ከደ ኤፌሶን 5

1ከፄ በኸደካ ማሄሽ ኢደ ረባ፥ ሁለኻ አኽኳ መኳ አል ረባ። 2ኣሄኸሽ አኽኳ ኤያሥ በሄከሽ አክርስቶስ አኳ፥ ባተገርኮቆ ጸገማ ከፄኳ ኤደ መኻ አል ሸ ሲላ ኤተ በናገ ል ረባ። 3ኢኻ ኤበኢካ አመኢያ ከጸጋ ደ በዪዥካሥ ከረባ፤ መገሹዳኼ ኖጎኻ ጎሲያ፥ ሾከ መዦጓ ኮዎማ ከምሲያሣኼ። 4ኸኸካ መገ ላ ከረባ፤ ማገሳቆዳኼ ኖጎኻ እገሸ ገዪፆቋ፥ ከምፐፐል እገሻ ከገሸ ማሲሣኼ። 5ገመኻ፥ ደ ጎሲያ ከደ መዦጓ ኤያሥ ኤያ ከደ መሲይሣኳ፥ መከላ ኤለአ ደ መዴራ ከሙሳ፥ ኤከምበፁዋ መኩዋ ከገፋሌ ክርስቶስ ካል ረባኳ። 6ከፄ ዳ አለአ ከምዌ አማመሠ ረባ ነጸገጸጋ ደ በበፀካ ማገሳሥ ከአ፤ ማጠኻኸኼ ከገሻ ኤተ ባንዢገካ ኸማኳ። 7ካ ማገሰኺልኼ ከሾከ ጸጋ ከለኣኼ። 8አኻ ገፀ ቤያኽኢ ኒል መጓ፥ እኽላኸን ከንዶጎ ኤታ በኽኢካ ነመዪዦጓ። ካ ኢኻ ኤኢደ መዪዦጓኳ! 9መገ  እላ፥ መደ ገሸል ዳ ከኸገሻኳ፥ እማም ኮዎማም አለአ ቢፐከሥ ነመዪዦጓ። 10ዻምበኻ፥ ኣምባለኸሥኳ ዳ ኤተ ከማገ ል ኤታ! 11ፐኾቆ መደዳ አል መጓ ከኸ እኔያ፤ ማገሰኺልኼ ከመደዳ አል መጓ ኤተ ባንዢገካ ኸማኼ። 12በኢካን አጸጋ ሜታ ሜታ ደ በደካ ሾከ መደዳ አለአ፤ ዳ ኤተ ቢደካ እማም ከገጸፃኳ በዪፀኮቆ ጸጋ አመገሸሠማ። 13መዪዦጓኸን በፐኮቆ ዳ አለአ ኮዎማ ከኸ እኔያ፥ ከማገማሥኳ። 14ዳ ኤተ ከምፐሥ ከኸ እኔያ ኮዎማ፥ መዪዦጓ። ካ ቢከለካ፥ "ኣምበናሥ አም ኤተ ባዥገካ፥ ፈርሥ ነመሻኳ፥ ከምዪዦጎ ክርስቶስ ነጸገኡ።" 15ካ፥ አዪርኸካ ዝንዜን ኤያላሥ ኤከምኢኸካ፤ ኢኻ ኤደ መገመኻ፥ መኢኻኼ ኤደ ተሞኼ። 16ከፄ በደካ አንጅ አለአ ገንሠማ፥ ደኻ ገሸለማ በላ መሸኸሠን አንጅለኻ። 17ኣምባለኸሥ ዳ ኤተ በኦከሽ አረባ፤ መደኻኼ ከደ ማኤሚለማኼ። 18ናኽ ዪጪል አመዪዥሥ ገፉጫ፤ መደኸኼ አደ መፋ አኻ፥ መኤመኸከሠኼ ጸገኻኳ። 19ኣታኣኸስ ከጌአ መዪዥሥ ሎርጋ፥ ከጌኣ ከፄ ኤታ ያሱስ፥ ከጌኣ ኤተ በኸከሥ አመዪዥሥ ገፉጫ ካኻ፤ ዬኤኻ ከእልኻ፥ ኸኸካ መገ ላ ከኤታኳ። 20ነዳ ነኮዎማ መዱጎክ ኸኸካ መገ ላ ከረባ ከበባ ከፄ ኤቶኳ ያሱስ ክርስቶስ። 21ከፄ በኸከኸካ ከኤታ ገሂን፥ ኣገሰኺልስ ኣሥ እልኸኻ! 22አኻ ጋፋ፥ ኤያሥ በኻገሰካሥ ከኤታ ያሱስ፥ አገሰኸካሥ ከጉንዛለኻኳ። 23ኤያሥ በደካ ክርስቶስ እልቆ ገሙንፀ ደ ገዴራ፥ ጉንዛኳ እልቆ እገፋለማ፤ ከፄ በደካ ገሙንፀ ደ ገዴራ ጸገ ክርስቶስ፥ ባሸከኸንዥገን ክርስቶስ አ ነመቴያ። 24ኤያሥ ባገሰካሥ ገሙንፀ ደ ገዴራ ከክርስቶስ፥ ነካገሳሥ እገፋኳ ከጉንዛለማ ነዳ ነኮዎማ። 25አኻ ጋጉንዛ፥ ሄኸሽ አኽኳ ጋፋለኻ ኤያሥ በሄከሽ ክርስቶስ ገሙንፀ ደ ገዴራ፥ ባተገርኮቆ እልቆማ ከፄማ በኸካ፤ 26በከጦካ ክርስቶስ አለአ ከመዪዥሥ ገሙንፀ ደ ገዴራ፤ መዪዥሠማለማኳ ከገሻለማ ከኣይ ማጩጾቋኳ፤ 27ኤኤለአ በኣጎካ አረባ ኤከማገማሥ ገሙንፀ ደ ገዴራ ከገሂን ኖጎማ፤ በኣጎካኳ ኤከምዳ አ መዪዥሠማ ከኤተ ባንዢገካ ቆቆማ፥ ኤተ በበፀካ መጫ ጋያ ከመኮጨኸማኳ። 28ጉንዛ ኤያሥ በሄከሽ እልቆማ፥ ነሄሽ እገፋለማኳ፤ ጉንዛ ኤተ በሄከሽ እገፋለማ በሄከሽ እልቆማ። 29አኢካንኼ ጸጋ ኤተ በካቸከካኽ ከጸገማኼ፤ ጸጋ ኮዎማ በሻምበካ ከጸገማ በከኸካ ደ መሳ፤ ኤያሥ ኤያ በጦካ ክርስቶስኳ ከገሙንፀ ደ ገዴራ። 30አኳ ጎ ጸገ ክርስቶስ። 31በከለካ አመዪዥሥ ሎርጋ፥ "ከፄ አለአ ከምበፀሽ ጉንዛ በበማ ከኤዬማ፥ ከምዻቆሥ እገፋለማ፥ ከምዱዋ ከምበንደማምኳ በጫ ሜታ።" 32ገጸፃ አል ሰ መዪዥሥ ሎርጋ አለአ በቦቆማ፤ በኢካ ካራ ኤበከለካ አ ከፄ ክርስቶስ ከገሙንፀ ደ ገዴራኳ። 33እገሻ አለኣኸን በዪርካ አኻኳ፤ ነሄሽ ጋጉንዛ ኮዎማ እገፋለማ ኤያሥ እልቆማ፥ ነኸ እገፋኳ ገሂን ከጉንዛለማ።

will be added

X\