ከደ ቆሎሳይስ 1

1አራ ጳዉሎስ ከማሄሻ ካል ረባ ኤተ በርደካ ሰ ገትገ ያሱስ ክርስቶስ፥ ከዱዌቦኳ ከጢሞቴዎስ፥ ቢልቆተካ ገትጋ አለአ 2ከኢዴባ ደ ገዴራ አል ኤበ ቆሎሳይስ ደ በደካ ካል ረባ፥ በገምኪል ከክርስቶስኳ። መገ ከመገማ ነድ ከአኻ ኖጎ ረባ በቦኳ። 3ኖከ ቢልዴረካ ካኻ፥ መዱጎክ ቢልኸካ መገ ላ ከረባ ከበበ ኤቶኳ ካል ያሱስ ክርስቶስ። 4ቢልገሰኮቆንዥገን ከፄ መገሚላ ኤተ በኸጨካ ከያሱስ ክርስቶስ፥ ኤበኸሄከሽ ደ በደካ ካል ረባ ኮዎማኳ። 5ዳ በኸከደካ አለኣኳ፥ ከፄ በኸካጦኪል ከዳ ኤተ በጦካሥ ካኻ ነጎዛ፤ በኸገሰኮቆንዥገን ካል ገሲቋ ከፄ ማጦዪላ አለአ ነመትገሥ ኸገሻ አል ሰ ማገ ላ አል ረባ። 6በዎኬ ሰ ማገ ላ አል ረባ አለአ ኮጎኻ፤ ኤያሥ በጨካ ኸማ ነኤባ ናል እኔያ ኮዎማ በጨካ ኸማ ኖጎኻ፥ በኢካ ነመፈጋይላኳ ካል ኦከ በኸገሰኮቆ ሰ መገ አል ረባ በኻምባለከሥ ኸማኳ። 7ከፄ መገ አል ረባ በኸገምከንዥገን ኖጎ ማሄሽ ኤጳፍራ፥ ኤተ ቢልደካ ዳ ኮዎምላ፤ አ ኤያለምላ መገሚል ኤተ መደዳ ከክርስቶስ፥ 8በገሸከሠንዥገን ካይላ ከፄ ማሄሻ፥ ኤተ በኸኬ አመዪዥሥ ገፉጫ ካኻ። 9ከለኣኳ ካል ኦከ ቢልከገሰኮቆ አለአ፥ ኢለንደከኸንኼ ነመዴር ረባ ካኻኼ፤ ቢልዴረካ ካኻ፥ ኤከማገመኺለን ዝንዜን ዳ ኤተ በኦከሽ አረባ፥ ኤከምጨኻን መገመኻ ኮዎማ ከማምባለሣ ኤተ ከምኻ አመዪዥሥ ገፉጫኳ። 10ኖካ ና ከምኢኸካ ከገሂን ኤታ ኤተ በኦካ አኻ፥ ከምደኻ ዳ ኤተ ከማገ ካይል አ ኮዎማኳ፤ ከምጨኸካ ኻ ከገሸል መደዳ ኮዎማ፥ ከምፈገኻቆ ነመገም ረባኳ። 11ኤከምፈለኸሽ መቀሞቆማ ነዳ ነኮዎማ ከመዥጋ፥ ነኸ አ ነበቦቆ ገሂን ናለማ መንዥገሣ ካኻ። 12ከማገ ጓ ኸኸካ መገ ላ ከረባ ከበባ፥ ኤተ በኸከፈለከሽ ኤከመንዘ ኺለን ገሂን ኤተ በጦከሥ አ ከደ በደካ ካለማ ነገፋሌ መዪዦጓ። 13በፐኮቆ አ አኳ ነመዥግ መጓ፥ ባተገርኮቆ ከገፋሌ ማሄሽ ዱማ። 14በካንዠኪል አኳ ከዱማ፥ በኮከዸበከንዥገን ማምበፀሽ ገንሣኳ። 15አፈለከሸኼ ጸጋ መገመሥ ረባ ከኸማኼ፤ ክርስቶስኸን መኮሥ ረባ ኤተ ቢገምከሥ ከኻ፤ አ ነመዘዛ ነኮዎማ በቦቆማ። 