ከደ እብሮታ 10

1ማቶቋ አል ሙሴ ፉሠ ጋገሸል ዳ ኤተ በኢካ ከመዌያ፥ ኸገሸ ጸገማምኼ። ካ ካል እል መዱጎክ ከምፈለሸኼ መጦማ ከደ መትቶቆማ ጸጋ ደ በርኮቆ ነግዣ ነግዣ ደ መኻለማም ቢካርቸከሥ ረባ። 2ኸገሻ በምዪዥካሥ ጸጋ ነገንሣለማም በምደካ፥ በምበፀካ መደሥ ገንሣለማም እለማምኳ፥ በማሻኸኼ መሮቆ ደ መኻለማምኼያኽ? 3እኽላኸን ከደ መኻ ከኤተ ቢኸካ፥ ቢከሳንዘከሥ ጸጋ ነግዣ ነግዣ ገንሣለማም። 4አኳኸን በኮገምካ፥ ኤበበፀካ መፈለሽ አመሃ ሜኣ ካል ዎደ ሙሳ መቼሥ ገንሣ። 5በከለካ ክርስቶስ ኖከ በዎኬ ከኤባ ካል እኔያ፥ "ኣኣጎካንኼ አም ደ መኻ ከለማን ደ መኻኼ፥ ኣሥ ጸገም ቤያገ ሥ ካራ፤ 6ኣገ ካይለንኼ ከደ መኻ ለማና ኤተ ቢጥጠኮቋኳ፥ ከደ መኻ ኤተ ቢርኮቆ ከማምበፀሽ ገንሣኳ። 7ከፄ አለአ በርከከለካ፥ 'ኤያሥ ቢቆተኬ ነመለጪል ሎርጋ ከፄም፥ በርዎኬንዥገን ረባለም፥ ኤከምትተሮቆ ማሄሻሉ።"' 8ኤቢርቆን ደ መኻ አለአ ኤቤገሸሥ ማቶቋ አል ሙሴኳ፥ በከለካ ክርስቶስ ነለአ ከምጻ፥ "ኣኣጎካንኼ አም ደ መኻ ከለማን ደ መኻ፥ ኣገ ካይለንኼ ከደ መኻ ለማና ኤተ ቢጥጠኮቋኳ።" 9በከለካ ነለአ ነቸቻኳ፥ "በርዎኬንዥገን ረባለም፥ ኤከምትተሮቆ ማሄሻሉ።" ከለአ ቤፖቆ ክርስቶስ ደ መኻ አል ገሲቋ፥ ኤከምጦሠን አል ማኮሊለማ ነመደዳ። 10በጦከንዥገን ክርስቶስ ዳ ኤተ በኦከሽ ረባ ነጸገማ። ቤጦ ጸገማ እል ሜታቆ ከደ መኻ፥ በዪዥከሠንዥገን አኳ ከኦኪል መዱጎክ ነገንሣ ነኮዎማ። 11ጥስ መፀ ገዴራ ኮዎማ ቢደካ መደዳለማም ኖካ ኖካ ቢትገከኽ ከረባ ኦኪል በበኽ ኣሥ ሾከ ደ መኻ ሜታ። ደ መኻ አለኣኸን ከምፈለሸኼ ሜተል መቼሥ ገንሣ አል ጸጋኼ። 12ክርስቶስኸን ቤሮቆ ደ መኻ ሰ ሜተል፥ ቤከኢሽ ከግዢ ግዥ ከኤላ ጉንዘ ረባ። 13በዜከኽ ናሥ ጓ ካሥ አል ኦከ ከምጦዋ ረባ ብታለማ ከደ መጦ ቾጎማ። 14አ ከምሮቆ ደ መኻ ሰ ሜተል በጦካ ደ በዪዥካሥ ነገንሣ ከደ መትቶቆማ። 15ከፄ አለአ በደካ ኸገሻ አመዪዥሥ ገፉጫኳ፥ በከለካ ኤለአ፥ 16"ቤከል ረባ 'ነአንጅ ነለአ ነቸቻ ከምጦራ ማገሲላ አለአ፥ ከምጦርሥ ማቶቋለም ኒለማም፥ ከምቆተራ ነቁንዘማምኳ።"' 17በተጸካ ረባ በከለካኳ፥ "ከምሳንዘርሠኼ ገንሣለማም ከመሸ ሠማለማምኳ።" 18ኖጎ በኢካ አማምበፀሽ ገንሣኳ፥ ባሸካኸንዥገን መሮቆ ደ መኻ አል ማምበፀሽ ገንሣ። 19ካ ኢዴበም፥ በኮጨካ መንዥግ እልኻ ከንዶጎ መሃ ያሱስ ከምኩ ኪል ጎ በዪዥካሥ ነኮዎማ። 20በከኮርኬስ አ ከንዶጎ ጸገማ እንዶ ኽኻ ካኳ፥ ኤተ ባፐከሥ ኒል ጋጉርኻ በርኮቆ ኮጎ መኢያ። 