ወጌላ ዮሃንስ 3

1ቤኢ ጸጋ ኤተ ቢኦ ፄማ ኒቆደሞስ። አኳ ነሾከ ደ ፋርስ፥ ነደ መቼስ እንዶ ዶጎ ዪሁዳ ጸጋ ሜታ። 2ቤዌ ጸጋ አለአ ከመጎኳ ኮጎ ያሱስ ቤከከል፥ "ረቢ፥ ቢልገምካ ኤባዎኬ ኖጎ ረባ ባደካ ከኤተ መትገሥ ዳኳ፤ ኤከምኢያ ረባ ከአ ከመዳ፥ አኢካንኼ ጸጋ ሜተል ኤተ ከምፈለሽ መደ ዳ አል ገተምዛ ኤተ ባደካ አምኼ።" 3ቤከከል ያሱስኳ፥ "ኸገሻ ከምከለራ ካም፤ ኤከምበፃ ጸጋ ማኮላይል መፖቆማ፥ ከምፈለሸኼ መገመሥ ገፋሌ ረባኼ።" 4ቤከኮሎቆ ኒቆደሞስኳ ቤከከል፥ "ጸጋ ኤተ ባጋዘካ፥ ኤያበማ ከማፈለካሸን አን መፖቆማ? ከምኮላ ኪል ኤዬማ ከማኮሉዊለን መፖቆማኽ?" 5ቤኮሎቆ ያሱስኳ ቤከከል፥ "ኸገሻ ከምከለራ ካም፥ ኤከምበፃ ጸጋ መፓኽ ነኣያ ከመዪዥሥ ገፉጫኳ፥ ከምፈለሸኼ ሜታ ኤላ መኩ ከገፋሌ ረባኼ። 6ጸጋ ኤተ ቢፖቆካ ነበጫ ኣሥ በጫ፤ ኤተ ቢፖቆካ ነገፉጫኳ አል ገፉጫ። 7ካ፥ ከምዳ ካኻ ኤከማኮለኺል መፓኻ ኤተ በርከለካ፥ መሰሠኼ እሉኼ። 8ባሸከኽ ዙባ ካሥ ጎ በኣጎካ፤ ባገሰኮቆ ማሸማ፥ ኣገምኪልኼ ኤበዎኬ ነጓብ ጎ በዸከኻኳ። ኤተ ቢፖቆካ ነገፉጫ ኮዎማኳ ኤያሥ ኤያ።" 9ኒቆደሞስ ቤከል ቤሎቆሥ ያሱስ፥ "ኤያላሥ ከማፈላሽ አለአ?" 10ቤከኮሎቆ ያሱስኳ ቤከከል፥ "ማከድ ከኤተ መትገሥ ዳ አል ዶጎ እስራኤል፥ ኣገምካኼያኽ አለአ? 11ኸገሻ ከመገሸርሥ ካም፥ ቢለገሸከሥ አይል ኤተ ቢልገምካ፥ ቢልደካ ከኸገሻ ከኤተ ቢልገምከሣኳ፤ አኻኸን አኸርኮቆኼ ኤተ ቢልከደካ አይል ኸገሻኼ። 12ኤበርገሸከሥ ካኻ ዳ አል ኤበ እኔያ ኤበኸበፀካ መገሚለማኳ፥ ኤያላሥ ከምገመኺለን አኽ ኤከመገሸርሥ ካኻ ዳ አል ጎዛኳ? 13ኣሥ ዱ በናደማ ኤተ በብተኬ ነጎዛ፥ አኢካንኼ ኤተ በቶኮካ ከጎዛ ሜተል ኤለኣኼ። 14ኤያሥ ቤፈሮቆ ሙሴ ሆላ ነኸ እኔያ፥ ከምደካ ከዱ በናደማኳ ማፈራቋ ኤያሥ ኤያ። 15ከምደካ አለኣኳ፥ ኤተ ከምገሚል ከአ ኮዎማ ኤከምዸባን መኢያ አል ግዢ ግዥኳ። 16"ረባ ከፄ በሄከሽ ኤባ አል እኔያ በቦቆ፥ በኸኬ ሜታኽ ዱማ፤ ካ ኤተ ከምገሚል ከዱማ ኮዎማ፥ ከምራቆሥ መኢያ አል ግዢ ግዥ፥ ከምቴያኼ ሜተልኼ። 17ዳ በከትገኬሥ ረባ ዱማ ከኤባ ካል እኔያ፥ ኤከምብደካን ኤባ አል እኔያ፥ አትገኬንኼ ኤከምኸከሥ ከኤባ ካል እኔያኼ። 18ከምኸካሠኼ ከኤተ ከምገሚል ካ፤ በከኸካሠንዥገን ከኤተ በበፀካ መገምኪል ካኳ፥ ከፄ በበፀካ መገምኪል ከሜታኽ ዱ ረባ። 