ወጌላ ሉቃስ 19

1ያሱስ ቤኩ ከዬርኮ ቤተሪልኳ። 2ቤኢ ነጓኳ ጸጋ ሜታ ኤተ ቢኦ ፄማ ዘኬዎስ። አ ጥስ ፈቃ፥ ተቃኳ። 3አ ቤያኣጎ መገመሥ ያሱስ ኤበደካ ዎዴያ፤ ከፄ ቤጸላቋኳ፥ ኤፈለሸንኼ መገመሠማ ኒል ኤማንጀ ጸጋኼ። 4አ ኖከ ቤያምባለሥ ኤከምተራ ያሱስ ነንዶዋ ና፥ ቤሲቆ ፈላ ቤቶኮሥ ጅ ቦዋ ሜታ ከመገመሥ አ። 5ኖከ ቤዳሽ ያሱስ ከጓ፥ ቤዪርጎ ከምጻ ቤከከል፥ "ዘኬዎስ፥ ብቴ ፈላ ኖቆ ጃ ነለአ፤ ከምዳ ካራ ኖካ ነለአ አመኢያ ነመፃ ናሉ።" 6ቤብቴ ዘኬዎስኳ ፈላ፥ ከማገ ላ ቤሮቆ ያሱስ ከመፃለማ። 7ጸጋ ደ ቤገመሥ አለአ ኮዎማ፥ ቢያገሾቆ ያሱስ ቢከል፥ "መዣ አለአ በኩካ ከመሰሳ ከመፀ ኤተ ገንሣ።" 8ቤፈርሥ ዘኬዎስኸን ቤከከል ከኤታ ያሱስ፥ "ከምኸራ ከደ ዢጋ ጋጹሺል ደ መጫለም ኮዎማ፥ ኤከምኢያን ለማና ኤተ በርርኮቆ ከመንጠኸማ ነጸገ ጸጋኳ፥ ከምኮለሮቆ ኤላ እንዝኽ።" 9ቤከከል ያሱስኳ፥ "በደከንዥገን ኖካ ነለአ አመብዳ ከደ መፃ ከለአ፥ ጸጋ አለኣኳ ሾከ ኣብራሃም። 10ዳ በከዎኬሥ ዱ በናደማ፥ ከማኣጎ ኤተ በቴካ ከመብዶቆማኳ።" 11መከኢ ጸጋ ነማጦዪል ፄያ ከገሻለማ፥ ቤተጽ ያሱስ መገሸሥ መኮሣ ሜታ ከማም። ዳ ቤከገሸሥ አለአ፥ ከፄ ቤያርቻቆ አ ከዬሩሳሌም፥ ቤኦሥ ጸጋኳ ኤከማገማሥ ገፋሌ ረባ ካሥ ዚያለአ። 12ቤከል ያሱስኳ፥ "በቦቆ ጸጋ ሜተም ቤዽ ከመሮቆ ጥሳ ከመሃት ኤባ ከምኮሌንኳ። 13አኳ ቤኦ ዋደለማ አሤር አ፥ ቤከንዘ ል ኸ ኣያ አሤር ከማም ቤከል፥ 'ዘበ ኸኬ ካሥ አል ኦከ ከምኮለሬ።' 14ጸጋ አል ኤበማኸን ከፄ ቢካቸካኽ ከመዣ ከአ፥ ቢትግ ደ እምፈጋ ነቸቸማ ኤከምዻ ከሉዋ፥ 'ኢላኣጎካኼ ኤከምዳ መዣ አለአ ከጥሳ ካይላኼ።' 15"አኸን ቤሬቆ ጥሳ ቤዊዩ ከኤበማ። ነለአ ነን ከማምባለሥ ኤቢከዘበካ እማም ቢከተጸከኽ ከንዘሥኳ፥ ቤከትጎጎ ኤከምኦዉኬ ዋደ ደ ቤከንዘ ኣያ። 16ቤዌ አል ገሲቋ ቤከከል፥ 'ኤተም፥ በርከዘበካ ከኸ ኣያ ኤተ ባኸኬ ካራ፥ በርከተጸከሠንዥገን ከኤላ አሤር።' 