21በኮጨካ በቦቆ ጥስ መፀ ገዴራ ኤተ በጨካ ገፋሌያ ነመፀ ረባ። 22ካ ከትጭ እላ ከመዪጮቆ መገሚላኳ ዾኳ ኮጎ ረባ፥ ከእላ ከኤተ በዪዥካኽ ነገንሠ ገሳንዛ፥ ከጸገማ ኤተ በኤፈከሥ ከመዪዥኽ ኣያ። 23ኤተ በኸኬ ማጦዪላ ካኳ፥ መገሚለማ። ካ፥ ራቆኸሥ ዝንዜን ማጦዪላ ኤተ በኮትገከሥ አኳ። 24ዎኼ፥ ኣተጸኮሥ፥ ኣምበንኮቆ ከመደ ማሄሻ ከጋገሸል ዳኳ። 25ኤያሥ ባገምከኽ ጸጋ ሜታ ሜተም፥ መበፀኮሸኼ ማሙንፆቋሎኳኼ። በኸገምከሥ ኤባርቸካዬቆ ኦከ መዌ ኤቶኳ። ከፄ አለአ ኣንዥገኮሥ ከበቦቆ። 26ኤከማምባለኮሥ ኸገሻ ነቸቻ፥ መኮከገም ኤከምዶኳ ገንሣኳ፥ ከምኢያንኼ ነለአ ከገት ደ መኻ ኤተ ከምሩቆ ከማምበፀሽ ገንሣኼ። 27ኤበደካ ኤለአ፥ በኢካ ነጸጎኳ አመዜኽ በቦቆ መኸሣ፤ ከምቴሥ መበ ጥ ማንጃ ደ በንሰካ ረባ ኮዎማ። 28ጸጋ ደ በኮኪል ማቶቋ አል ሙሴ፥ ከምደካ አመሻ ከሹደ ጸጋ እምበንድ ኤያሥ ኤያ ከኦካግ በላ ማንጀርካን እለማ። 29ከምደካ መኸሣ ኤተ በንተርኮቆ ና ከኤተ ከምሥ ዱ ረባ፥ ከኤተ ከምዪራ መሃ አል ማገሲላ ኤተ በከዪዥካሥ አ ኤዳ ቤያንዢግ በና፥ ከኤተ ከምያ መዪዥሥ ገፉጫ ኤተ በኸካ መገኳ። 30በኮገምካ ኤተ በከለካ፥ "ኤተ ማስ በና፥ አራ፥ ከምኮለሮቆ መደዳ አል ጸጋ ኪልቆ ኤተማ፤" ኤያሥ ኤያኳ፥ "ከምኸከሥ ኤታ ከሾካለማ።" 31ረባ መኢማ፤ ሚከገም ኤቢደካ ገንሣ መኩ ከኤለ ረባ፥ ከበቦቆ ደ ጋጤቋ። 32ሳንዘኸሥ አንጅ አል ገሲቋ። ኖከ ቤያኽዸብ መዪዦጓ አል ረባ ነቸቻ በኸፈለከሸንዥገን ከገቀማ መዥግ ማቆር ማኣንሠሣ። 33ቢከንዥገን ናኻ ሜታ ሜተም ነኸ ጸጋ፥ ቢጦ ገንሠ ዳ ነጸገኻ። ቢገከሠንዥገን ጃጀንዳኳ ከመንዘ ል ዳ ኤተ በደካ ነጸገማም። 34በኸንዘኪለንዥገን ማፉንጮቋ አል ደ ቢፉንጨካ፤ ኖከ ቢያጎዥ ደ መጫለኻ፥ በኸቀመኮቆ ከማገ ላ። በኸከፈለከሽ አለአ ከፄ በኸገምካ ኤበኸጨካ ገሸል ዳ፥ ኤተ በንተርኮቆ ነለአ በበፀካ መተራኳ። 35መንዠኸኬልኼ ከመገሚለለኻኼ! አለአ በጨካ በቦቆ በና። 36ኤከምደኻን ዳ ኤተ በኦከሽ ረባ፥ መቀሞቆማ በኢካ ነጸገኻ። ከለአ ከምዸበኸካ ዳ ኤተ ቤካጦዪል ረባ። 37በከለካ መዪዥሥ ሎርጋ፥ "ነኦኪል ዱፀን ነቸቻ፥ ከምዌ ኤተ በኢካ ከመዌያ፥ ከምፀዬቆኼ። 38ጸጋለም ኤተ በጦካ ዳ ኤተ በርኦከሽ አር፥ ከምኢካ አ ከመገሚላ፥ ጸጋ ኤተ ከምጦ ቸቸ ካራኸን ከማገርካይልኼ።" 39አኳ ደ በኮገምኪላ፥ ደ ከመብዳ፥ ሾከ ጸጋ ደ በከጦከቸች ከምቴያኼኳ።

will be added

X\