ከደ እብሮታ 5

1በሽለከሥ ረባ በቦቆ ጥስ መፀ ገዴራ ኮዎማ ነጸጋ፥ በጦከሥ ነመደዳ ኤከምኻ ነታሰ ረባ ደ መኻ ከለማን ደ መኻ ከማምበፀሽ ገንሣ አል ጸጋኳ። 2ከፄ በኢካ አኳ ኤያል ጸጋ ኮዎማ ነገማዋ፥ ከምፈለሽ መሌኤካይል ከደ ባኤምኪላ ከደ በምፑቆካኳ። 3ካ ኤያሥ በኸካ አ ደ መኻ ከማምበፀሽ ገንሣ አል ጸጋ፥ ከምዳ ከአኳ አመኸ ደ መኻ ከማምበፀሽ ገንሣ አል እልቆማ። 4ኤያሥ ቤኦ አረባ ኣሮን ከመደዳ ከለአ፥ በኦካ አረባ መዱጎኮኳ ኣሥ ጸጋ ኤተ በኣጎካ አ፤ አኢካንኼ ጸጋ ሜተል ኤተ በርኮቆ ኪልቆማ ገሂን መዳ ከበቦቆ ጥስ መፀ ገዴራኼ። 5ኤጦኸንኼ ክርስቶስኳ ኤያሥ ኤያ ጸገማ ከምጻ ከምዸብ ገሂን መዳ ከበቦቆ ጥስ መፀ ገዴራኼ። ኤተ ቤከኽ ገሂን አለአ አረባ ኤተ ቤከል፥ "አም ዱዋለም፥ በርፐከኸንዥገን አም ኖካ ነለአ።" 6ቤከል ኖጎ ጀንዳኳ፥ "ኤያል መልኪፄዴቅ ከምዳኣ አምኳ ግዢ ግዥ ከጥስ መፀ ገዴራ።" 7ኖከ ቤኢ ያሱስ ነኤባ አል እኔያ ነለአ፥ ቤዴር ቤቆን ከበቦቆ ሳ ከኸ ጹሻ ረባ ኤተ ቤፈለሽ መገርዘኽ መሻ ነጸገማ፤ ከፄ ቤከኽ አ ገሂን ከረባኳ፥ ቤከገሶቆ ረባ ገዴራለማ። 8መከደን ዱ ረባኳ፥ ቤካገሚል ከማኣንሠሣለማ ማገሳሣ። 9ኤበትተኮቆ አ እንዶዋለማ ነቸቻ፥ በከቼከስ እንዶ መብዳ አል ግዢ ግዥ ከደ በካገሰካሥ ካ ኮዎማ። 10ቤካንዠሥ ረባኳ ፄ በቦቆ ጥስ መፀ ገዴራ ኤያል መልኪፄዴቅ። 11ከፄ አለአ ቢልጨካ በበኽ ዳ ኤተ ቢልመገሸሣ። ከፄ በኸሌኤካሥ ከማምባለሥ ዳ ኤተ በኸገሰኮቆኳ፥ ከመዪዥሠማ ባፉንጨኮቆ ጸጋ። 12ኤያል ኦከ ኤተ በኻጦከሻ በኸመድ ደ መትገሠማ ከጸጋ ከጀንዳ። እኽላኸን ከምዳ ካኻ አመጨ ጸጋ ኤተ ከምትገሥ እገሸ ረባ አል ገቶ ካኻ። ኤተ ከምዳ ካኻ፥ በላ መዳን መሰ መዥጎቆ ደ መሳ፥ ከምዳ ካኻ እኽላኳ አመፈ ኩዋ። 13ጸጋ ኤተ በከኢካ ከኩዋ መሌኤኽ ዱዋ፥ ከማጹሺልኼ መገማ ከገንሠማኼ። 14መዥጎቆ ደ መሳኸን አል መዥገኽ ጸጋ፥ ደ ባገምከኽ አገሳንዛለማም ማጹሺል መገማ ከገንሠማኳ።

will be added

X\