ወጌላ ዮሃንስ 14

1ያሱስ ቤከል ከደ መሁል ቾጎማ፥ "ማሰሲኻይልኼ፥ ገመኺል ከረባ ገመኺል ካራኳ! 2ኒል መፀ ባብ በኢካን ኤማንጀ ጎ መኢሻ፤ ኤበምበፀካ መዳ ኤለአ፥ በርምከለካኼ፥ ከምዸራ ዻ እገሬሥ ጎ መኢሻ ካኻ። 3ኖከ ከምዸራ ከመገሬሥ ጎ መኢሻ ካኻ ነቸቻ፥ ኤከምኢኻን አኽኳ ኖጎ ከምኢራ አር፥ ከምኮለሬ ከምርዾቆ አኻ ኮጎም። 4ኮጎ ከምዸራ አር፥ ከምገመኻ እንዶዋ ኤተ ከምሮቆ ከጓኳ።" 5ቤከል ቶማስኳ፥ "ኤታ! ኢልገምካኼ ከጓብ ኤከምዻኣ፤ ካ ካሥ ከማገሚልኪለን አይል እንዶማ?" 6ቤከኮሎቆ ያሱስኳ ቤከል ኤለአ፥ "እንዶዋ፥ ኸገሻ መኢያኳ ኣሥ አራ፤ ኤከምበፃ መዳ ከንዶጎም፥ አኢካንኼ ኤተ ከምዌ ኮጎ ባብ ሜታ ኤለኣኼ።" 7ቤከል፥ "በኸመገምካ አራ፥ በኸመገም ባብኳ፤ እኽላ በኸገምካ አ፥ በኸገምከሠናኳ።" 8ቤከከል ፍልጶስኳ፥ "ኤታ! ትጌሥ በባ ካይላ! ኣሥ አ ከምትታ ካይላ።" 9ያሱስኳ ቤከል ቤከኮሎቆ፥ "አም ፍልጶስ! በኮከኢን መዱጎክ ኖጎ ሜታኳ፥ ኣገምካንኼ አራኽ? ኤተ በገምከሥ አራ፥ በገምከሠንዥገን ባብኳ። ካሤ ባከከለካን አም 'ትጌሥ በባ ካይላ?' 10አራ ከባብ፥ ኤበኢካ ባብኳ ከአራ፥ ኣገምኪልኼያኽ? ባብ ኤተ በኢካ ከአራ በደካ መደዳለማ፤ አርርኬቆንኼ ኒልቆም ዳ ኤተ በርገሸከሥ ካኻኼ። 11አራ ከባብ፥ ኤበኢካ ባብኳ ከአራ፥ ገመኺል አራ! ኤበኸበፀካ መገመኺለን ከገሻለምኳ፥ ገመኺል ከፄ ጋገሸል መደዳለም። 12ኸገሻ ከምከለራ ካኻ፤ ጸጋ ኤተ ከምገሚል ካራ፥ ከምዳ ገሸል ዳ ኤተ ከምደራ ኮዎማኳ፤ ከፄ ከምዸራ ኮጎ ባብኳ፥ ከምጦዋ ኤተ ከመንተሮቆ ነለአ። 13ኤከምዸባ ባብ ገሂን ከንዶጎ ዱማ፥ ከምትተሮቆ ካሥ ዳ ኤተ ከምዴረኸካ አኽ ከፄም። 14ኤከምሎቆኻ ዳ ሜታ ከፄምኳ፥ ከምትተሮቆ አርኳ።" 15ቤከተጽ ያሱስ ቤከል፥ "ኤከምሄኸሽ አራ፥ ከምዜኸኽ ማቶቋለምኳ። 16አራ ከምዴርዻ ባብ፥ ከምኼ አኳ ካኻ ጀንዳ ኤተ ከምኢያ ኖጎኻ ካል ግዢ ግዥ፥ ኤተ ከመንዥገሥ አኻኳ። 