ወጌላ ሉቃስ 12

1ኖካ ነሜታ ኤቤሙንፆቆ ኤማንጀ ጸጋ በበኽ፥ ቢያጽጭ ቾጎ፥ ቤያጦሽ ያሱስ መከላ ከደ መሁል ቾጎማ፥ "ዜኸኽ ጸገኻ ነኣይ እገ ደ ፋርስ፤ መከላለም አለኣኳ፥ ሃተኻሥ ነመሾጓለማም። 2ከማትጋሥ ዳ ኤተ ባጉንደካቆ ኮዎማ፥ ከማገማይል ዳ ኤተ ባጸፀካቋኳ። 3ካ፥ ዳ ኤተ በኸገሸካ አኽ ነመጓ፥ ከማገሳቆ ነመዪዦጎ ኦካ፤ ዳ ኤተ በኻሰሰከካ አኽ ኪል ፄ ጸጋ ኒል መፃኳ፥ ከማቲያስ ነጃጻ።" 4"ከመገሸርሥ ካኻ ጀንደም፥ መጤኸካኼ ከደ በሸኮቆ በጨ ጸጋ፤ ከምፈሉሸኼ እማም ነለአ መደ ገንሠ ዳኼ። 5ከምትገርሥ ካኻ ኤተ ከምጤኸካ፤ አኳ ኤበሾኮ ነቸቻ ኤተ ከምፈለሽ መኣምብሸማ ከማንጃ አል ግዢ ግዥ፤ ኣዬ፥ ከመገሸርሥ ካኻ፥ ጤኸካ ካሥ ከአ። 6ኢያኮደካቆኼያኽ ኤሲሲያ ማቁስ ከኢደ ኸ ሶ ከምበንዳ? አኢካንኼ ነማምኳ ኤተ ባኤምከሥ ረባ ሜተልኼ። 7በንዘ ካኸንዥገን ቤቆኻ ኮዎማኳ፤ ካ መጤኻኼ፤ በኸጨካ አኽኳ በቦቆ በና ነበበኽ ኤሲሲያ።" 8"ከመገሸርሥ ካኻ፥ ኤተ ከምሽጣ አራ ነኸ ጸጋ፥ ከምሽጠራ አር ዱ በናደማኳ አ ነታሰ ሰ ገትጋ አል ረባ። 9ኤተ ከምሽጣ አራ ነኸ ጸጋ፥ ከምሽጠራ አርኳ አ ነኸ ሰ ገትገ ረባ። 10ኤተ ከመገሻ ገንሠ ዳ ነጸገ ዱ በናደማ፥ ከማምበፀካሽ፤ ኤተ ከመገሻ ገ ያ ነመዪዥሥ ገፉጫኸን፥ ከማምበፀካሸኼ ገ ያለማኼ። 11"ኤከምሩቆ አኻ ከመፀ ገሙንፀ ዶጎ ዪሁዳ ከኸ ጥሳ ከኸ ደ ገፋሌያኳ፥ መሳንዘኻኼ ነመከላ ኣሤ ከምኮሊልቋ፥ ኤያብ ከመገሽላኳ? 12ኖካ ና ከምትገሥ አመዪዥሥ ገፉጫ ካኻ ዳ ኤተ ከምዳ አመገሸሠማ ካኻ።" 13ቤከል ነኤማንጀ ጸጋ ና መዣ ሜታ ከአ፥ "ኤተ መትገሠማ፥ እገሸከሥ ከዱዌበም ኤከመንዘ ኺለን ካራ መኮል ዳ ኤተ በፀከሽ አበበምላ ካይላ በሸካና።" 14ቤከኮሎቆ ያሱስ ቤከከልኳ፥ "አም መዣ አለአ፥ ኦዴ በጦካ አራ ኤከምደራ ካኻ ከኤተ መኸሣ፥ ከኤተ መንዘ ል መኮል ዳ አለኻኳ?" 15ከመተጸማኳ ቤከከል ከማም፥ "አዪርኸካ፥ ዜኸኽ ጸገኻ ነመሲያሣ ነኮዎማ፤ ኤከምጫ ጸጋ በበኽ ደ መጫኳ፥ አከኢከኼ ጸጋ ከደ መጫለማኼ።" 