ከደ ኤፌሶን 4

1አራ ኤተ ቢያርፉንጨካ ከፄ ኤታ ያሱስ፥ ከመገሸራ ካኻ ኤከምኢኻ ኤጸጋ ደ በኦካ አረባ ኮጎ ሾካለማ። 2ጦኸኽ ጸገኻ ከገቻ፥ ኣጨኻ መሌአይላ ከገቀማኳ፥ ኣፈለኸሽ ከማሄሻኳ። 3ከመገማ ኤተ ከማፉንጨኽ አኻ፥ ሻምበኸካ ነመዜኽ መዳለኻ ከመዪዥሥ ገፉጫ ሜተም፤ 4ማጦዪላ ኤተ በከኦካ አረባ አኻ ኤከመንዘ ኺል፥ ኤያሥ በደካ ሜተም፥ ኤያሥ ኤያ ጸገጸጋ ሜተም፥ ገፉጫ ሜተምኳ። 5ኤተ በደካ ኤታኳ ኣሥ ሜተም፥ መገሚላ ሜተም፥ ማጩጻቋኳ ሜተም። 6ኤተ በደካ ረባ ኣሥ ሜተም፤ አ በበ ኮዎማ፥ ኤተ በኢካ ነዳ ነኮዎማ ከምጻ፥ ኤተ በከደካ ከዳ ከኮዎማ በኢካ ኖጎ ኮዎማኳ። 7ሜታ ሜታማሎኳ በኮዸበከንዥገን መገ ኤያሥ በርኪል ክርስቶስ ከመኸማ ካኳ። 8ከለአ በከለካ አመዪዥሥ ሎርጋ፥ "አ በተኮካ ከጎዛ፥ በ ጻገካ በበኽ ጸጋ፥ በከኸካ ደ መኻ ከጸጋኳ።" 9መከላ "በተኮካ ከጎዛ" መጨገሰማ ኣሤያ? መጨገሰማ ነገሲቋ በብተኬ ከኤበ እኔያ ከለአ ከገቻ። 10ኤተ በብተኬ ከኔያ ከገቻ ከኤተ በተኮካ ከጎዛ ከምጻ ኣሥ ሜተም። በከጦካ አለአ ከመሙቾቆ ዳ ኤተ በኢካ ነኔያ ነጎዛ ኮዎማኳ። 11ኤተ በኸኬ ደ መኻ ከጸጋኳ ኣሥ አ፤ በጦከንዥገን ጸጋ ሜታ ሜታ ሰ ገትገ ክርስቶስ፥ ሜታ ሜታኳ ደ መዪርጓ፥ ጀንዳ ደ ማቲስ ሰ ማገ ላ አል ረባ፥ ጃጀንዳኳ ደ መዜኽ ደ ገዴራ ከደ መትገሠማ ከማምኳ። 12በከጦካ አለኣኳ፥ ከመጦሥ ደ ገዴራ ኤከመገከሥ ከመደደ አል ማሄሻ ኤተ በኢካ ነጸገማም፥ ከመንዥገሥ ጸገ ክርስቶስኳ። 13አለኣኳ ካሥ አል ኦከ ከምዶኳሽ ኮዎኳ ከመገሚላ ሜተም፥ ከምዶኳ ሜተም ነመገም ዱ ረባ፤ ከምዳ ካኳ አመዳ መዥገኽ ጸጋ፥ ኤያል ክርስቶስ ኤተ ባንዢገካ ቆቆማ። 14ካ ነለአ ከገት ከማጦኮካኸኼ ከመትገሣ አል ደ ጎልጎዛ፥ ደ በንጠከኽ ጸጋ ከኻንዥዣለማም፤ ከምዶኳኼ ኤያል ኢዳ ደ ናንዢግ ጎ መኢቾጓ፥ ኤያል ዳ ኤተ ናኦቸኽ አመመኽ ኣያ ከገአ ከገት ናፉጭ ዙባ። 15በላ መዳን ኤኤለአ፥ ዎኼ እገሾኳ ኸገሻ ከማሄሻ፥ ፈገኮካቆ ከንዶጎ ኮዎማ ካሥ አል ኦከ ከምዶኳሽ ኮጎ ክርስቶስ፥ ኤተ በደካ ካኳ እልቋ። 