17አ ገፉጨ ኸገሻ፤ ከፄ በኤምከሥ ኤባ አል እኔያ አ በኤምካኳ፥ ከምፈለሸኼ መሮቆ አኼ፤ አኻኸን በኸገምካ አ፥ ከፄ ከምፀቆ ኖጎኻ ከምኢያ ኒልኻኳ። 18አራ ከምበፀርሸኼ አኻ ካሥ ከጺኻኼ፥ ከምኮለሬ ከምዎሬ ኮጎኻ። 19ኖካ ዱፀን ነቸቻ ከምገመሠኼ ጸጋ አል ኤበ እኔያ አራኼ፤ አኻኸን ከምገመኸሥ አራ፥ ከፄ ከምኢራ ከምኢኻ አኽኳ። 20ኖካ ና ከምገመኻ ኤበርኢካ አር ከባብ፥ አኻ ከአራ፥ ኤበርኢካ አር ከአኻኳ። 21ኤተ ከምሮቆ ማቶቋለም ከምዜኽኳ፥ ከምሄሽ አራ፤ ኤተ ከምሄሽ አራኸን፥ ከምሄሽ አባብኳ፤ ከምሄርሽ አርኳ አ፥ ከምትገርከሥ ጸገምኳ።" 22በላ መዳን ዪሁዳ አስቆርቱ፥ ቤከል ዪሁዳ ጀንዳ፥ "ኤተም! ካሥ ባካኣጎካ አም መትጋሥ ጸገኡ ካሥ አይላ፥ ናከምትገሠን ከኤባ ካል እኔያኳ?" 23ያሱስ ቤኮሎቆ ቤከል፥ "ኤተ ከምሄሽ አራ ከምዜኽ እገሻለም፤ ባብኳ ከምሄሽ አ፥ ከምዎዪሌ አይልኳ ኮጎማ ከምኢላ ከአ። 24ኤተ በበፀካ መሄሽ አራኸን፥ ከምዜኸኼ እገሻለም፤ እገሻ ኤተ በኸገሰኮቆ አኽ፥ አል ኤተ በትገኬ አራ አል ባብ፥ አለምኼ።" 25ቤከተጽ አያሱስ ቤከል፥ "መርኢ ኖጎኻ፥ በርገሸከሠንዥገን አለአ ኮዎማ ካኻ። 26ኤተ ከመንዥገሥ አኻ፥ መዪዥሥ ገፉጫ፥ ኤተ ከምትጌ አባብ ከፄያ ካለምኸን፥ ከምትገሥ ዳ ኮዎማ ካኻ፥ ከምጦዋ ኤከምሳንዘኸሥ ዳ ኤተ በርገሸከሥ ካኻ ኮዎማኳ። 27ከምበፀርሽ መገማ ኖጎኻ፥ ከምኸራ መገማለምኳ ካኻ። ከምኸራኼ ካኻ ኤበኸካ ኤባ አል እኔያኼ፤ መንደኻ ቁንዘኼ፥ ማሰሲኻይልኼኳ! 28በኸገሰኮቆንዥገን ኤተ በርከለካ ካኻ፥ 'አራ ከምዸራ፥ ከምኮለሬ ከምዎሬ ኮጎኻ፤' በምኢካ በኸመሄከሽ አራ፥ በኸማገይል ኤከምዸራ ኮጎ ባብ፤ ከፄ ባብ በንተርኮቆ አራ። 29ኤከምገመኺለን ኖከ ከምዳ፥ ነከምደን አ በርሲኮቆ አለኣኳ በርገሸከሠንዥገን ካኻ። 30ከፄ በኢካ ጥሳ አል ኤበ እኔያ አለአ ነመዌያ፥ ከምተጸራኼ ነለአ ከመገሸርሠኼ በበኽ ዳ ካኻኼ፤ ነደንኳ አጨካኼ መዥጋ ነጸገምኼ። 31ናገሚል ኤባ አል እኔያ ኤበርሄከሽ ባብ፥ ኤከምደራ ዳ ኤተ በገሸከሥ ካራኳ።" ቤከል፥ "ፈርኸሥ፥ ፐኮሥ ነገአ።"

will be added

X\