ከደ እብሮታ 13

1ኣተተኸከስ ማሄሻ አል ኢዴባ ደ ገዴራ! 2ማኤምኸሠኼ መሄሽ ኮዶኼ! ኤኤለአ በላ ማገሙዊለን ቢሄሸንዥገን ጸጋ ሜታ ሜታ ሰ ገትገ ረባ። 3ሳንዘኸሥ ደ ቢፉንጨካ ኤያሥ ዳ ቢያኽፉንጭ ኮዎኻ! ሳንዘኸሥ ጸጋ ደ ባቀዘካሣ ኤያሥ ዳ ቤያኻቀዛሥ አኽኳ ኮዎኻ! 4ነሂንሥ ማሮቋ ኖጎ ጸጋ ኮዎማ፥ ማዋሠኼ ጎ መዥግ እገፋ ከጉንዘማ። ከምኸከሥ ረባ ከደ ጎሲያ ከደ ጎርታኳ። 5ሃተኻሥ ነመሲያሣ ከለማና፥ ነትት ኣሥ ኤተ በኸጨካ ካኻ። በከለከንዥገን ረባ፥ "ከምኣምብርሸኼ አም፥ ከማኤመርሠኼ አምኼኳ።" 6ካ በኮገምኪል በኮከለካ፥ "ረባ ኤተ መተጸሥ አራ፥ ከምጤራኼ፥ ከምፈለሸኼ አጸጋ መደዳ ሜተል ነጸገምኼ።" 7ሳንዘኸሥ ደ መቼስ እንዶዋ ካኻ፥ ደ ቤገሸሥ እገሸ ረባ ካኻኳ። ዪርኻ ኤቢከኢ እማም ቢሸሸናኳ፥ ደኻ መገሚላለማም ከመኮሣ፥ ሁለኻኳ። 8አንዠካይልኼ ያሱስ ክርስቶስ፤ አ ገፀ፥ ኖካ አለአ ካሥ አል ግዢ ግዥኳ ኣሥ ሜተል። 9መቢቆኼ አኻ ነንዶዋ አመትገሣ ጃጀንዳ፥ ኤተ በደካ ነኤተ በትገከሥ ካኻ ከጺማ። ኤተ ከመንዥገሥ እልኻ አመገ አል ረባ፥ አማገሳሣ ከማታቋ ከፄ ደ መሳኼ። አዸበካንኼ ጸጋ ደ ባገሰካሥ ከሾከ አለአ በና ከንዶጎ አለአ ሜተልኼ። 10በኮጨካ ሸ ሲላ፥ ነኤተ በበፀካ መኸሥ መሰማ አደ በደካ ዳ ኖጎ ገዴራ አል ዶጎ ዪሁዳ። 11በቦቆ ጥስ መፀ ገዴራ አል ዶጎ ዪሁዳ ቤከኩ ከመሃ ለማና ኮጎ ጎ በዪዥካሥ ነኮዎማ ዝንዜን፥ ቤሮቆ ከደ መኻ አል ማምበፀሽ ገንሣ። ቢጥጦቆ በጨማኳ ኖጎ ቤማኢሽ ጸጋ ከጃጻ። 12ኤያሥ ኤያ ያሱስኳ ኤከምዪዥሠን ከመሃለማ ጸጋ ነገንሣለማም፥ ቤያፉንጫቆ ኒል ኤዬባ ከጃጻ። 13ከለአ፥ ዎኼ ጹርኳ አኳኳ ገ ያ ኤተ ቤድ ነጸገማ፥ ፐኮከሥ ኮጎ ቤማኢሽ ጸጋ ከጃጻ። 14በኮዜከኽ ኤዬባ ኤተ ከምዌ ከምፀቆኳ፥ አኮጨካንኼ ነኤበ እኔያ ነለአ ኤባ ኤተ ከምዳ መዱጎክ ካሎኳኼ። 15ዎኼ፥ ከንዶጎ ያሱስ መዱጎክ ኾኳ ከረባ ደ መኻ መገ ላ። ሳ ኤተ ከምዴሮኮኳ ከሜኤኮኮሥኳ፥ አ ደ መኻሎኳ ኤተ ከምቲኮኮሥ ፄማኳ። 16ማኤምኻሠኼ ከመደ ገሸል ዳኼ ከመዘ ል ዳ ኤተ በኸጨካ ከጃጀንዳኳ። ባገ ካይል ረባኳ ከሾከ ደ መኻ ከለአ። 17ኣገሰኻሥ ከደ መቼስ እንዶዋ ካኻ፥ ኢኻ ኒል ኤለ ገፋሌያለማምኳ! እማም ቢዜከኽ አኻ፥ ከምዳ ከማም ኤያሥ ኤያኳ አመትገሠማ ነታሰ ረባ ኤቢከጦከሥ ዳለአ ነመደዳ። ኤከማገሰኻሥ ከማም፥ ከማገ ላ ከምዱዋ መደዳለማም። ኤከምበፃ መዳ ኤለአ፥ ከምዱዋ መደዳለማም ከመንጤሣ፥ ከምጫኼ በና ካኻኳ። 18ዴረኻ አኽኳ ካይላ! ቢልገምካ ዝንዜን ኤቢልጨካ መዪዥኽ እላ፥ ከፄ ቢላኣጎካ መዱጎክ ከመጦ ዳ ኤተ በደካ መዘረማ። 19ከበቦቆኳ በርገሸካ ካኻ ዝንዜን፥ ዴረኻ ካራ፥ ኤከምኮሌቆን አረባ አራ ከምትጌን ኮጎኻ ፈላ። 20ረባ ኤተ መኸ መገማ። አ ቤፈሬቆ ነመሻ ኤቶኳ ያሱስ ክርስቶስ፥ ኤተ በደካ ከመሻለማ ከበቦቆ ኤተ መሸል ጃጃ። በጦካ ክርስቶስኳ ከመሃለማ ማገሲላ ኤተ ከምኢያ ካል ግዢ ግዥ። 21ነተጸሥ ረባ አኻ፥ ኤከምደኻን ገሸል ዳ ኤተ በኦከሽ አ። ከምዳ አ ኒሎኳ ከንዶጎ ያሱስ ክርስቶስ ዳ ኤተ ከማገ ል አ። ነድ ገሂን ከክርስቶስ ካል ግዢ ግዥኳ። ኣሜን። 22አኻ ኢዴበም፥ በርገሸካ ካኻ፥ ርኾቆ ከገቀማ ሰ ማገሸሣ ኤተ በርቆተካ ከምጸለማ ካኻ አለአ! 23በራኣጎካ ኤከምገመኻ ኤበጨገካዬስ ዱዌቦኳ ጢሞቴዎስ ነመፀ ማፉንጫ። ኖከ ከምዳዬሽ አኳ ፈላ ከገአ፥ ከምዎዪሌ እምበንድ ከምዪርልቆ አኻ። 24ኸኸካ ዳገለምላ ከደ መቼስ እንዶዋ ካኻ ኮዎማ ከደ በዪዥካሥ ከረባ ኮዎማኳ። ኢዴባ ደ ገዴራ ደ በዎኬ ነኤበ ትሊያና ኮዎማ፥ ቢኸካ ዳገ ካኻ። 25ነድ መገ ከኮዎኻ!

will be added

X\