ገትገ ዪሁዳ 1

1ኤተ በቆተካ ገትጋ አለአ፥ አራ ዪሁዳ ዱዌበ ያይቆብ ኤተ በርደካ ከኤተ መደዳ አል ያሱስ ክርስቶስ። በርቆተካ ከደ በኦካ አረባ፥ ደ በኽኢካ ኒል ኤለ ማሄሻ አል ረባ በባ፥ ደ በኸዜካኽ ኒል ኤለ ያሱስ ክርስቶስኳ። 2ነፈጋኽ ካኻ ማገ፥ ከመገማ ከማሄሻኳ። 3ማሄሽ ኢዴበም! ከፄ መብዳ አል ኮዎኳ መርከኢ ነመሻምባ ነመቆተማ ካኻ፥ ኤበርመንዥገሥ አኻ ከሎርጋ ከለአ በኢካ ካራ ኤዳ ቤኢ አመደማ ነጸገም። ዥገኻ ቆስ ነመገሚላ ኤተ በበፀካ ማንዣይል፥ በኸኬ አረባ ከጸጋለማ። 4በኩኬንዥገን ከገጸፃ ከጂላለኻ ጸጋ ሜታ ሜታ፥ ደ በበፀካ ማገሳሥ ከረባ። ባገሸካሠንዥገን ካል ገፀ ነመዪዥሥ ሎርጋ መኸሣ ኤተ ከምዳ ነጸገ ሾከ ጸጋ ነለአ። እማም አለአ ነመከል ረባ ኤተ መገ፥ ቢያቆሸካሥ ከመአጀባ አል ለሙራ፥ ቢሽጠካ ኤቶኳ ያሱስ ክርስቶስ ኤተ በጨካ ካሥ ከጺማ ገፋሌያ ነጸጎኳ። 5በኸገምካ አኽ ዳ ኤተ በራኣጎካ መቆተማ እኽላ ካኻ ኮዎማ፤ ነደንኳ፥ በራኣጎካ ኤከምሳንዘኸሠን ከለአ። አኳ፥ ኤቤፔቆ ኤታ ሾካለማ እል ሜታ ነግብፅ ቤገርኽ እማም ነሲ ዎደ፥ ኤቤቴኽ ነንኳ ደ ቤበፅ መገሚል ካ። 6ሳንዘኸሥ ኤያሥ ኤያኳ ሰ ገትጋ አል ጎዛ፥ ደ ቢታጎ ነገፋሌያ ኤተ ቢኸኬ ከማም ቢበፀሽ ጎ መኢሻለማም። ኤከምኸከሥ ከማም ነበበሥ ኦካ፥ ቤከፉንጭ ረባ እማም ከሲያ አል ግዢ ግዥ ኒል መጓ። 7ማኤምኸሠኼ ኤያሥ ኤያ ዳ ኤተ ቤዶጎ ነጸገ ኤበ ሶዶም ከጎሞራ ከኤዬባ አል ጋንዲለማም ኮዎማ። ቢጦካ ጸጋለማም ገንሠ ዳ ኤያሥ ቢጦካ ሰ ገትጋ አ፥ ቢደካ ጎሲያ ከሾከ ለሙራ ኮዎማኳ። ከለአ ቤከጦ አረባ እማም ከመኮሥ ዳ ኤተ በከዜከኽ ጸጋ ጸገማም፥ ቤር ከማም መኸሥ ማንጃ አል ግዢ ግዥኳ። 8በሁለካ ጸጋ አለአ ኤያሥ ኤያ መእሰ መዥጋ ቢከዦጎከሥ ከለአ ጸገማም። ቢኮዎኮቆ ገፋሌ ረባ፥ ቢከሥ ደ በጨካ ገሂን ነጎዛኳ። 9ኤተ በደካ ጥስ ሰ ገትጋ አል ጎዛ፥ ሚካኤልኳ፥ ኤደንኼ ሾከ አለኣኼ። ኖከ ቢያከለም ከሴጠና ከፄ መሸ ሙሴ፥ ቤከከል "ነር ረባ በና ካም፥" ኤንዥጋይልኸንኼ አ ከመ ሴጠና ከከምኸሠማኼኳ። 10ቢካ እማም አለአ ዳ ኤተ ቢያሃለከሽ ማምባለሠማ፤ እማም ኤያል ደ ግዚያ ደ በከኢካ ካሥ መአጀባለማ፤ ከምቴዉካ እማም አለኣኳ ከመአጀባለማም ከለአ። 11እንዳዌ ከማም! ቢዸከንዥገን ነንዶ ቃይል፥ ነመሲያሣ ከለማና ቢኸከንዥገን ጸገማም ከጎልጎዘ ባለኣም፥ ኤያሥ ቤጦ ቆሬምኳ፥ ቢቴከንዥገን ከመገሽል ሰማም ነጸገ ረባ። 