ከደ ኤፌሶን 6

1አኻ ኢዳ፥ ኣገሰኻሥ ከበበኻ ከኤዬኻኳ [ነታሰ ኤታ]፤ አለአ ገሸለማ። 2ነምበቦቆ ማገሸሣ ኤተ በጨካ ማጦዪላ ኤተ በከለካ ኤለአ፥ "ኣገሳሥ ከበበኡ ከእይኡ!" 3በከለካ አማጦዪላ አለኣኳ፥ "ኤከምዳን ገሸለማ ካም፥ ከምኢያኣን ነኤባ ናል እኔያ ከግዣ ከበበኽ።" 4አኻ እምበባ አለአ! ዱኾቆ ኢዳለኻ ከመትገሣ ከማገሸሣ አል ኤታ ያሱስ፤ መቱኸሠኼ እለማምኼ። 5አኻ ዋደ፥ ኣገሰኻሥ ከኤተኻ ካል ኤበ እኔያ ከለአ ከገጤያ ከማሰሲያሣ ከመዪዥኽ እላ ኤዳ ቤያኸድ ከክርስቶስ። 6ኤዋደ ክርስቶስ ትተኾቆ ዳ ኤተ በኦከሽ አረባ ከእልኻ፤ መደዳኼ ከማገ ል ጸጋ ከማትጋሣ ነኸ ጸጋኼ። 7በላ መዳን ከጸጋ፥ ደኻ ከማገ ላ ኤዳ ቤያኸድ ከኤታኳ። 8ጸጋ ኮዎማ፥ ነድ ዎደ ዶቆ ኤባኳ፥ ነገም ኤከምሮቆ ኖጎ ኤቶኳ በነ ገሸል መደዳለማ። 9አኻ ዶጎ ኤታ! አከከኸሽ ዋደለኻ፥ በፀኸሽ መጀጀጮቆ እማም። ገመኻ አኽኳ፥ ኤቶኳ ኤተ በኢካ ነጎዛ ኤበደካ ከአኻ ከማምኳ ኤታ፥ አኢካንኼ ኖጎማኳ ኣማሃቸሥ ጸጋኼ። 10ኮጎ መርሸማኳ፥ ኢዴበም፥ ዥገኻ ከመዥጋ ካል ኤታ፤ በቦቆ መዥጋለማ ነንዥገሥ አኻ! 11ኤከምፈለኸሸን መንስ ኻንዥዠ ሴጠና፥ ኢሰኸሥ ሙ ማሸማ አል ረባ ኮዎማ። 12ማቆራሎኳ በላ መዳን ከጸገ አል በጫ፥ ከምሙሳ ደ በጨካ መዥጋ ከገፋሌያ፥ ኤያሥ ኤያኳ ከደ በሙቸኮቆ ነኤበ እኔያ ኤተ በኢካ ኒል መጓ፥ ከጋገንሠ ገፉጫ ደ በኢካ ነጂል እኔያኳ። 13ካ ኢሰኸሥ ሙ ማሸማ አል ረባ ኮዎማ፥ ኤኤለአ ኖከ ከምዌ አገንሠ ኦካ፥ ከምፈለኸከሽ መንስ መቆሽ ብታ፤ ኤከማሸኻ ነቸቻኳ፥ ከምኢኸቾጎ ከመዥጋ። 14ካ በላ መንደኸሥ ኢኸቾጎ፤ ኢሰኺል ኸገሻ ኤጸጋ ኤተ ናኢስል ለከፋ፥ ፉንጨኺል ገሸል መደዳለኻ ኤሶ ኤተ በናዜኽ ጸገጸጋኳ። 15ኤጸጋ ኤተ ናኢሰቾጎ ቻፓ ናገሥ ከማሻ፥ እገ ኸሥ ከማቲስ ሰ ማገ ላ አል መገማ። 16ነለአ ነኮዎማኳ ርኾቆ መገሚላ ኤኳ! ከአ ከምፈለኸከሽ መሸኽ መበል ጆጎ ሴጠና። 17ርኾቆ መብዳ ኤተ በኸኬ አረባ ኤሶ እልቋ ኤተ በናዜኽ ጸጋ፥ እገሸ ረባኳ ኤቻጋ ኤተ በኸኬ መዪዥሥ ገፉጫ። 18ነገዴራለኻ ከገቆናለኻ ኮዎማኳ መዱጎክ ዴረኻ ኤያሥ በኸከሥ አመዪዥሥ ገፉጫ ካኻ፤ ኣምበንኻሥ ከገዴራ፥ ዥገኻ ነመቀሞቆማ፥ ዴረኻ ከደ ገዴራ ኮዎማኳ። 19ዴረኻ ካራኳ፥ በላ መጤራን ኖከ ከምዳ ካራ አማቲስ ሰ ማገ ላ አል ረባ ኤተ ቤያጸፃቆ ኖጎ ጸጋ፥ ኤከምኼሠን ረባ ካራ ገሸል እገሻ። 20ከፄ በርደካ ሰ ገትገ ሰ ማገ ል አል ረባ፥ ቢያርፉንጨካ ከስልካ። ዴረኻ ካራ፥ በላ መጤራን ኤከመገሸርካ ከፄማ ኤከምዳን አመገሻ ካራኳ። 21ኤከምገመኻን ከፄም ከመደዳለምኳ፥ ከመገሸሥ ማሄሽ ዱዌበም ቲኪቆስ ካኻ ኮዎማ። አ መገሚል ኤተ መደዳ፥ 22በርትገከንዥገን አ ኮጎኻ ኤከመገሸሠን መዳለምላ ካኻ፥ ኤከመንዥገሠን አኻኳ። 23ነድ መገማ ከኢዴባ ደ ገዴራ፥ ማሄሻ ከመገሚላ ኖጎ ረባ በባ ካል ኤቶኳ ያሱስ ክርስቶስኳ። 24ነድ መገ ከጸጋ ከኮዎማ ደ በሄከሽ ኤቶኳ ያሱስ ክርስቶስ ከማሄሻ ኤተ በበፀካ መራሽ።

will be added

X\