16ዳ ኤተ በኢካ ነጎዛ ከኤተ በኢካ ነኔያ ኮዎማ፥ ደ ኤተ ባገምካሥ ከኻ ባኤምካሣኳ፥ እምጥሳ ከደ ገፋሌያ ኮዎማ፥ እምሙሳ ከደ በካጤከሽ አጸጋኳ፥ ከንዶጎማ ቢዘዘኬ እማም፤ ዳ ኮዎማ ቢዘዘኬ ከንዶጎማ፥ ቢዘዘኬ ካኳ። 17አ ነመዘዛ ነኮዎማ ቤኢ መሲቆማ፥ በጨካ ዳ ኮዎማኳ መኢያ ከንዶጎማ። 18አ እልቆ ገሙንፀ ደ ገዴራ፤ ገሙንፀ ደ ገዴራኳ ጸገማ። አ ማጦሽ ዳ ኮዎማ፤ ኤከምዳን መሲቆማ ነዳ ነኮዎማኳ፥ ቤሲቆ መፈርሣ ነመሻ። 19በኣጎከንዥገን አረባ በባ፥ ኤበደካ ኤያሥ ኤያ አዱማ ረባ ኸማ። 20አ ከንዶጎ ዱማ በገ ከኽ ዳ ኮዎማ ከጸገማ፥ በጦከንዥገን ማገ ነኔያ ከጎዛ ከመሃ ክርስቶስ ከኤተ ባርከካ ነጋገድ ጃኳ። 21አኻ ገፀ ከገንሠ ገሳንዛለኻ ከመደዳለኻኳ ቤያኽከሃታሥ ነረባ፥ ቤያኸድ ከብታለማኳ። 22እኽላኸን ከፄ መሸ ዱማ ከጸገማ፥ በጦካ አረባ አኻ ደ መዪዥሣ፥ ደ ባንዢገካ ቆቆማ ከመሸ ሠማኳ፥ በሂኢኮቆ አኻ ነታሰማ። 23ነደንኳ፥ በላ መንደኸሥ በላ መንዙበኻኳ፥ በኢካ ካኻ አመዻቆሽ መገሚላ። መኮለኸቾጎኼ ነማጦዪላ ኤተ በኸካ አሰ ማገ ል አል ረባ ካኻኼ። ሰ ማገ ላ አለአ በኢካ ነማቲሰማ ከጸጋ አል ኤበ እኔያ ከኮዎማ፤ በኸገሰኮቆንዥገን አኽኳ፤ አራ ጳዉሎስኳ ኤተ መደዳለማ። 24አራ እኽላ በራገካይል፥ ኤበርርኮቆ ማኣንሠሣ ከፄኻ፤ ከገሙንፀ ደ ገዴራ ኤተ በደካ ጸገ ክርስቶስ፥ በርከዪጨኮቆ ከማኣንሠሥ በጨ ጸገም ኤተ ባሸካዬኽ ነማኣንሠሣ አል ክርስቶስ። 25በርከደካ ከገሙንፀ ደ ገዴራ፥ ኤከማቲርሰን እገሸ ረባ ካኻ ኮዎማ፥ ኤያሥ በከትገኬሥ በኸኬ አረባ ካራ። 26ቤያጸፃቆ ገፀ ገፀኸን ሰ ማገ ላ አል ረባ ከጸጋ ከኮዎማ፥ እኽላኸን ባትገካሠንዥገን ከደ በደካ ካል ረባ። 27ረባ በኣጎካ መትገሠማ ከጸጋለማ፥ እንዘሥ ኤበደካ በቦቆማ ኤተ መጨ ገሂንኳ አገጸፃ ኤተ በጦከሥ አ ከደ በበፀካ መዳ ሾካለማ፤ ገጸፃ አለኣኳ ክርስቶስ ኤተ በደካ ማጦዪል ገሂን አል ግዢ ግዥ፥ በኢካ ኖጎኻ። 28አይላኳ ቢላቲከስ ክርስቶስ፤ ኤከማዋኸን ሜታ ሜታማለማም ነመኢያ ኤተ ቢጨካ ከክርስቶስ ሜተም፥ ኤከምሂኢኮቆን እማም ነታሰ ረባኳ፥ ቢለገሸካ ከጸጋ ከኮዎማ፥ ቢልትገከሥ ከመገመኻ ከኮዎማኳ። 29ከአ በርከሌኤካ በርካቆርካኳ፤ በደካ መዥጋለማ ኒለም ከበቦቆ መንዥገሣ።

will be added

X\