ከደ ቆሎሳይስ 2

1አራ ካኻ ከደ በኢካ ነላዎዲቄያኳ፥ ኤያሥ ኤያ ከደ በበፀካ መገመሥ አራ ከኸማ ኮዎማኳ፥ በራኣጎካ ኤከምገመኻን እንዘሥ በቦቆ ኤበርኢካ ነማቆራ ካኻ። 2በርከደካ አለአ፥ ኤከመንዥጉዋይልኸን ኤከምኢዋን ከማሄሻ ከሜተምኳ። በራኣጎካ ኤከምዸብዋን ማምባለሠማ  ዝንዜን፥ ኤከማገሙዊለን ገጸፃ አል ረባኳ ኤተ በደካ ክርስቶስ። 3ባጸፀካቆ ደ መጫ መገመኻ ከመገመሸማ ኮዎማ ኒል ክርስቶስ። 4ዳ በርከገሸከሥ አለኣኳ፥ ኤከምበፃ ጸጋ ሜተል መንጠኸን አኻ ከገሸል እገሸ ጎልጎዛ። 5ኤከምሃተራሠን ከጸገም፥ ከገፉጫኸን በርኢካ ኖጎኻ፤ በርገምከሥ ከማገ ላ፥ በላ መንደኸሠን፥ ኤበኸዥገካ ነመገሚላ ኤተ በኸጨካ ከክርስቶስ። 6ካ ኤያሥ በኸርኮቆ ያሱስ ክርስቶስ ኤታ፥ ኢኸካ ከአ። 7ዥገኸሽ ትኻ ዝንዜን፥ ኮኻሽ ነጸገማ፤ ራቆኸሥ ከመገሚላ ኤተ ቢትገከሥ ካኻ፥ መበፀኸሸኼ መኸ መገ ላኼ። 8ዜኸኽ ጸገኻ፥ በላ መዳን ኤመትገሣ አል ክርስቶስ፥ ኤከምበፃን አጸጋ ሜተል ማጠኽ አኻ ከመገመኻ ካል እልቆማ ከማቶቋ ኤተ በዎኬ ነመኢ እምበፈጋ ኤያሥ ኤያ ነመዥጋ ኤተ ባኤምካሥ ከኻ በካጤከሽ አጸጋኳ። 9ክርስቶስ መከድ ነኔያ ጸጋኳ፥ ኪልቆማኸን ረባ ኸማ። 10አኻኳ ከክርስቶስ በኸከጨካ ገሸል መኢያ፤ አ ነመዥጋ ኤተ በካጤከሽ አጸጋ፥ ነምሙሳኳ በጨካ በቦቆ ገፋሌያ። 11ኖከ በኸደካ ከክርስቶስ ሜተም ቢሸከሠንዥገን አኻ፤ መሸሥ አኻ አለኣኳ በላ መዳን ኤተ ቢደካ ከኤለ ጸጋ፥ ኤተ በደካ ከክርስቶስ። ከመሸሣ ከለአ በኮከጨገካስ ነመዥጋ አል ገንሣ ኤተ በደካ ነጸጎኳ። 12ኖከ በኸጩጸካቋ በኸሃንዠካቆ ከክርስቶስ፥ በኸፈርከሠንዥገን ከክርስቶስ ነመሻኳ ከመገሚል መዥጋ አል ረባ፥ ኤተ በፈርኬቆ ክርስቶስ ነመሻ። 13ገፀ ቤያኸድ መሸማ ከፄ ገንሣለኻ ከማንዢግ መሸሣለኻኳ፤ እኽላኸን በጦከንዥገን ረባ አኻ ከክርስቶስ ደ በኢካ፥ በበፀከሸንዥገን ገንሣሎኳ ኮዎማ ካኳ። 14አ በቴከሥ መቆታ አል ገንሣ ኤተ በተምበኮቆ አኳ፥ ከመቱ መቆታ አ ነጋገድ ጃ በቼከሸንዥገን ዳ ኤተ በኣጎካ ተምባ ነጸጎኳ። 15በሙቸኮቆ ከንዶጎ ክርስቶስ እምሙሳ ደ በጨካ መዥጋ ከገፋሌያ፥ በዠከስ ከኤላና በዪፀኮቆ እማምኳ። 16ከለኣኳ ማቶቆኼ አጸጋ ሜተል አኻ ከፄ ደ መሳ ከደ መፋ፥ ከፄ ዚፈ ኤያሥ ኤያ ከዚፈ መሌኤኽ ጽጃ ከኦከ ሙሳኳ። 17ዳ አለአ ኮዎማ ፉሠ ዳ ኤተ በኢካ ከመዌያ፤ ኸገሸ ጸገማኸን ኣሥ ክርስቶስ። 18ጸጋ ሜታ ከመኢያ ኤዳ ቤጦኽ ጸገማ ከገቻ፥ ኤተ በትገከሥ መዴር ሰ ገትጋ አል ጎዛ፥ ከምሸኮጎ ከመጎሎጓለማ ከሜታ ሜታ፥ ማዬከሠኼ አኻ ከበናኼ። ሾከ ጸጋ አለአ በተኮከሥ ጸገማ ካሥ ገሳንዘ በጫለማ፥ በሸኮጓኳ፤ 19ኢያገሰካሠኼ ከክርስቶስ ኤተ በደካ ከጸገማ እልቆማ። ከንዶጎማ በዸበካ አኮዎ ጸገጸጋ ደ መሳ፥ ባራቆካኽ ጋቼሳ ከትጫ ከምፈጋቆ ከመዥግ ረባኳ። 20ኤበኸሸካ ከክርስቶስ፥ ኤበኸሰካ ከመዥግ እምሙሳ ደ በካጤካቆ ጸጋ፥ ካሤ በኸከኢን አኽ ኤጸጋ አል ኤበ እኔያ፥ በኸካገሳሠን አኽ ከማቶቋ ኤተ በከለካ፥ 21"መራቋሸኼ! መራቋከሠኼ ከሰኡ! መዳከሠኼ ከኤሉዋ?" 22ዳለአ ኮዎማ፥ ኤከምዱካ ዳ ከምቴያ ነቸቻኳ። እማም አለአ ኣሥ ማቶቋ ከመትገሣ አል ጸጋ። 23ሾከ ማቶቋ ኤመዴራ ከሰ ገትጋ አል ጎዛ፥ ኤመኮሥ መጦኽ ጸገጸጋ ከገቻ፥ ኤማምብሰሥ ጸገጸጋኳ በኮከሥ መገመኻ። ነደንኳ፥ ዳለአ በርኮቆ ጸጋ ኮጎ መሾጓ አል ኤበ እኔያ፥ አጨካኼ በናኼ።

will be added

X\