ወጌላ ዮሃንስ 2

1ነኦኪል ኦካግኳ ቤድ ዴዋነ ማሮቋ ነጋጦቆ ገሊላ ነኤባ ኤተ ቢኦ ቃና። ቤኢ ኤዬማ ከያሱስኳ ነጓ። 2ቢኦ እምያሱስ ከደ መሁል ቾጎማኳ ኪል ዴዋና ካ። 3ኤበከርካ አኬ ባጉዋኳ፥ ቤከከል ኤዬማ ከያሱስ፥ "ኢጨካንኼ ነለአ ከገት ኬ ባጉዋኼ።" 4ቤከኮሎቆ ያሱስኳ ቤከከል፤ "አም እገፋ አለአ፥ ኣሤ በኩኬቆ አም ነመደዳ ናለማ? አርቸካዬቆንኼ አንጅለምኼ።" 5ቤከል ኤዬማኳ ከደ መደዳ ደ ቢኢካ ነጓ፥ "ደኻ ኣሥ ዳ ኤተ ከመገሸሥ አ ካኻ።" 6ቤጭ ዶጎ ዪሁዳ መኢያ አል በፈገማም ኤከምዪዡከሥ ጸገማም፤ ካ ቤኢ ነጓ አኮገ ግሻ ማያ፤ በሰከሥ ኮጋ አ ሜታ ሜታማለማም ኤቁለ ኣያ እምበንድ ኤያሥ ኤያ ኦካግ። 7ቤከከል ያሱስኳ ከደ መደዳ፥ "ዪጨኾቆ ኣያ ነኮጋ ነለአ።" ቢዪጮቆን እማምኳ ካሥ ኸ ቆሰማ። 8ነለአ ነቸቻ ቤከከል ያሱስ ከደ መደዳ ካ፥ "ኽልኾቆ ኸኸካ ከኤተ መዪር ዴዋና፤" ቢከርኮቆ እማምኳ። 9ቤዻምበሥ ኤተ መዪር ዴዋናኳ ኣያ ኤተ ባገልበካኽ ከኬ ባጉዋ። ኤተ ቤያገሚል ነጓብ ኤበዎኬ ኬ ባጉዋኳ፥ አደ መደዳ ደ ቤኽሎቆ ኣያ፥ ኤያገሚለንኼ አኼ። ካ ቤኦ ርኸ ጋኺንጃ ቤከከል፤ 10"ጸጋ ኮዎማ ነገሲቋ ከምኻ መገ  ኬ ባጉዋ፤ ኤከምኖቆ አኮዶ ነቸቻኸን፥ ከምኸካ መጤኽ ኬ ባጉዋ፤ አምኸን ከደኽላ ባቱገከሥ መገ  ኬ ባጉዋ።" 11ነዳ አል ገተምዛ ኤተ ቤድ ያሱስ፥ አለአ አል ገሲቋ። ቤጦ አ ነቃና አል ገሊላ፥ ቤትገሥ ገሂንለማኳ፤ ቤከገሚል ደ መሁል ቾጎማኳ ካ። 12ነለአ ነቸቻ ቤብት ያሱስ፥ ከኤዬማ ከኢዴበማ ከደ መሁል ቾጎማኳ ከቅፍርናሆም፤ ቢዥጎቆ ነጓኳ ኦኪል ዱፀን። 13ከፄ ቤያርቻቆ ዚፈ ፋዝጋ አል ዶጎ ዪሁዳ፥ ቤቶኮ ያሱስ ከዬሩሳሌም። 14ቤገመሥ ያሱስ ኒል መዪዥሥ መፀ ገዴራ አል ዶጎ ዪሁዳ ጸጋ ደ በንኮደኮቆ ዋደ ሙሳ፥ ጃጃ ደራሪያኳ፥ ከደ ቤማኢሽ ነጓ ቤንዠኽ ለማናኳ። 15ቤጽንፀኽ አኳ ሲ መዱቋ ቤከምፖቆ ኬያኮዎማም ጃጃለማም ከዋደ ሙሳለማምኳ፥ ቤዝልኽ ለማን ደ መንዠኽ ለማና ቤያገልብዶቆ ኣንዠ ኻለማምኳ። 16ቤከል ከደ መኮዶቆ ደራሪያኳ፤ "ፐኾቆ ዳ አለአ ከገት! መጦኻኼ መፀ ባብ ከመፀ ዘበኼ።" 17ኖካ ና ቢሳንዘሥ ደ መሁል ቾጎማ ሳ ኤተ በከለካ አመዪዥሥ ሎርጋ፥ "መሻምባለም ከመፃሉ ኤያል ማንጃ በሰካቆ ኒለም።" 18ነለአ ቢከል ደ ገፋሌ ዶጎ ዪሁዳ ቢሎቆሥ ያሱስ፥ "ኤከምዳ ካም አመደ ሾከ አለአ፥ ማቲሥ ገፋሌ ኣሤ ከምትጋሥ ካይላ?" 19ቤኮሎቆ ያሱስኳ ቤከል ከማም፤ "ብኾቆ መዪዥሥ መፀ ገዴራ አለአ፤ አራኳ ነኦኪል ኦካግ ከምኮለራ ከምደሮቆ።" 20ቢኮሎቆ እማምኳ ቢከል፤ "መዶቆ መዪዥሥ መፀ ገዴራ አለአ በርከሠንዥገን ግዣ ግቸማ እምበንድ ከማያ፤ አምኳ ነኦኪል ኦካግ ከምኮላቆ ከምዳቋኽ?" 21ያሱስኸን ኖከ ቤገሸሥ ከፄ መዪዥሥ መፀ ገዴራ፥ ቤገሸሥ ከፄ ጸገማኳ። 22ኖከ ቤፈርሥ አያሱስ ነመሻ ነቸቻ ቢሳንዘሥ ደ መሁል ቾጎማ እገሻለማ አለአ፤ ቢገሚል ዳ ኤተ በከለካ አመዪዥሥ ሎርጋ ከዳ ኤተ ቤገሸሥ አያሱስኳ። 23ኖከ ቤኢ ያሱስ ነዬሩሳሌም ከዚፈ ፋዝጋኳ፥ ቤገመሥ አበበኽ ጸጋ ዳ አል ገተምዛ ኤተ ቤድ አ፥ ቢከገሚል ካ። 24ከፄ ቤያገሚል ያሱስ እል ጸጋ ኮዎማኸን፥ ኤዠሰንኼ ጸገማ ከማምኼ። 25ከፄ ቤገም አ ከጺማ አል እል ጸጋ ኮዎማ፥ ኤሼሠንኼ ኤከመገሹከሥ ከፄ ጸጋ ሜታ ኤለኣኼ።

will be added

X\