ገትገ ያይቆብ 5

1አኻ ደ ተቃ አለአ! እሰኻ ኦዌኻ ከማፉንጮቋ ኤተ በርካ ከምዌ ከጸገኻኳ። 2ከምዬኣኣ ደ መጫለኻ፥ ከምሳ አመጨጫ ኣለኻኳ። 3ከምጃ ኣያለኻ ለማናለኻኳ፤ ከምዳ መጀማኳ ኸገሻ ነጸገኻ ከምሶቆ በጨ ጸገኻ ኤያል ማንጃ፤ መካሲያዬኸን መርሽ ኤበ እኔያኳ፥ በኸሙንፀኮቆንዥገን ደ መጫ። 4በኸካዬከሥ በነ መሌአ ደ መሽል ጋትጋ ነቼለኻ፤ ገሰኾቆ ገሉጓለማም፤ በደካሸንዥገን መእሰ ደ መሙንፆቆ ጋትጋለኻ ኪል ፄ ረባ ኤታ። 5በኽኢከንዥገና ነኔያ ከማ ጸጫ ከበቦቆ ማ ገ ጓ፤ በኸቆጨከሠንዥገን ጸገኻ ኤያሥ ቢጦከሥ ዎደ ሙሳ ከመሽ ጺማ። 6በኸኸከሥ ከመዪዥሥ ጸጋኳ በኸሸኮቆንዥገና፤ ኢኮለኮቆንኼ እማም ከገንሳኼ። 7ኢዴበም! ቀመኾቆ ካሥ አል ኦከ ከምኮሌ ከምዌ ኤታ፤ ደ ገሌያ ኤከምዸባን ገሸል ኻ አል እኔያ በዜከኽ ከገቀማ ካሥ አል ኦከ ከምቻ ደመ ጅፈራ ካል ሰምፖጋ። 8ቀመኾቆ አኽኳ ኤያሥ ኤያ፤ ከፄ ባርቸካዬቆ መኮሌ መዌ ኤታ፥ መርኸሠኼ እልኻኼ። 9ኢዴበም! ማገሸኾቆኼ፥ ኤከምበፃ አረባ መኸሠን ካኻ፤ ገሰኾቆ፥ ባርቸካዬቆንዥገን መዌ ኤተ መኸሣ። 10ኢዴበም! ነመሮቆ ማኣንሠሣ ነመቀሞቆማኳ ዪርኻ ደ መዪርጓ፥ ደ በገሸከሥ ከፄያ ካል ኤታ ከመኮሣ። 11ከፄ ቢቀመኮቋ በኮከለካ ከማም ደ ማገ ላ። በኸገሰኮቆንዥገን ኤቤቀሞቆ አኢዮብ፥ በኸገምካ ደ ኤተ ቤከድ አረባ ነመርሸማኳ። ከለአ በኸገምካ፥ ኤበደካ ረባ መሌእለማ ማገ ለማኳ። 12ኢዴበም፥ ከበቦቆ መዠገተኻኼ! መዠገተኻኼ ከጎዛ፥ ከኔያ፥ ከዳ ከሜተልኳ! ኤከምበፃን አረባ መኸሥ ካኻ፥ ኤከምከለኻ "ኣዬ"፥ ነድ "ኣዬ"፤ ኤከምከለኻ "እምበኣኳ"፥ ነድ "እምበአ።" 13አኢካን ናኻ ጸጋ ኤተ ባፉንጨካቋኽ? አ ነዴር። አኢካን ጸጋ ኤተ ባገ ካይላኽ? ነኸ አኳ ከጌአ መገ ላ። 14አኢካን ናኻ ጸጋ ኤተ በንሰካሣኽ? ነኦ አኳ ደ እምፈገ መፀ ገዴራ ኮጎማ፤ ኒከዴር እማምኳ ከፄ ኤታ ያሱስ፥ ኒከደሥ ከደ መደሣ። 15ከምብዶቆ ገዴራ ኤተ ከምዱዋ ከመገሚላ ኤተ መንሰሣ፥ ከምተጸሥ ረባኳ አ፤ ኤከምዳን ገንሣኳ ከምበፀከሽ። 16ካ፥ ኤከምብደኻን ኣገሸኸሥ ገንሣለኻ ኣንዴረኻ ካሥ እልኸኻኳ፤ በጨካ አገዴረ መዪዥሥ ጸጋ መዥጋ ከመደ በበኽ ዳኳ። 17ኣሊያስኳ ጸጋ ኤያሥ አሎኳ፤ ኖከ ቤዴር ዝንዜን፥ ኤከምበፃን ደማ መቻ፥ ኤቸንኼ አደማ ነኔያ ግዣ ኦካግ ከጽጃ ማያኼ። 18ኖከ ቤኮል ቤዴርኳ፥ ቤቾቆ ጎዛ ደማ፥ ቤፖቆ እኔያኳ ኸ ዳ። 19ኢዴበም! ኤከምበ ኽ ናኻ ጸጋ ሜተም ኸገሻ፥ ኤከምኢያን ጸጋ ጀንዳ ኤተ ከመጎኽ አ፥ 20ገመኻ፥ ኤተ ከመጎኽ ኤተ ገንሣ ነገንሠኽ እንዶዋለማ፥ ኤበገርዘገኽ አ ነመሻ፥ ኤበጦካ ኤከምዸባን ማምበፀሸማ ነበበኽ ገንሣኳ።

will be added

X\