ወጌላ ዮሃንስ 10

1ያሱስ ቤከል፥ "ኸገሻ ከመገሸርሥ ካኻ፥ ጸጋ ኤተ ከምበፃ መኩ ኪል ኽ ጃጃ ነግሰማ፥ ከምኩ ከንዶ ጀንዳ፥ አ ገልኳ ኤተ ማጎዠማኳ። 2ኤተ መኩ ከንዶ ግሰማኸን፥ አ ኤተ መሸል ጃጃ። 3ከምኮርከስ ኤተ መዜስ ኽ ካ፥ ከምገሲልስ ጃጃኳ ኤተ መሸላ፤ ከምኦዋ ጃጃ ደ በደካ ካለማ ከፄማ ከፄማ፥ ከምፖቆኳ። 4ኤከምፖቆ ጃጃለማ ኮዎማ ነቸቻ፥ ከምቼስ እንዶዋ ከማም። ከምሁሉ ቾጎ ጃጃኳ ከፄ ቢገሰኪልስ አ። 5ከፄ ቢፂጅኪልስ ጀንደ ጸጋ፥ ከምዱጉዋ ከምሁሉ ቾጎኼ።" 6ቤገሸሥ ያሱስ መኮሣ አለአ ከማም፤ ኢያምባለሠንኼ እማምኸን ዳ ኤተ ቤገሸሥ አኼ። 7ቤከተጽ ያሱስ ቤከል ከማም፥ "ኸገሻ ከመገሸርሥ ካኻ፤ አራ ግሰ ኽ ጃጃ። 8ደ በሲኬቆ በዎኬ ካራ ኮዎማ ገልኳ ደ ማጎዠማኳ፤ ኢገሰኮቆንኼ ጃጃኸን ከማምኼ። 9አራ ግሰማ፤ ኤተ ከምኩ ከንዶጎም ከምብዳ፥ ከምኩ ከምፐሥ፥ ከምዸባ መሸሎጓኳ። 10ዳ ከምዎኬሥ ገልኳ፥ ከመሎኮማ ከመሽ ጺማ፥ ካሥ መቴሠማኳ፤ ዳ በርኮኬሥ አርኸን፥ ኤከምጩዋን መኢያ፥ ኤከምኢዋን ገሸልኳ።" 11ያሱስኳ ቤከል፥ "አራ ገሸል ኤተ መሸላ፤ ገሸል ኤተ መሸላ ከምኻ ጺማ ከፄ ጃጃለማ። 12መዣ ኤተ በበፀካ መዳ ጃጃ ካለማ፥ ኤተ ቢኮደከሥ ከለማና፥ ኤኤለኣኼ። ኤከምዌ ዬላዉዋ፥ ከምበፀሽ ጃጃ ከምዱጓ፥ ከምዞኳ ዬላዉዋ ጃጃ ከምዝልኽ ጃጀንዳኳ። 13ከምዱጓ መዣ አ ከፄ ቢኮደከሥ ከለማና፥ ከምእሰካይልኼ ከጃጃኼ። 14አራ ገሸል ኤተ መሸላ፤ በርገምካ ጃጃለም፥ በገምካ ጃጃለምኳ አራ፥ 15ኤያሥ ቢላገምካ ከባብኳ። ከምኸራ አርኳ ጺም ከፄ ጃጃለም። 16በርጨካ ጃጃ ጃጀንዳኳ፥ ደ በበፀካ መኢያ ነኽ ነለአ፤ ከምዳ ካራ አመብቆቆ እማምኳ፤ ከምገሱዊልስ አራ፥ ከማዉዋሽ ጎ ሜታ፥ ከምዳ ኤተ ከምሸላ እማምኳ ኣሥ ሜተም። 17በሄከሽ ባብ አራ፥ ከፄ ከምኸራ ጺም፥ ኤከምኮለሬ ከምርዾቆንኳ። 18ከምኸራ ጺም ከማሄሸማለም፥ አኢካንኼ ሜተል ኤተ ከምቼሥ መኢያለም ነጸገምኼ፤ በርጨካ ገፋሌያ ከመኸ ጺም ከመኮሎቆማኳ፤ ኤተ በገሸኬሥ አባብ ካራኳ፥ ኣሥ አለአ።" 19ከፄ እገሻ አለአ ቤምጹሻይል ዶጎ ዪሁዳ እኽላኳ። 20ቢከል ነማምኳ ጸጋ በበኽ፥ "በጨካ ገንሠ ሙሳ ኒለማ፥ ባሜለካቆንዥገና፤ ካሤ በኸከካጦኪል ፄያ?" 21ቢከል ጃጀንዳኳ፥ "ጸጋ ኤተ በጨካ ገንሠ ሙሳ ከምፈለሸኼ መገሸሥ ሾከ እገሻ አለኣኼ።" " ከምፈለሽ ገንሠ ሙሳ መኮርስ ኸ ፐሻኽ?" 22ኖካ ና ቢሂንሥ ነዬሩሳሌም ዚፈ ፂን መዶቆ፤ መዪዥሥ መፀ ገዴራ አል ዶጎ ዪሁዳ፤ አንጅ ማኳ መደማ። 23ቤኮለኽ ያሱስኳ ኒል መዪዥሥ መፀ ገዴራ ኒል በዝልኽ ሶሎሞን። 24ቢያንዲቆ ዶጎ ዪሁዳኳ ያሱስ ቢከከል፥ "ካሥ አል ኦካብ ከመንቱጋኽ እለምላ? ኤባደካ መሲያ ዪዥሥ፥ እገሼሠና ካይላ!" 25ያሱስኳ ቤኮሎቆ ከማም ቤከል፥ "በርገሸከሠንዥገን አር ካኻ፥ አኻኸን አኸገምኪልኼ፤ መደዳ ኤተ በርደካ አር ከፄያ ካል ባብ፥ ከምዳ ኸገሻ ካራ። 26አኸገምኪልኼ አኽኳ፥ ከፄ በኸበፀካ መደኻ ከጃጃለም። 27ጃጃለም በገሰኪልስ አራ፤ አራ በርገምካ እማም፥ እማምኳ ከምሁሉ ቾጎ አራ። 28አራ ከምኸራ ከማም መኢያ አል ግዢ ግዥ፤ እማም ከምቴዉዋኼ ሜተልኼ፥ ከምሦኼ ጸጋ ሜተልኳ እማም ነኤለምኼ። 29ኤተ በኸኬ እማም ካራ ባብ በንተርኮቆ ነኮዎማ፤ ሜተልኳ ከምፈለሸኼ መሦ እማም ነኤለ ባብኼ። 30አይላ ከባብ ኣሥ ሜተል።" 31እኽላኳ ቤፈሮቆ ዶጎ ዪሁዳ ግሻ ኤከምኣምብካ ከምሹኮቆ ያሱስ። 32ያሱስኳ ቤኮሎቆ ከማም ቤከል፥ "በርደከንዥገን በበኽ ጋገሸል መደዳ ከፄያ ካል ባብ ኖጎኻ፤ ነመደዳ ነለአ ከአባ በኸካኣጎካ መኣምብኸካ አራ ከግሻ መሸኸኮቆኳ?" 33ቢከኮሎቆ ዶጎ ዪሁዳኳ ቢከል፥ "ከፄ ገሸል መደዳሉ ከምኣምብልካኼ አም ከግሻኼ፥ ከፄ ባ ካ ረባ ከምኣምብልካ አም ከግሻ፤ ማከድ ጸጋ ባደከሥ ጸገኡ ከረባ።" 34ያሱስኳ ቤከል ከማም፥ "'አራ በርከለካ ካኻ እምረባ' ኤተ በከለካ ነሎርገ ማቶቋለኻ ኢቆተካንኼያኽ? 35አምብካቆኼ ዳ ኤተ በከለካ አመዪዥሥ ሎርጋኼ፤ ረባ ከጸጋ ደ በከኸካ እገሻለማ ኤበከለካ እምረባ፥ 36ከኤተ በዪዥኬሥ አረባ በትገኬ ከኤባ ካል እኔያኳ፥ ኤበከለካ አ 'አራ ዱ ረባ፥' ኤያበማ በኸከከለካን አኽ ካራ 'ረባ ባ ካ?' 37ኤከምበፀራ መደራ መደዳ አል ባብ፥ መገመኺልኼ ካራኼ። 38ኤከምደራ መደዳ አል ባብኸን፥ ኤከምበፀኻ መገመኺል ካራኳ፥ ገመኸኪል ከመደዳለም፤ ከለኣኳ ከምገመኸካ ከማምባለኸከሥ ኤበኢካ ባብ ከአራ፥ ኤበርኢካ አርኳ ከባብ።" 39ቢያኣጎ ዶጎ ዪሁዳ እኽላኳ መራቆሽ አ፤ አኸን ቤትሽ ኤለማም። 40ያሱስ ቤተጽ ቤዽ ከጋንደር ገቸ ዮርዳኖስ፥ ኖጎ ቤንጩጾቆ አዮሃንስ ነገሲቋ፥ ቤንዥጌ ነጓ። 41ቤዾዌ ኤማንጀ ጸጋ ኮጎማ ቢከል፥ "ኤደንኼ ዮሃንስ ዳ አል ገተምዛ ሜተልኼ፤ ዳ ኤተ ቤገሸሥ ዮሃንስ ከፄ መዣ አለኣኸን፥ ኮዎማ ኸገሻ።" 42ነጓ ኳ ቤገሚል ጸጋ በበኽ ከያሱስ።

will be added

X\