12ችዳ አለአ በላ መዪፁዋቆን መሰማለማም ከአኻ፥ ኤተ በንዦጎከሥ መሶጓለኻ ከማሄሻ። ቢሳንዘካ እማም ካሥ እልቆማም። እማም ኤግርቋ ናፉጭ ዙባ ናንዢግ ደማ፥ ኤጃ ናንዢግ ኸማ አል ኦከ ናኢንዝ ኸ ጃ፥ ኤጃ ናቼያሽ ከትማ፥ ናኸኤ ኤተ ናሻኳ። 13ቢፐኮቆ እማም ገንሠማ አል እለማም ኤያሥ መመኸ ኣያ፥ ናኦቻኽ ናጦን ፈኮተማ። እማም ኤቢዣ ናምፑ ኽ እንዶማ። በጦከሥ ረባ ከማም ካል ግዢ ግዥ ጎ መኢሻ አል መሃቲል መጓ። 14ሄኖክ ኤተ ቤድ ነገንዘ ሾከ ኣዳም ሥሠ በንድ፥ ቤገሽ መዪርጓ ከፄ ጸጋ አለአ ቤከልኳ፥ "ዪርኻ አኽ፥ ከማኮርኬቾጎ ኤታ ከበበኽ ሰ ገትጋ ኤተ ባንዢገካ ገንዘ። 15ከምኸሥ አ ነጸገጸጋ ነኮዎማ። ከምራ በና ነጸገ ደ ገንሣ ከፄ ገንሠ መደዳ ኮዎማ ኤተ ቢደካ እማም፥ ከፄ ገንሠ ገ ያ ኤተ በገሸካ ጸጋ ደ በበፀካ መኻ ገሂን ከረባ ነጸገ ረባኳ።" 16ሾከ ጸጋ አለአ ቢገሸኪል ሰማም ነዳ ነኮዎማ፥ ኢያገ ካይልኼ ከዳ ሜተልኼ። ቢሁለካ እማም መአጀባ አል በጫለማም። ቢባቸካ ከሰማም፥ ከምዸብ በና አል እልቆማምኳ ቢከቼቆ ቁንዘ ጸጋ ከገሻ ኤተ በገ ካ ኒል ፄያ። 17ማሄሽ ኢዴበም፥ አኻኸን ሳንዘኸሥ እገሻ ኤተ ቢገሸሥ አሰ ገትጋ አል ኤቶኳ ያሱስ ክርስቶስ ነገሲቋ። 18ቢገሸከሠንዥገን ካኻ ቢከለካ፥ "ኖከ መርሸማ ከምዌ ደ ማሲሠማ፥ ደ በሁለካ ገንሠ መአጀባ አል በጫለማም።" 19ከምሩዌቆ እማም መምጹሽ ጸጋ ነመገሚላ፤ ገሳንዛለማም አል ኤበ እኔያ፥ አኢካንኼ መዪዥሥ ገፉጫ ኒለማምኼ። 20ማሄሽ ኢዴበም፥ እንተጸኸኮቆ ደኾቆ ነሸማ ኤተ በኽኢከቾጎን አኽ ኖቆማ፥ ኤተ በደካ መዪዥሥ መገሚላለኻኳ። ዴረኻ ከመዥግ መዪዥሥ ገፉጫ። 21መሃተኻሠኼ ሜተል ነማሄሻ አል ረባኼ! ዜኸኽ ኤከምኻ ኤቶኳ ያሱስ ክርስቶስ ከመገለማ መኢያ አል ግዢ ግዥ ካኻ። 22ሌአኸካይል ከደ ባጤካይል ነመገሚላ። 23ፐኾቆ ጃጀንዳ፥ ገርዘኸኽ እማም ነማንጃ። ሌአኸካይል ከገጤያ ከጃጀንዳ፤ ነደንኳ፥ ኣቸከኸካኽ ካሥ ኣለማምኳ፥ ኤተ በንዦጎካሥ ከመአጀበ ለሙራ። 24ረባ ከምፈለሽ መዜኽ አኻ ኤከምበፀኻ መሥኻ። በጨካ መዥጋ ከመሮቆ አኻ ኮጎ ገሂንለማ ኤያል ደ ባንዢገካ ቆቆማ፥ ደ በከዪጨካቆ ከማገ ጓኳ። 25ኤተ በደካ ከጺማ ረባ፥ ኤተ በብደኮቆ አኳ ከንዶጎ ኤቶኳ ያሱስ ክርስቶስኳ፥ ነከድ ገሂን፥ መፈጋቋ፥ መዥጋ ከገፋሌያ ባጦከሽ ነግዣ ናል ገሲቋ፥ እኽላኳ ካሥ አል ግዢ ግዥኳ። ኣሜን።

will be added

X\