መደዳ አል ሰ ገትገ ክርስቶስ 3

1ኖካ ነሜታቆ ቤዽ እምጴጥሮስ ከዮሃንስ ነአንጅ ገዴራ ነአንጅ ሰናኮ ከመዪዥሥ መፀ ገዴራ አል ዶጎ ዪሁዳ። 2ናሥ ኦካ ና ቤጹሬ ጸጋ መዣ ኤተ ቢካፖቌሥ ከገሙ ሜታ። ቢጦሥ አ ኖካ ኖካ ነግሰ መፀ ገዴራ ኤተ ቢኦ ፄማ "ማንደጎን ግሰ መፃ፥" ኤከምቆናን ለማና ኖጎ ጸጋ ደ ቤኩ ከመዪዥሥ መፀ ገዴራ አል ዶጎ ዪሁዳ። 3ኖከ ቤገመሥ መዣ አኳ እምጴጥሮስ ከዮሃንስ ሚከኩ ከመዪዥሥ መፀ ገዴራ፥ ቤቆን ለማና ኖጎማም። 4ቢተገሽ እማምኳ ኸማም ነጸገማ፤ ቤከል ጴጥሮስኳ፥ "ዪሬ አይላ!" 5ቤኦሥ አኳ፥ ኤከምኹካ ዳ ቤቼ ጺ ኮጎማም። 6ቤከከል ጴጥሮስኳ፥ "አርጨካኼ ኣያ ከለማናኼ፤ ዳ ኤተ በርጨካኸን ከምኸራ ካም፤ ከፄ ያሱስ ክርስቶስ ጸጋ አል ናዘሬት፥ ፈርሥ እንዸቾጎ።" 7ቤዻቆ ጴጥሮስኳ ኤለማ ኤላ ጉንዛ፥ ቤፈሮቆ ከጎዛ፤ ናሥ ኦካ ና ቤያኳስ ቾጎማ ከጋቼሰማኳ። 8ቤፈርሥ፥ ቤኢቾጎ ቤንዽ፥ ቤኩ ነቾጎማም ከመዪዥሥ መፀ ገዴራ፤ ቤንዺል ቾጎማ ከመፈርሻ ቤከኽ መገ ላ ከረባ። 9ቤገመሥ በበኽ ጸጋ፥ ኖከ ቤንዺል አ ቾጎማ ቤከኽ መገ ላ ከረባኳ። 10ኖከ ቢያምባለሥ፥ ኤበደካ መዣ ኤተ ቤኢ ነመኢሻ ነማንደጎን ግሰ መፃ ከመቆን ለማና፥ ቢተምዝ ነዳ ኤተ በደካ ነጸገማ፥ ቤሰሥ እለማም። 11ኖከ ቤኮዎቆ አመዣ አ መፐሣ ኖጎ እምጴጥሮስ ከዮሃንስ፥ ቤያምቤ ጸጋ ኮዎማ ከገተምዛ ኮጎማም ከጋሪል መዪዥሥ መፀ ገዴራ ኤተ ቢኦ ፄማ "መረባ አል ሶሎሞን።" 12ኖከ ቤገመሥ ጴጥሮስኳ ጸጋ አለአ ቤከል ከማም፤ "አኻ ጸጋ አል እስራኤል፥ ኣሥ በኸከተምዘካ ነመደዳ ነለአ፥ በከዘርካቆ ኸኻ ነመዪር አይላ? አኽኦከሥ አኽ ኤቢልጦካ አይል፥ ኤከመንዻ መዣ አለአ ከመዥጋለምላ ፌት ከመዪዥሣ ካል እልቆምላኽ? 13ረባ አል እምበፈጎኳ፥ አል ኣብራሃም፥ አል እስያቅ፥ አል ያይቆብ፥ በከኸካ ገሂን ከዱማ ከያሱስ፤ አኻኸን ቤያኻተገሮቆ አ ከኤለ ደ ገፋሌያ። ኤቤሪል ጵላጦስ ከመዠሰማኳ፥ ቤያኽኮዎቆ አ ነኸማ። 14ቤድ ያሱስ መዪዥሥ ጸጋ ከገሸለማ። አኻኸን ቤያኽኮዎቆ አ፥ ቤያኸመርተሥ ጵላጦስ፥ ኤቤዠሰን ካኻ መዣ ኤተ ቤሾቆ ጸጋ። 15ቤያኸሾቆ ኤተ መቼስ እንዶዋ ኮጎ መኢያ፤ ረባኸን ቤፈሮቆ አ ነመሻ፤ ከለአ አይላ ደ መደ ኸገሻ። 16ከመዥጋ ኤተ በኢካ ነፄያ ነለአ፥ በከንዥገካሥ ኤተ ገሙ አ፤ ዳ ኤተ በኸገምከሥ በኸገምካ አለአ በደካ ከመገሚላ ከፄያ ከለአ። በብደካ መዣ አለአ ኒል ኽኻ፥ ከፄ በገምኪል ከፄ ያሱስ። 17"እኽላኳ ኢዴበም፥ ነድ ደ መቼስ እንዶዋ አለኻ፥ አኻኳ፥ በርገምካ ኤበኸደካ አለአ ከምኤመሸማ። 18ቤትቶቆ ረባኸን ዳ ኤተ ቤገሼሥ አ ነገሲቋ ከንዶጎ ደ መዪርጓ ኮዎማ። ቤገሼሥ ኤከማኣንሣሥ መሲያለማ። 19እኽላኳ ኤከምበፀሸን ረባ ገንሣለኻ ካኻ፥ ኣንዠኺል እልኻ፥ ኮለኼ ኮጎ ረባኳ። 20ኤከምጦኻ ኤለአ፥ ከምኻ አረባ ካኻ አንጅ ኤተ ከምዻቆ ኤለን አኻ፥ ከምትጌ ያሱስ ኤተ ቤጦሥ አ ካኻ መሲያ። 21እኽላኸን፥ ካሥ አል ኦከ ከምዌ አንጅ ኤተ ከምጦዋን አረባ ዳ ኮዎማ ከኽኻ፥ ከምደካ መፀቋ ናሥ ጎዛ፤ አለአ ኤተ ቤገሸሥ ረባ ገፀ ከንዶጎ መዪዥሥ ደ መዪርጓለማ። 22ቤከል ሙሴኳ፥ 'ኤያሥ ቤጦ አረባ አራ፥ ከምጦዋ ነኢዳለኻኳ ኤተ መዪርጓ ሜታ፤ ገሰኾቆ አኽኳ ዳ ኤተ ከመገሸሥ አ ካኻ ኮዎማ። 23ነቴ ነሾከ እስራኤል፥ ጸጋ ኤተ ከምኮዎቆ መገሶቆ እገሻ አል ኤተ መዪርጓ አ ኮዎማ።' 24ቤያጦሽ ነሳሙኤል፥ ደ ቤድ ደ መዪርጓ ቤገሽ ኮዎማኳ፥ ቢገሸሥ ዳ ኤተ በደኮጎ ነአንጅ ነለአ። 25ዳ ኤተ ቤገሸሥ ረባ ከንዶጎ ደ መዪርጓ፥ ቢገሸሥ ካኻ፤ ሳ ