ከደ ገላቲያ 1

1ኤተ በቆተካ ገትጋ አለአ አራ ጳዉሎስ፥ በላ መዳን ኖጎ ጸጋ ኤያሥ ኤያኳ ከንዶጎ ጸጋ፥ ኤተ በርደካ ሰ ገትጋ ከንዶጎ ያሱስ ክርስቶስ፥ ከንዶጎ ረባ በባ ኤተ በፈርኬቆ አ ነመሻኳ። 2ኢዴባ ደ ቢኢካ ከአራ ቢልትገካ ኮዎምላ ዳገ ከገሙንፀ ደ ገዴራ አል ኤበ ገላቲያ። 3ነድ መገ ከመገማ ካኻ ኖጎ ረባ በቦኳ፥ ኖጎ ኤቶኳ ያሱስ ክርስቶስኳ፥ 4ኤተ በኸካ ጺማ ከፄ ገንሣሎኳ፥ ኤከምገርዘኸን አ ገንሠ ኤበ እኔያ አለአ ነጸጎኳ። በደካ አለኣኳ ኤማሄሻ አል ረባ በቦኳ። 5ነድ ገሂን ካ ካል ግዢ ግዥ። ኣሜን። 6በሰከሥ እለም፥ ኤበኸሲከቾጎ ነመበፀሽ ረባ ኤተ በኦካ አኻ ከመገ አል ክርስቶስ፥ ኤበኸርኮቆ ሰ ማገ ላ ጀንዳ። 7አኢካንኼ ሰ ማገ ላ አል ረባ አጀንዳኼ፤ ነደንኳ፥ በኢካን አጸጋ ሜታ ሜታ ደ በንጠከኽ አኻ፥ ደ በኣጎካ መንዢል ሰ ማገ ላ አል ረባ ከፄ ክርስቶስ። 8ነደንኳ፥ አራ ኤያሥ ኤያ ሰ ገትጋ አል ጎዛ ሜታ፥ ነሰ ማገ ላ ኤተ ቢልገሸሥ ገፀ ካኻ ኤከመገሸሥ ጀንዳ ካኻ፥ ነድ ማሆተማ። 9ኤያሥ በርከለካ ነገሲቋ፥ ከማኮለሪል እኽላኳ መገሸሠማ፤ ነድ ማሆተማ ጸጋ ኤተ ከመገሸሥ ነሰ ማገ ላ ኤተ በኸርኮቋ አኽ ጀንዳ ካኻ። 10ከመገሸራኽ አር እኽላ፥ ኤከምከላን ጸጋ ካራ ገሸለማ? እምበአ፥ በራኣጎካ ኤከምከላ አረባ ካራ ገሸለማ። ኤያሥ ኤያኳ ከማኣጎራ ማገ ል ጸጋኽ? ኤበርማኣጎ ማገ ል ጸጋ፥ በርምደኼ ከኤተ መደዳ አል ክርስቶስኼ። 11ኢዴበም፥ ገመኻ ኤበበፀካ መዳ ሰ ማገ ላ ኤተ በርገሸከሥ ካኻ፥ እገሻ አል ጸጋ። 12በርርኮቆ ሰ ማገ ላ አለአ ከማገማሣ አል ያሱስ ክርስቶስ ካራ፥ አርርኮቆንኼ ኖጎ ጸጋ፥ አትገከሠንኼ አጸጋ ካራኼኳ። 13ኖከ ቤርኢ ነገዴራ አል ዶጎ ዪሁዳ፥ በኸገሰኮቆ ኤቤራሙቾቆ ገሙንፀ ደ ገዴራ አል ረባ ዝንዜን፥ ኤቤርሻምብ ከመቴሠማኳ። 14ነመዜኽ ገዴረ ዶጎ ዪሁዳ ቤርንተሮቆ ነሾከምላ ደ ቤድ መዠም ነማም በበኽ፥ ቤርከጥጣይል በቦቆ ከምኢ እምበፈጎኳኳ። 15መርከኢ ኒል ያዩ ቤሽልሥ ረባኳ አራ፥ ቤኦ አራ ከመገለማ ከማሄሻለማኳ። 16ኖከ ቤትጌሥ ዱማ ካራ፥ ኤከማቲርሰን ሰ ማገ ላ ከፄማ ኖጎ ጸጋ ደ በበፀካ መዳ ሾከ ዪሁዳ፥ ኤርዸንኼ ከማገሸሣ ኮጎ ጸጋ ሜተልኼ። 17ኤርቶኮንኼ ከዬሩሳሌም ከመሎቆሥ ጸጋ ደ ቤሲቆ መዳ ካራ ከሰ ገትገ ክርስቶስኳ፤ ቤርሲቆ መዻ ከኤበ ባ፥ ቤርኮሌ ነቸቻ ከደማስቆኳ። 18ነግዣ ኦካግ ነቸቻ ቤርቶኮ ከዬሩሳሌም ከማገማ ከጴጥሮስ፥ ቤርኢሽ ኖጎማ ኦካ አሤር ኖቆማ ማቁስ። 19ቤርገሜሥ ኣሥ ያይቆብ ዱዌበ ኤታ ያሱስ፥ ኤርገሜሠንኼ ነሰ ገትገ ክርስቶስ ጀንዳ ሜተልኼ። 20ነዳ ኤተ በርቆተካ ካኻ ነለአ፥ በርደካ ኸገሻ ካኻ ነታሰ ረባ፥ ኤከምበፃ መዳን ጎልጎዛ። 21ና ነቸቻ ቤርዽ ከኤበ ሶሪያ ከክልቂያ። 22ኢገመሠንኼ ገሙንፀ ደ ገዴራ አል ኤበ ዪሁዳ አራ ከኸማምኼ። 23ቢገሶቆ ኣሥ ኤተ በከለካ አጸጋ ሜታ ሜታ፥ "መዣ ኤተ ቤያሙቾቆ አኳ ገፀ፥ ባቲከስ እኽላ እንዶ ገዴራ ኤተ ቤያኣጎ መቴሠማ።" 24ቢከኽ እማምኳ መገ ላ ከረባ ከፄም።

will be added

X\