16ነለአ ነን ቤገሸሥ ያሱስ መኮሣ ሜታ ከማም ቤከል፥ "ቤኢ መዣ ሜታ ኤተ ቤከኽ አቼለማ ኸ ጋትጋ በበኽ። 17አኳ ቤሳንዘሥ ኒለማ ቤከል፥ 'አርጨካኼ ኮጎ ማሙንፀሮቆ ጋትጋለም፥ ኤያብ ከምጦራ?' 18ቤከልኳ፥ 'ከምጦራ ኤለአ፤ ከምቼረሽ ኩለም፥ ከምደሮቆ ነለአ በቦቆማ፤ ከማሙንፀሮቆ ከጓ ጋትጋለም ከደ መሳለምኳ። 19ከምከለራ ኪልቆምኳ፥ ኤተ ከምትታ ካም ከግዣ በበኽ ባጨካ ደ መሳ ኤማንጀማ፤ ኣፉጫቆ፥ ሳ፥ ፋ፥ ኣገይልኳ።' 20ቤከከል አረባኸን፥ 'አም ተሞ አለአ፥ ነመጎኳ ነለአ ከምቼያሥ ፉሣ ነጸገኡ፤ ዳ ኤተ ባገ ከሥ አም አለአ፥ ከዎዴ ከምደካን አ?' 21ኤያሥ አለአ ከምዳ ኤተ ባሙንፀኮቆ ደ መጫ ኪልቆማ ነኔያ፥ ባንዢገካን ኖጎ ረባኳ።" 22ነለአ ነቸቻ ቤከል ያሱስ ከደ መሁል ቾጎማ፥ "ካ ከመገሸርሥ ካኻ፥ መሳንዘኻኼ ከመኢያለኻ ከጸገኻ ነመከላ፥ ኣሤ ከምስላ ኣሤ ከምኢስልሣኳ። 23ከፄ በንተርኮቆ አመኢያ ነደ መሳ፥ ጸገጸጋኳ ነኣ። 24ዪርኻ ያቆራ አዋሸካኼ አጸካኼኳ፥ አጨካኼ ዳ ከኩኼ፤ ኣሥ ረባ በኸካ ደ መሳ ከማም። አኻኸን ነመት እል ግዚያ በኸጨካ በና በቦቆ። 25አኢካናኽ ናኻ ጸጋ ሜተል ኤከምሳንዛናኳ፥ ኤተ ከምፈለሽ መተጸከሥ ግዣለማ ከኦካ ከሜታማ? 26ካ ኤበኸበፀካ መፈለኸሽ ኣሥ ዱ ገናሠማ አለአ፥ ካሤ በኸከሳንዘን አኽ ከዳ ከጀንዳ? 27ዪርኻ ኤያላሥ ኤበፈገካቆ ቦልጃ። አሌካኼ ነመደዳ፥ አጺንፀካኼኳ። ከመገሸርሥ ካኻ፥ ጥስ ሶሎሞን ኤተ ቤጭ በቦቆ ገሂንኳ፥ ኤኢሰሠንኼ ደጎን ኣ ኤነማም ሜታኼ። 28አኻ ደ መገሚላ ከጀንደ እላ አለአ፥ ኤባንደጎነከሥ አረባ በከኢሰከሥ ግዚያ አል ኸ እኔያ፥ ኤተ ባገምካሥ ናሥ ኦካ አለአ ከምጥጦቆ ማንጃ ከማቱቅኳ፥ ከመንተሮቆኼ በቦቆ ከምኢሰከሠኼ አኻኳኽ? 29ማፉንጨኸኮቆኼ ጸገኻ ነመከላ፥ ኣሤ ከምስላ ከምፍላኳ፤ መሳንዘኻኼ ከፄ አለኣኼ። 30ከምዸብ አለአ ኮዎማ በከሻምበካ ጸጋ ደ በበፀካ መዳ አል ረባ፤ በገምካ በበኻ ኤበኻኣጎካ አኽ ዳ አለአ ኮዎማ። 