17ቤከከል ኤተማኳ፥ 'ገሸለማ ባደካ፥ አም ዎደ መገማ። ከፄ ባገምኪል ነዱ ገናሥ ዳ፥ ሮቆ ገፋሌያ ነጸገ ኤዬባ ነአሤር።' 18ቤዌ ዎደ ከምበንድኳ ቤከከል፥ 'ኤተም፥ በርከዘበካ ከኸ ኣያ ኤተ ባኸኬ ካራ፥ በርከተጸከሠንዥገን ከኤላ ማቁስ።' 19ቤከል ኤተማኳ፥ 'ሮቆ አምኳ ገፋሌያ ነጸገ ኤዬባ ማቁስ።' 20ቤዌ ዎደ ከኦካግኳ ቤከከል፥ 'ኤተም፥ አለአ ኣያ ኤተ ባኸኬ አም ካራ፤ በርከገተኮቆንዥገን ከገደገና በርጦከሣ። 21በርከጤካ ካም ከፄ ባደካ አም ከመዥግ ጸጋ። ከምራቆ ዳ ኤተ በበፀካ መጦዋሥ፥ ከማሙንፃቆ ኤተ ባበፀካ መዋሻኣኳ።' 22ቤኮሎቆ ኤተማኳ ቤከከል፥ 'አም ዎደ ገንሠማ አለአ፥ ካሥ ከገሻሉ ከምኸርከሥ ካም። ባገምካኼያኽ ኤበርደካ አር መዥግ ጸጋ፥ ኤበርርኮቆ ኤተ በርበፀካ መጦርሥ፥ በርሙንፀኮቆ ኤተ በርበፀካ መዋሸራኳ። 23ካሤ ባከበፀካ መኻኣ ኣያለም ከደ በምብጅኽ ካራ? ነመኮሌያለምኳ በርምሮቆ ኣያለም ከገብጀማ።' 24ነለአ ነቸቻ ቤከከል ኤተማ ከጸጋ ደ ቤኢከቾጎ ነጓ፥ 'ቼኸሥ ኸ ኣያ አ ነኤለማ፥ ኸኸካ ከኤተ በጨካ አሤርኳ።' 25ቢከከል እማምኳ፥ 'አ እኽላ በጨካ ኸ ኣያ አሤር።' 26ቤኮሎቆ ኤተማኳ ቤከል፥ 'ከመገሸርሥ ካኻ፥ ኤተ በጨካ ኮዎማ ከመንተጹኮቆ ከምኹካ፤ ኤተ ባንዢገካኸን፥ ኣሥ ኤተ በጨካ አኳ ከምቼዉሥ ኖጎማ። 27ደ በበፀካ ማኣጓ ኤከምደራ ከጥሳ ነጸገማምኸን ብታለም አለአ፥ ርኼቆ ከገአ፥ ሸኾቆ እማም ነኸም።"' 28ኤቤገሸሥ ያሱስ አለአ ነቸቻ፥ ቤያተተስ መንዻለማ ቤቶኮ ከዬሩሳሌም። 29ኖከ ቤያርቻቆ አ ከቤትፋጌ ከቢታንያ ከሸ ዶላ ኤተ ቢኦ ዶለ ቆሻ፥ ቤትግ ነደ መሁል ቾጓ ጸጋ እምበንድ፥ 30ቤከከል ከማምኳ፥ "ዸኻ ኮጎ ኤባ ካል ታሰኻ፤ ኖከ ከምደኻሽኳ፥ ከምዸበኻ ዱ ናኑዋ ኤተ በበፀካ ጸጋ መቶኮሠን መፉንጨሸማ፤ ጨገኼስ፥ ርኼቆኳ። 31ኤከምሎቆሥ ጸጋ አኻ ኤከምከላ፥ 'ካሤ በኸከጨገከሳ?' ከለኸካ፥ 'አኤታ በኣጎካ።"' 32ቢዽ ደ መሁል ቾጓ ደ ቢትጋኳ፥ ቢዸብ ኤያሥ ቤገሸሥ ያሱስ ከማም። 