ከደ እብሮታ 3

1ካ ኢዴበም፥ ደ በኸዪዥካሥ ከረባ፥ በኸንዘ ኪል ነማኦ አል ጎዛኳ፥ ራቆኸሥ ከእልኻ ኤተ በደካ ሰ ገትጋ ከበቦቆ ጥስ መፀ ገዴራ፥ ያሱስ፥ ኤተ በኮትገከሥ ከመገሚላሎኳኳ። 2ኤያሥ በደካ አሙሴ መገሚለማ ነመፀ ረባ፥ መገሚለማ ያሱስኳ ከረባ ኤተ በጦከሥ አ ነመደዳለማ። 3ኤያሥ በጨካ ኤተ መዶቆ መፃ ገሂን ነመፃለማ ነኤተ በደኮቋ፥ በርኮቆ ያሱስኳ በቦቆ ገሂን ነሙሴ። 4ኸገሻ በጨካ አመፃ ኮዎማ ኤተ መዶቆማ፤ ኤተ በደኮቆ ኮዎማኳ፥ ኣሥ ረባ። 5መገሚለማ ሙሴ ነመፀ ረባ ኮዎማ ኤያል ኤተ መደዳ፥ ቤገሸሥ ዳ ኤተ በኢካ አረባ ከመገሸሠማ ነን። 6ክርስቶስኸን ቤኢ መገሚለማ ነመፀ ረባ ኤዱ ጉንዘ ዱዋ፤ አኳ ደ መፃለማ፥ ኤከምዻቆከሽ መገሚላሎኳ ከማጦዪላ ኤተ በኮከሸኮጓ። 7ከለኣኳ፥ ኤያሥ በገሸከሥ አመዪዥሥ ገፉጫ በከለካ፥ "ኖካ ነለአ ኤከምገሰኾቆ ሰማ፥ 8መዥገኻይልኼ ኤያሥ ጸጋ ደ ቤገሺል ሰማም ነጸገ ረባ፥ ኖከ ማዻምባ ነኸ እኔያ።" 9በከለካ አረባኳ፥ "ሚከገመሥ ገሸል መደዳለም ግዣ ጉንዘማ እምበንድ፥ ቢዻምብ እምበበኻ አራ፥ ቢዻምብ ቁንዝ አራኳ። 10ካ በርካመከሥ ከማፖቋ ካ፥ በርከለካ 'በበከኽ እለማምኳ እንዶዋ መዱጎክ፥ ኢያምባለከሠንኼ እንዶዋለምኼ።' 11ከለአ በርዠገተከንዥገን ነማመሣለም በርከለካ፥ 'ከምኩዋኼ እማም ከኤበ ማፉጮቋ ኤተ በርመኽ ከማምኼ።"' 12ኢዴበም፥ ዜኸኽ ጸገኻ ኤከምበፀኻ መጨኻ ናኻ ሜተል ገንሠኽ እላ፥ ኤተ ባንዢገካ መገሚላ ከማገልኻ ነጸገ ረባ መኢማ። 13ካሥ አል ኦከ ከማገሻሥ ሳ ኤተ በከለካ "ኖካ ነለአ"፥ አንዥገኸሥ ኖካ ኖካ። መዥጋ እልቆኼ ናኻ ጸጋ ሜታ ከመንጠኻ አል ገንሣኼ። 14መገሚላሎኳ ኤተ በኮጨካ ነማጦሸማ ኤከምዻቆከሥ ካሥ መርሸማ፥ ከመንዘኲል ነመኢያ አል ክርስቶስ። 15በከለካ አመዪዥሥ ሎርጋኳ፥ "ኖካ ነለአ ኤከምገሰኾቆ ሰማ፥ መዥገኻይልኼ ኤያሥ ጸጋ ደ ቤገሺል ሰማም ነጸገ ረባ።" 16እምዎዴ ጸጋ ደ ቤገሶቆ እገሸ ረባ ቢገሺለን ሰማም ነጸገማ? ኣሥ ደ ቤፔቆ ሙሴ ነግብፅ ኮዎማኼያኽ? 17ከምዎዴ ቤካመሥ ረባ ግዣ ግቸማ እምበንዳ? ካሥ ደ ቤድ ገንሣ ቤየኣን መሻለማም ነኸ እኔያኼያኽ? 18ከምዎዴ ቤከዠገት ኤከምበፁዋ መኩዋን ከኤበ ማፉጮቋ? ካሥ ከደ ቤበፅ ማገሰካሥ ካኼያኽ? 19በኮገምከሥ ኤቢያሃለከሽ እማም መኩዋን ከፄ ማንዢግ መገሚላለማም።

will be added

X\