31አኻኳ ራቆኸሥ ከእልኻ ገፋሌ ረባ፥ ከምተጸካሥ ካኻ ዳ ኤተ ከማኣጎኻ ኮዎማኳ።" 32"መጤኻኼ አኻ መሃለኽ ኢዳ አለአ፥ በሄከሸንዥገን አበበኻ አል ጎዛ ኤመኮለኻ ገፋሌያለማ። 33እኮደኾቆ ደ መጫለኻ፥ ኸኸካ ከደ ዢጋ፤ እገ ኸሥ ዠገደ ለማና ኤተ ከምበፃ ማገፀ፥ ኣሙንፀኾቆ ነጎዛ ደ መጫ ኤተ ከምበፃ መከራ፥ ኖጎ ከምበፃ መዸበሥ አገልኳ፥ መሳ አመጨጫኳ። 34ኖጎ በኢካ አደ መጫለኻ፥ እልኻኳ ናሥ ጓ።" 35ቤከል ያሱስ፥ "ነኢሽ አሸ እልኻ ከመፉንጨማ፥ ነኢ ጅለኻኳ ከመጅቆማ። 36ኮኸሥ ዋደ፥ ደ ቢዜከኽ መዊዩ ኤተማም፤ እማም ኖከ በኮለኬ ኤተማም ኒል ዴዋና፥ በኦቸከሥ አኩድደ መፃ፥ ቢከኮርከስ ፈላ። 37ኒያገይል ዋደ፥ ኖከ ከምዌ ኤተማም ከምዸቤቆ እማም ከኻምበራ። ኸገሻ ከመገሸርሥ ካኻ፥ ኤተማም ከመገሥ ኣለማ፥ ከምጦዋ እማም ኖጎ መኢሻ፥ ከምኢቾጎ ከምኻ ደ መሳ ከማም። 38ኤከምዌን ኒል መጎኳ ነመእሰ ጺ ሜታኳ፥ ኒያገይል ደ ከምዸቤቆ አ ከኻምበራ። 39ገመኻ አለአ፤ በማገሚል ኤተ መፃ አንጅ ከምዌ አገልኳ፥ በምጦኼ ኤበምኮር ል ገልኳ መፃለማኼ። 40እገ ኸሥ አኽኳ ዜኸኽ፥ ከፄ ከምዌ ዱ በናደማ ነአንጅ ኤተ ከምበፀኻን አኽ መሳንዘኸሥ።" 41ቤከል ጴጥሮስኳ፥ "ኤታ፥ ኣገሸከሥ አም መኮሣ አለአ ካሥ አይላኽ፥ በላ ከኮዎ ጸጋ?" 42ቤኮሎቆ ቤከል ኤታ ያሱስኳ፥ "ዎዴ መገሚል ኤተ መዪር መፃ መገመኸማኳ፥ ኤተ በጦከሠን አኤተማ ኒልቆ ዋደለማ፥ ኤከምኸካን አ ደ መሳ ከማም ነአንጅ ማ? 43ናገይል ዎደ አ፥ ኖከ ከምዌ ኤተማ ከምገመሥ ነመጦማ ኤያሥ በከገሸከሥ ከአ። 44ኸገሻ ከመገሰርሥ ካኻ፥ ከምጦዋ ኤተማ ዎደ አ ከኤተ መዜኽ ደ መጫለማ ኮዎማ። 45ኤከምከላ ዎደ አኸን ኒለማ፥ 'ከምፀዬቆ ኤተም፥' ኤከምኦቻ ዋደ ኤያለማ ጋጉንዛ ከጋፋ፥ ከማጦሽ ኪልቆማኳ መፈማ፥ መሰማ መደኻኳ፥ 46ከምዌ አኤተማኳ ኖካ ኤተ ከምበፃን ዎደ አ መሳንዘሥ፥ ነአንጅ ኤተ በኤምኪል አኳ፥ ከምርካ በቦቆ መኸሣ፤ ኖከ መርሸማኳ ከምተጻ አ ከጸገ ደ መኤሚላ። 