ወጌላ ዮሃንስ 17

1ኤቤገሸሥ ያሱስ አለአ ነቸቻ፥ ቤዪርጎ ከጎዛ ቤዴር ቤከል፥ "ባብ፥ ባርቸካዬቆንዥገን አንጅ ማ፤ ኤከምሂንሠን ዱኡ አም፥ ትገሥ አምኳ ገሂን አል ዱኡ። 2ኤያሥ ባከኸካ አም ገፋሌያ ነጸጋ ነኮዎማ፥ ነከኽ አኳ መኢያ አል ግዢ ግዥ ከደ ባከኸካ አም ካ። 3አለአ መኢያ አል ግዢ ግዥ፥ ኤከምገማ ጸጋ አም ረባ ኣሥ ሜተም ኤተ ኸገሻ፥ ከኤተ ባትገኬ አም ያሱስ ክርስቶስኳ። 4በርሂንከሥ አም ነኤባ ናል እኔያ፥ በርትተኮቆንዥገን መደዳ ኤተ ባኸኬ አም ካራኳ። 5ባብ! ገሂን ኤተ ቤርጭ ነጉ ነከምዘዛመን ኤባ አል እኔያ፥ ሂንከሥ እኽላኳ አራ ነጉ ካሥ ከገሂን ከለአ።" 6"በርከቲከሠንዥገን ፄኡ ከጸጋ ከደ ባኸኬ አም ካራ ነኤባ ናል እኔያ። እማምኳ ቢኢ አሉ፥ ባኸኬ አምኳ ካራ፤ ቢዜከኸንዥገን እማምኳ እገሻሉ። 7ቢገምከንዥገን እኽላኳ ዳ ኤተ ባኸኬ አም ካራ ኮዎማ፥ ኤበደካ ከንዶገኡ። 8በርኸከንዥገን እገሻ ኤተ ባኸኬ አም ካራ ከማም፥ ቢርኮቆንዥገን እማምኳ፤ ቢያምባለከሥ መዌያለም ነጉ ኸገሻ፥ ቢገምኪል ኤባትገኬ አራኳ። 9"በርዴረካ ከማም፥ አርዴረካኼ ከኤባ ካል እኔያኼ፤ በርዴረካ ከደ ባኸኬ አም ካራ ኮዎማ፥ ከፄ ቢደካ ካሉ። 10ኤተ በደካ አለም ኮዎማ ኣሥ አሉ፤ ኤተ በደካ አሉኳ አለም፤ ከማትጋሥ ገሂንለም ከንዶጎማም። 11ከምኢራኼ ነለአ ከገት ነኤባ ናል እኔያኼ፤ እማምኸን ቢኢካ ነኤባ ናል እኔያ፤ አራኳ ከምዎሬ ኮገኡ። አም መዪዥሥ ባብ፥ ዜኽ እማም ከፄኡ ከኤተ ባኸኬ አም ካራ! ኤያሥ በኮደካ አኮ ሜተም፥ ኒድ እማምኳ ሜተም። 12ካሥ አል ኦከ በርኢኬ ኖጎማም፥ በርዜከኽ እማም ከፄኡ ከኤተ ባኸኬ ካራ፤ በርዜከኽ እማም ነገንሠ ዳ። አኢካንኼ ኤተ በቴካ ነማም ሜተልኼ። በከደካ አለአ ኤከምትታቆን ሰ መዪዥሥ ሎርጋ ኤተ በከለካ፥ 'በቴካ ኣሥ ኤተ በኢካ ከምቴያ።' 13እኽላኸን ከምዎሬ ኮገኡ፤ ኤከምጩሸን እማምኳ ማገ ጓለም በቦቆ ኒለማም፥ ከመገሸርሥ እገሻ አለአ ነኤባ ናል እኔያ። 14በርኸከንዥገን እገሻሉ ከማም፤ ኤያሥ በርበፀካ አር መደራ ካል ኤበ እኔያ፥ እማምኳ አል ኤበ እኔያኼ፤ ከለአ በካቸከካኽ ጸጋ አል ኤበ እኔያ ከማም። 15በርከሎቆከሥ አም ኤከምዜያኽ እማም ነገንሠ ዳ፥ አርሎቆከሠኼ አም ኤከምራቆ እማም ነኤባ ናል እኔያኼ። 16ኤያሥ በርበፀካ አር መደራ ካል ኤበ እኔያ፥ እማምኳ አል ኤበ እኔያኼ። 17እገሻሉ ኸማ፤ ዪዥከሥ እማም ከኸገሻ። 18ኤያሥ ባትገኬ አራ ከኤባ ካል እኔያ፥ ኤያሥ ኤያ በርትገካ አርኳ እማም ከኤባ ካል እኔያ። 19ኸገሻ ኤከምዱዋን እማም ካሉ፥ ከምኸራ አርኳ ጺም ኤደ መኻ ከፄማም።" 20"በርከዴረካ ከደ ከምገሶቆ እገሻለማም ከምገሙዊለን ካራኳ፥ አርዴረካኼ ካሥ ደ መሁል ቾጎም ከለኣኼ። 21ኤተ በርከዴረከሥ አርኳ፥ ኤከምዱዋን ኬያኮዎማም ሜተም፤ አም ባብ ኤያሥ ባኢካ አም ከአራ፥ በርኢካ አር ካምኳ፥ ኒኢ እማምኳ ካኳ፥ ኤከምገሚለን ጸጋ አል ኤበ እኔያ ኤባትገኬ አም አራ። 22በርኸከንዥገን ከማም ገሂን ኤተ ባኸኬ አም ካራ፤ ኤያሥ በኮደካ አኮ ሜተል፥ ኒድ እማምኳ ሜተል። 23አራ ከማም፥ አምኳ ኤያሥ ባኢካ ከአራ፥ ኒድ እማምኳ ኣሥ ሜተም፤ ባትገኬ ኤያሥ ባሄከሽ አራ፥ ኤባሄከሽ ኤያሥ ኤያ ደ በደካ ካለምኳ፥ ኒገም ጸጋ አል ኤበ እኔያ። 24ባብ! ደ ባኸኬ አም ካራ ኮዎማ በራኣጎካ ኤከምኢዋን ከአራ ኖጎ ከምኢራ አርኳ፤ ኒገመሠን ገሂንለም ኤተ ባኸኬ አም ካራ፥ ከፄ ባሄከሽ አራ ነከምዘዛመን ኤባ አል እኔያ ነገሲቋ። 25ገሸል ባብ! አገምካኼ ኤበ አል እኔያ አምኼ፥ አራኸን በርገምካ አም፤ ቢያምባለከሠንዥገን እማም አለአ ኤባትገኬ አም አራ። 26በርትገከሠንዥገን ፄኡ ከማም፤ ከምትገርሥ እኽላኳ፥ ኤከምኢያን ማገኻ ኤተ ባከሄከሽ አም አራ ኒለማም፥ ኤከማኢርካን አርኳ ከማም።"

will be added

X\