ገትገ ያይቆብ 2

1ኢዴበም! ኤበኸጨካ መገሚላ ከኤታ ከያሱስ ክርስቶስ ኤታ አል ገሂን፥ መሃቸኸሠኼ ጸጋኼ! 2ኤከምኢያ፥ ከምዌ ተቃ ሜታ ከምኢስ ኤለ ኣያ ከምኢሴሥ ገሸል ኣ ኪል ገሙንፃለኻ፥ ኤያሥ ኤያኳ ኤከምዎኬ ዢጋ ሜታ ከመኽ ኣ፥ 3ኤከምዻቆኸከሥ አኽኳ ኪልኻ መዣ ኤተ በኢሰኬሥ ገሸል ኣ ከምከልኸካ፥ "አም ኢሽ ኖጎ ገሸል መኢሻ ነለአ!" ከምከልኻ ከዢጋ ካኳ፥ "አም ኢቾጎ ነገት፥ ፌት፥ ዌ ኢሽ ኖጎ ቾጎም ነገአ፥" 4በኸምጹሸኪል አኽኳ ጸጋ ነገሙንፀ ገዴራለኻ፥ በኸኸከሥ ከገንሠ እላኳ። 5ደ በኻሄካሽ ኢዴበም፥ ኣጦኽኪል ፄ! ኤከማተቁዋን እማም ከመገሚላ፥ ኤመኩዋን ከገፋሌያለማ በሽለከሠንዥገን ረባ ደ ዢጋ ነኤባ ናል እኔያ። አለኣኳ ኤተ በካጦኪል አ ደ በሄከሽ አ። 6አኻኸን በኸ ከሥ ደ ዢጋ፤ ደ በንዡኮቆ አኻ በቼከሥ ከኸ ተምባኳ አደ ተቃኼያኽ? 7ደ በ ካ ገሸል ፄያ ኤተ ቢከኦካ አኻኳ፥ እማምኼያኽ? 8በኸደካ ገሸለማ፥ ኤከምደኻ ማገሸሣ አል ገፋሌ ረባ ኤተ በከለካ "ሄሽ ጸጋ ኤያሉ ኤያሥ እልቀኡ።" 9ኤከማሃቸኸሥ ጸጋኸን በኸደካ ገንሣ፥ ከምፖቆ ማቶቋኳ መምፑቆማለኻ ከኸ እኔያ። 10ኤከምዜኽ ጸጋ ሜታ ማቶቋ ኮዎማ ኤከማፑቆን ሜተምኳ፥ ከመንዘ ካኽ ኤያሥ ዳ ቤምፑቆ ኮዎማ። 11ኤተ በከለካ "ማጎሲያኣኼ" አ ኣሥ ኤተ በከለካ "መሻኣቆኼ፤" ኤከምበፃኣን ማጎሲያኣኳ፥ ኤባሸኮቋ፥ ባደከንዥገን ከኤተ መምፑቆ ማቶቋ። 12እገሸኸካ ደኸካኳ ኤያል ጸጋ ደ ቢከኸከሥ ከገሸ ረባ ኤተ በፐኮቆ ጸጋ ነዎደ። 13ረባ ነከምሌአይለን ከምኸከሥ ከጸጋ ኤተ በንዢገካ መሌአይላ፤ ነደንኳ መሌአይላ በሙቸኮቆ መኸሣ። 14ኢዴበም፥ ኤከምከላ ጸጋ ሜታ "በርገምኪላ፥" ኤከምበፃ መገሚላለማኸን ማትጋሥ ከገሸል መደዳ፥ ኣሤ ከምደካ? ከምፈለሻኽ አመገሚላለማ አኳ መብዶቆ አ? 15ኤከምኢያን፥ ነደ ገዴራ ነጋጉንዛ ከጋፈማ ደ ባንዢገካ ኣ ከደ መሳኳ፥ 16ነኽከምኸን ዳ ኤተ ከማኣጓ አመኢያለማም ኤከምከለኻ ከማም፥ "ነኸ ረባ ካኻ፥ ነኦካጎ ካኻ፥ ነ ኻ!" ኣሤ ከምዳ ከማማ? 17ኤያሥ ኤያኳ መገሚላ፥ ኤተ በበፀካ ማገማሥ ከገሸል መደዳ፥ አ ከጺማ መሸማ። 18ኤከምኢያ ከምከላ አጸጋ ሜታኸን "ሜታ በጨካ መገሚላ፥ ጀንዳኳ በጨካ ገሸል መደዳ" ከምኮለሮቆ አርኳ ከምከለርካ፥ "ትጌሥ ካራ መገሚላ ኤተ በንዢገካ ገሸል መደዳ! ከምትገርሥ አርኳ ካም መገሚላለም ከገሸል መደዳለም።" 19ኤበደካ ረባ ሜተም ባገምኪላኼያኽ? ገሸለማ ባደካ! በገምኪል ጋገንሠ ሙሳኳ ኣሥ አለአ፥ ቢያሰሲካሥ ከገጤያኳ። 20አም ተሞ! ኣምባለከሠኼያኽ ኤበደካ መገሚላ ኤተ በንዢገካ ገሸል መደዳ መገ? 21ካሤ ቤከዪር ረባ በቦኳ ኣብራሃም ከመዪዥሥ ጸጋ? ከመደዳለማ ከፄ ቤኽ ዱማ እስያቅ ከደ መኻ ኖጎ ሲላኼያኽ? 22ባገምከሥ ኤቤድ መገሚላለማ ከመደዳለማ ሜተም፤ ቤትታቆ መገሚላለማኳ ከመደዳለማ። 23ከለአ በከትተካቆ ሰ መዪዥሥ ሎርጋ፥ "ኣብራሃም በከገምኪል ከረባ፥ በከዪርካ አረባ መገሚላለማኳ ከመዪዥሣ፤" ቢከለካ ከኣብራሃምኳ ጀንደ ረባ። 24ካ በኸገምከሥ፥ ኤበዪርካ አረባ ጸጋ ከመዪዥሠማ በላ መዳን ካሥ ከመገሚላ፥ ኤበደካ ከገሸል መደዳኳ። 25ዪርኻ ኤያሥ ኤያ እገፈ ጎሲያ ራካብኳ፥ ኤተ ቤሮቆ ደ ቢትጌ ነእስራኤል ከመፀማ፥ ቤያኸኽ ኤከምዹዋን ነንዶዋ ነጀንዳ። ኤዪረንኼ አረባ አ ከመዪዥሠማ ከመደዳለማኽ? 26ኤያሥ በደካ ጸገጸጋ ኤበፐከሠን አገሾኳ መሸማ፥ ኤያሥ ኤያኳ መገሚላ ኤተ ባንዢገካ ገሸል መደዳ፥ መሸማ።

will be added

X\