47"ዎደ ኤተ በገምካ ዳ ኤተ በኣጎካ ኤተማ ነጸገማ፥ ኤተ ከምበፃ መገሥ፥ መዳ ኤያሥ ቢያኣጎካ ነጸገማኳ፥ ከምኦቹዋ በቦቆ። 48በላ መገማን ዳ ኤተ በኣጎካ ኤተማ ነጸገማ፥ ኤተ ከምሸ ሥ ዳ ኤተ ከምሩካ በና ካ፥ ከምኦቹዋ ዱፀን። ነኤተ ቢከኸካ በበኽ፥ ከምለቁከሥ ከበበኽ ዳ፤ ነኤተ ቢከኸካ ነለአ በቦቆ፥ ከምለቁከሥ ከበቦቆኳ።" 49"ዳ በርኮከሥ አር ከመሬቆ ማንጃ ከኤባ ካል እኔያ፥ በርሄከሽ ኤበመግሰካኸንዥገን ማንጃ አኳ። 50ከምዳ ማጩጻቋ ካራ ከማጩጾቆ ማኣንሠሣ፥ ከምሳንዘርጎ ካሥ አል ኦከ ከምትታቆ አኳ። 51አኽኦከሥ በርዎኬ ከኤባ ካል እኔያ ከመጦ መጺጓኽ? እምበአ፥ በርከዎኬሥ አር ከመሬቆ መንሰኸማ። 52ከማኮዎቆ አጸጋ ማቁስ ነመፃ ነሜታ፤ ከምኮዎቆ አደ ኦካግ ደ እምበንድ፥ ደ እምበንድኳ ደ ኦካግ። 53ከማኮዎቆ አደ መፃ ሜተም በበማ ከዱማ፥ ዱማኳ ከበበማ፥ ኤዬማ ከደጎናለማ፥ ደጎናኳ ከኤዬማ፥ እሸማ ከገፈ ዱማ፥ ዬፈ ዱዋኳ ከማኮዎቆ ከእሸማ።" 54ያሱስ ቤከል ቤገሽ ከኤማንጀ ጸጋ ካ፥ "ኤበኸገምከሥ በኦቸኬጎ ኩንዱ ከንዶጎ እምፐ ኦካ፥ በኸከለካ ናሥ ኦካ ና 'ደማ ከምቻ፤' ኸገሻ ከምቻኳ። 55ኖከ ባሸካ አዙባ ከንዶጎ ኤላ ጉንዛ በኸከለካ፥ 'ከማኦካጎ፤' ኤያሥ ኤያኳ በደካ። 56አኻ ደ መሾጓ አለአ፥ በኸዪርካ ዳ አል እኔያ ካል ጎዛ በኻምባለከሥ ዳ ኤተ ከምዶጓ፤ ኤያበማ በኸከሃለሸን አኽ ማምባለሥ ዳ ኤተ ከምዶጎ ነግዣ ነለአ?" 57"ካሤ በኸከበፀናኽ መኸኸሥ አኻ ኪልቆኻ ኣባ ኤበደካ መዪዥሠማ? 58መኸኢ ነመዻ ነንዶዋ ኮጎ ኤተ መኸሣ፥ ኣገኻ ከጸጋ ኤተ በተምበኮቆ አም፤ ኤከምበፃ መዳ ኤለአ፥ ከምሮቆ አም ኮጎ ኤተ መኸሣ፤ ኤተ መኸሣኳ ከምኻ አም ከለጋዪዳ፥ ከምኩቆ ለጋዪዳኳ አም ከመፀ ማፉንጫ። 59ከመገሸርሥ ካም፥ ካሥ አል ኦከ ከምራሽ በና ኤተ በኢካ ነጸገኡ ኮዎማ፥ ከምፓሠኼ ኒል መፀ ማፉንጫኼ።"

will be added

X\