኽኳ (84)፥ ቤኢ ኤያሥ አለአ። አ በላ መፐሥ ነመዪዥሥ መፀ ገዴራ፥ ከመኮዎጓ ከመዴራኳ ነመጎኳ ከኦካ ቤከድ ከረባ። 38አኳ ናሥ ኦካ ና ቤችርሽ ኮጎማም ቤኽ መገ ላ ከረባ፥ ቤገሸሥ ከፄ ዱዋ ከደ በዜከኽ መብዳ አል ዬሩሳሌም ኮዎማኳ። 39እምዮሴፍ ከማሪያም ኤቢትቶቆ ዳ ኤተ በኣጎካ አማቶቆ ረባ ኖጎማም፥ ቢኮሌ ከኤዬበማም ከናዘሬት አል ጋጦቆ ገሊላ። 40ቤፈጋቆ ዱዋኳ ቤዥጋኻ፤ ቤከኽ ረባኳ በቦቆ መገመኻ፥ ቤኢ አመገለማኳ ነጸገማ። 41ዶጎ ኤበ ዱዋኳ ቢዽ ነግዣ ነግዣ ከዚፈ ፋዝጋ ከዬሩሳሌም። 42ኖከ ቤድ አዱዋ ግዣ አሤር ኖቆማ እምበንድኳ፥ ኤያሥ ማገመኻ አል ኤባ አ ቢዽ ኪል ዚፈ። 43ኤቤተር አዚፈ ነቸቻ ኖከ ቢኮል ከመፃለማም፥ ቤያሻኽ ዱዋ ያሱስኳ ነዬሩሳሌም፤ እምበበማ ከኤዬማኸን ኢያምባለሠንኼ ኤቤያሻኽ ነቾጎማምኼ። 44ቢኦሥ በኢኬ ነን ነቾጎ ጃጀንዳ፥ ቢንዽ ኦካ ሜታ፤ ና ነቸቻ ቢሎቊል አ ኖጎ ጀንደማም ከዶጎ መዠማም። 45ከፄ ቢበፅ መዸብዋኳ፥ ቢኮል ከዬሩሳሌም ቢያኣጎ ናሥ ጓ። 46ነኦኪል ኦካግ ነቸቻ ቢዸብ ነመዪዥሥ መፀ ገዴራ፥ መከኢሽ ኖጎ ደ መትገሣ፥ ቤካጦዪል ፄ ቤሎቆሥ እማምኳ። 47ደ ቤካጦዪል ፄ ከአ ኮዎማምኳ ቤሰሥ እለማም ከፄ ማምባለሣለማ ከመኮሎቆማለማ። 48ኖከ ቢገመሥ አዶጎ ኤበማ አ ነጓ ቢተምዛ፤ ቤከከል አኤዬማኳ፥ "ዱዋለም፥ ካሤ ባከጦካ አይላ ኤለአ? አይላ ከበበኡ ቢልሳንዘኮጎ በቦቆ ቢልኢኬ ነማኣጎ አም።" 49ያሱስኳ ቤኮሎቆ ከማም ቤከል፥ "ከፄ ኣሤ በኸካኣጎካ አራ? አኸገምካንኼያኽ ኤበደካ አመኢያ ካራ ነመፀ ባብዋ?" 50እማምኸን ኢያምባለሠንኼ እገሻ ኤተ ቤገሸሥ አ ከማምኼ። 51ነለአ ነቸቻ ቤኮል ያሱስ ነቾጎማም ከናዘሬት፥ ቤያገሳሥ ከማምኳ። ኤዬማኳ ቤከራቆሥ እገሻ አለአ ኮዎማ ከእለማ። 52ያሱስ ቤፈጋቆ ከጸገማ ከመገመኻኳ፥ ቤያሄያሽ ኖጎ ረባ ከጸጋኳ።

will be added

X\