16ከንዶጎማ በኮካሰንዥገን ጎ ጸገጸጋ ኮዎማ በምፉንጨካኽ ከጋቼሳኳ፤ ኖከ በደካ ጎ ጸገጸጋ ኮዎማ መደዳለማ፥ ከምፈጋቆ ኮዎ ጸገጸጋ፥ ከመዥጋ ከማሄሻኳ። 17ካ ከመገሸራ ካኻ በቦቆ ከፄ ኤታ ያሱስ፥ ነለአ ከገት ኤከምበፀኻ መኢኻ ኤያል ጸጋ ደ በበፀካ መዳ አል ረባ፥ ደ በሁለካን ዳ ኤተ ባንዢገካ በና። 18በ ካይለንዥገን ሳምቢርቆማም፤ ከፄ መዥግ እላለማም ቢኤምካ ረባ፥ ቢፐከሠንዥገን እማም ነመኢያ ኤተ በኸካ አረባኳ። 19ቢሃለከሽ መዜኽ እልቆማም ቢከዠኬል ከጸገማም፥ ቢደካ ሾከ ገንሣ ዳ ኮዎማ ኤተ በንዠጎከሥ ጸጋኳ፥ ኢነኮቆኼኳ። 20አኻኸን አኸገምከሸንኼ ኖጎ ክርስቶስ ኤኤለኣኼ። 21በኢካ ካራ ኤዳ ቤያኽገሶቆን አኽ ፄማ፥ ቢትገከሠንዥገን ካኻ ኸገሻ ኤተ በኢካ ኖጎ ያሱስ ክርስቶስ። 22ካ ፐኾቆ ገደገነ ጸገኻ ኤተ ቤያኽከኢ ገፀ፥ ኤተ በቴካ ከመንጠኽ መአጀባ። 23ነዪዣይል ቁንዘኻ ከእልኻኳ፥ ነድ ከኽኻ። 24ኢሰኸሥ ጸገ ኽኻ፥ ኤተ በዘዘኬ አረባ ኤመኳለማ፤ ኤኤለአ ከምፈለኸከሽ መኢያ ኤበኦከሽ ረባ፥ ከምዪዥኻሥ ነታሰማ፥ ከምደኻ ገሸለማኳ። 25ከለኣኳ፥ ኣገሸኸሥ ኸገሻ፤ ከፄ በኮደካ ኮዎኳ ጎ ጸገጸጋ ሜታ፥ በፀኸሽ ማገሸሥ ጎልጎዛ። 26ኤከምቱኻናኳ፥ መሮቆኼ አገቱዋለኻ አኻ ከገንሣኼ። መልምኸኮቆኼ ከእል ገቱዋ ኦካኼ። 27መኸኸከሰኼ እንዶዋ ከሴጠናኼ! 28ኤተ በሎኮካኳ ማኮሊል ዳኼ ገልኳኼ። ኤከምፈለከሸን መተጸከሥ ደ ዢጋ፥ ነሻምብ ነመደ ገሸል ዳ ከኤለማ። 29እገሸኸሥ ገሸል እገሻ ኤተ ከምተጸሥ ጸጋ ኖከ ከምገሸላ ካ፥ ከደ በገሰኮቋኳ ኤተ ከምጫ ኸማ፤ መፐሠኼ አገንሠ እገሻ ሜተል ነሰኻኼ። 30መቱዋሠኼ መዪዥሥ ገፉጫ አል ረባኼ፤ ከፄ በደካ መዪዥሥ ገፉጫ ማቲሥ መዳለኻ አል ረባ፥ በኸገምካ ኤከማንዢል ረባ አኻ ዝንዜን ኖከ መብዳ። 31ነሃታሥ ኖጎኻ ሾከ ማንጨ እላ ኮዎማ፥ ገቱዋ፥ ከማመሣ፥ ገላኳ ኤያሥ ኤያ ከመቴሥ ፄ ጸጋ ከገንሠማ ከኮዎማኳ። 32ኣሌአኻይል፥ ኣተጸኸሥኳ፤ ኤያሥ በበፀከሽ አረባ ገንሣለኻ ከንዶጎ ክርስቶስ፥ ኣምበፀኸሽ አኽኳ!

will be added

X\