ከደ ቆሎሳይስ 3

1በኻፈርካቆንዥገን ከክርስቶስ ነመሻ፤ ካ፥ ኣኣጎኻ ዳ ኤተ በኢካ ነጎዛ፥ ጎ በኢከሽ አክርስቶስ ከኤላ ጉንዘ ረባ። 2ራቆኸኽ እልኻ ኮጎ ዳ አል ጎዛ፥ መራቆኸኸኼ ኮጎ ዳ አል እኔያኼ። 3በኸከሸከሥ ከኤበ እኔያ፥ ባጸፀካቆ ኽኸ መኢያለኻ ከክርስቶስ ኖጎ ረባ። 4ኖከ ከማትጋሥ ክርስቶስ ኤተ በደካ መኢያለኻ፥ ከማትገኸካሥ አኽኳ ከገሂን ከአ። 5ካ ቴኸሥ መአጀባ አል በጫ ነጸገኻ፤ እማምኳ ለሙራ፥ መዦጓ፥ መአጀባ ከኻ፥ መአጀበ ገንሣ፥ ከመሲሣ ኤተ ቢዪርካ ኤመዴራ ከረበ ጎልጎዛ። 6ከፄ ዳለአ ኮዎማኳ ከምዳ አማመሠ ረባ [ነጸገ ጸጋ ደ በበፀካ ማገሳሥ ካ]። 7አኻ እልቆኻ ነመኢያለኻ ቤያኸድ ኤያሥ አለአ፥ ቤያኽከኢያኳ። 8እኽላኸን ትሸኾቆ ሾከ ዳለአ ኮዎማ ነጸገኻ፤ እማምኳ ማመሣ፥ ማጎማ፥ ገንሠ እልኻ ኤያሥ ኤያ መቴሥ ፄ ጸጋ። መፐሥ ዳኼ ነሰኻ እገሻ ኤተ ከምዪፆቆ ጸጋኳ! 9ማገሸኸሠኼ ጎልጎዛኼ! በኸትሸኮቆንዥገን ገፀ ጸገኻ ከመደዳለማ ነጸገኻ፤ 10በኽኢሰከሠንዥገ ን ጸገ ኽኻኳ፤ ኤከማምባለኸሠን አኳ፥ በኢካ ረባ ኤተ መዘዘማ ነመጦ አ ከኽኻ ኤመኮሣለማ። 11ከምደማ ኤለአ አኢካንኼ መከላ ሾካ ጀንዳ ከዶጎ ዪሁዳ፥ ደ ቢሸከሣ ከደ ቢበፀካ መሹሥ፥ ጀንደ ጸጋ፥ ሾከ ጸጋ ደ መኤመሸማ፥ ዎደ ደ መፐሣ ነዎደኳ። ክርስቶስ ከጸጋ ከኮዎማ ነዳ ነኮዎማኳ። 12አኻ ደ በኸሽለካሥ፥ ደ በኸዪዥካሥ ከረባ በኻሄካሽኳ፥ ኢሰኸሥ ኤኣ ጎከሣ፥ መገኽ እላ፥ መራቆኽ እልቋ ከገቻ፥ መሌአይላ ከመቀሞቆማኳ። 13ኣቀመኾቆ፥ ኤከምኢያን ናኻ ጸጋ ሜታ አዳ ኤተ በቱከሥ እለማ ነጸጋ ጀንዳ፥ ኣምበፀኸሽ! ኣምበፀኸሽ ኤያሥ በበፀከሽ አክርስቶስ ካኻ። 14ነለአ ኮዎማ ኣሄኸሽ! ማሄሻ ኤተ ከማፉንጨኽ ከምትቶቆ ከምጦዋ ከሜተም። 15ነኢ መገማ አል ክርስቶስ ኒልኻ። ዳ ኤተ በከኦከሥ አረባ አኻ፥ ኤከማጨኻን መገማ፥ ኤከምደኻን ጸገጸጋ ሜተምኳ። ከለኣኳ ኸኻ መገ ላ ከረባ። 16ነኢ እገሸ ክርስቶስ በቦቆ ኒልኻ፤ ኣትገኸሥ ከመገመኻ ከኮዎማ፥ ኣገሸኸሥኳ ከጌአ መዪዥሥ ሎርጋ፥ ከጌኣ ከፄ ኤታ ያሱስ፥ ከጌኣ ኤተ በኸኬሥ አመዪዥሥ ገፉጫ ካኻ፥ ዬኤኻ ከእልኻ፥ ኸኸካ መገ ላ ከረባ። 17ዳ ኤተ ከምደኻ ከመገሸኻ ኮዎማኳ፥ ደኻ ከፄ ኤቶኳ ያሱስ። ከአኳ ኸኸካ መገ ላ ከረባ ከበባ። 18አኻ ጋፋ! ኤተ በደካ ገሸለማ ነኸ ኤቶኳ፥ ኣገሰኻሥ ከጉንዛለኻ! 19አኻ ጉንዛኳ! ሄኸሽ ጋፋለኻ፥ መንሠኸካይልኸኼኳ! 20አኻ ኢዳ! ነዳ ነኮዎማ ገሰኺልስ ዶጎ ኤበኻ! አለአ መገማ ነኸ ኤታ። 21አኻ እምበበ ኢዳ አለአ! ኤከምበፁዋን ኢዳለኻ መከበብዋ፥ መቱኸሠኼ እለማም ከማመሣኼ! 22አኻ ዋደ አለአ! ኣገሰኻሥ ከኤተኻ ካል ኤበ እኔያ ነዳ ነኮዎማ፤ መደዳለኻ ነድ ከፄ በኸጤካ ከኤቶኳ ከያሱስ ከመዪዥኽ እላ፥ መደዳኼ ከማገ ል ጸጋ ከማትጋሣ ነኸ ጸጋኼኳ። 23ኣሥ ዳ በኸደካ ኮዎማ፥ ከመገኽ እላ ደኻ ኤዳ ቤያኸድ ከኤታ፥ መደኻኼ ኤከጸጋኼ። 24ገመኻ፥ ዳ ኤተ በጦከሥ አኤታ ከኢደማ ኤከምኮለኻ ኖጎማ ኤበና፤ ኤታ ኤተ በኸከደካ አኽኳ፥ ከኤቶኳ ክርስቶስ። 25ከፄ በበፀካ ረባ መሃቸሥ ጸጋ፥ ኤተ ከምዳ ገንሠማ ከምሮቆ በነ መደዳለማ።

will be added

X\