19መኸሣ ኤኤለአ በኢካ፤ መዪዦጓ በዎኬ ከኤባ ካል እኔያ፤ ጸጋኸን ከፄ በደካ መደዳለማም ገንሠማኳ፥ ነመዪዦጓ ቢሄከሽ መጓ። 20ኤተ በደካ ገንሣ ኮዎማ አሄከሸኼ መዪዦጓኼ፤ ኤከምበፃን ማገማሥ ገንሠ መደዳለማ፥ አፐከሠኼ ከመዪዦጓኼ። 21ኤተ በጦካ ኸገሻኸን፥ ከምፐሥ ከኸ መዪዦጓ፤ መዌያለማ ከኸ መዪዦጓኳ ኤከማትገካሠን መደዳለማ ኤማሄሻ አል ረባ።" 22ነለአ ነቸቻ ቤከዸቾጎ ያሱስ ከደ መሁል ቾጎማ ከኤባ ካል ዪሁዳ፤ ቤፀቆ ነጓኳ ዱፀን፥ ቤንጩጾቆ ጸጋ። 23ቤኢ ዮሃንስኳ ኖጎ ቤኢ በበኽ ኣያ፥ ነኤበ ሄኖን ኤተ ቤያርቻቆ ከሳሌም፥ ቤኢ ነመንጩጾቆማ፤ ቤዾዌ ጸጋኳ ከጓ ቢንጩጻቋ። 24ኖካ ና ኢኩቆንኼ ዮሃንስ ከመፀ ማፉንጫኼ። 25ኖካ ና ነደ መሁል ቾጎ ዮሃንስ ሜታ ሜታ ከመዣ አል ዪሁዳ ሜታ፥ ቤፈር ኖጎማም ማከለማ ከፄ መንደ መዪዥሣ። 26ቤዌ ደ መሁል ቾጎ ዮሃንስኳ ኮጎማ ቢከከል፥ "ኤተ መትገሠማ፥ መዣ ኤተ በናኢዬ ካም ነጋንደር ዮርዳኖስ፥ ኤተ ናከድ አም ኸገሻ ከፄማ፥ በጩጸኮቆ እኽላ፤ በዸካ ጸጋ ኮዎማኳ ኮጎማ።" 27ቤከኮሎቆ ዮሃንስኳ ቤከል፥ "ኤከማኸካዬሽ ከጸጋ ነጎዛ ከመዳ፥ ከምፈለሸኼ ሜታ ኤላ መሮቆማኼ። 28አራ ቢያርሲኬቆ መትገማ ካ፥ 'አራ መሲያኼ' በርከለካ ኤበርገሸከሥ ከኻ፥ አኻ እልቆኻ ከምፈለኸሽ መደኻ ኸገሻ ካራ። 29ጸጋ ኤተ በጨካ ጋኺንጃ፥ ርኸ ጋኺንጃ፤ መዠማ ኤተ በኢከቾጎ ኖጎማ በካጦኪል ፄያ፥ በካገ ካይል ኤበገሰኮቆ ሰ ርኸ ጋኺንጃ፤ ከለአ እኽላ በትተካቆንዥገን ማገ ጓለም።" 30ቤከል፥ "ከምደካ ከአ አመፈጋኳ፥ አራኸን ከምዳ መሃላቋ ካራ።" 31ቤከተጽ ዮሃንስ ቤከል፥ "ኤተ ከምዌ ነምጻ፥ ከምሙቾቆ ነጸጋ ነኮዎማ፤ ኤተ በደካ ነኔያ ኣሥ አል እኔያ፥ ከመገሻ አል ኤበ እኔያኳ፤ ኤተ ከምዌ ነጎዛ ከምሙቾቆ ነኮዎማ። 32ከምዳ ኸገሻ ከዳ በገምከሥ በገሰኮቆኳ፤ አኢካንኼ ኤተ ከምሮቆ መደ ኸገሻለማኳ። 33ኤተ ከምሮቆ መደ ኸገሻለማኸን፥ ከመገሸከሥ ዝንዜን ኤበደካ ረባ ከኤተ ኸገሻ። 34ኤተ በትገኬ አረባ ከመገሸከሥ ኣሥ እገሸ ረባ፤ ከምኻ ረባኳ ገፉጫለማ ከመዪጮቆማ ካ። 35በበማ በሄከሽ ዱማ፥ በኸከንዥገን ዳ ኮዎማኳ ከኤለ ዱማ። 36ጸጋ ኤተ ከምገሚል ከዱ ረባ፥ ከምጫ መኢያ አል ግዢ ግዥ፤ ኤተ ከምኮዎቆ ዱማኸን ከምጫኼ መኢያኼ፥ ከምኢያ ማመሠ ረባ ነጸገማ።"

will be added

X\