33ሚከኢ እማም ነመጨገስ ዱ ናኑዋኳ፥ ቤሎቆሥ አደ ኤተማም ቢከል፥ "ካሤ በኸጨከገከስ ዱ ናኑዋ አለአ?" 34ቢኮሎቆ እማምኳ ቢከል፥ "አኤታ በኣጎካ።" 35ቢሬቆ ዱ ናኑዋኳ ከያሱስ፥ ቢያምብኸን ኣለማም ነቸቸማ፥ ቢጦሸን አኳ። 36መከኢ ያሱስ ነመዻ፥ ቤያምብኽ ጸጋ ኣለማም ኒል እንዶዋ። 37ኖከ ቤያርቻቆ ነመብተኻ አል ሸ ዶለ ቆሻ፥ ቢያጦሽ አደ መሁል ቾጓ ኮዎማም ከበቦቆ ሳ መኸ መገ ላ ከረባ ከማገ ጓ ከዳ አል ገተምዛ ኤተ ቢገምከሥ ኮዎማኳ። 38ቢከል፥ "ማሄሸማ ጥሳ፥ ኤተ በዎኬ ከፄ ረባ፥ ነድ መገማ ነጎዛ፥ ገሂንኳ ከረባ።" 39ኒል ኤማንጀ ጸጋኳ ቤከከል አደ ፋርስ ችዳ ሜተም፥ "ኤተ መትገሠማ፥ ተስ ደ መሁል ቾገኡ።" 40ቤኮሎቆ ያሱስኳ ከማም ቤከከል፥ "ከመገሸርሥ ካኻ፥ ኤከምጦዉ ፄን እማምኳ፥ ከምሉጋ ግሻ አለአ።" 41ኖከ ቤያርቻቆ ያሱስ ከዬሩሳሌም፥ ቤገመሥ ኤዬባ አ፥ ቤከእሰሥ፥ 42ቤከልኳ፥ "ባማምባለከሥ ናሥ ኦካ ነለአ ዳ ኤተ ከምዳ ካም ማገ ጓ፥ በምደካ ገሸለማ። እኽላኸን ባ ጸፀካቆ ዳ አለአ ነኸኡ። 43ከምዌ ኦከማ ካም ኤተ ከምደኮቆ አብታሉ አም ኮቆ እንቱ እኔያ፥ ከምኦቹኮቆ አም ከኸላ፥ ከማፉንጩቆ አም ከንዶ ኮዎማኳ፤ 44እማም ከማዉከኽ አም ከኔያ ከጸጋ ደ በኢካ ኒሉ፤ ከምበፁሸኼ ግሻ ኖቆ ግሻኼ። ዳ ከምደካ አለአ ነጸገኡ፥ ከፄ ባኤምኪል አንጅ ኤተ በዎኬ አረባ ከመብዶቆ አም።" 45ያሱስ ቤኩ ከመዪዥሥ መፀ ገዴራ አል ዶጎ ዪሁዳ፥ ቤያጦሽ መምፖቆ ደ መኮዶቆማ። 46ቤከከል ከማምኳ፥ "በቆተካንዥገን፥ 'ከምዳ መፃለም መፀ ገዴራ፤' አኻኸን በኸጦከንዥገን ከሆ ገልኳ።" 47ቤትገሥ ያሱስ ኖካ ኖካ ነመዪዥሥ መፀ ገዴራ አል ዶጎ ዪሁዳ። እምጥስ መፀ ገዴራ አል ዶጎ ዪሁዳ እምበቦቆማ፥ ከደ መትገሥ ማቶቋ አል ሙሴ ከደ እምፈገ ኤባኳ ቢያኣጎ መሾቆ አ። 48ነደንኳ፥ ኢዸበንኼ እንዶዋ ከመደዳ ሜተል ነጸገማ፥ ከፄ ቤሄሽ አጸጋ ጃጀንዳ ኮዎማ ማጦዪል ፄያ ከገሻለማ።

will be added

X\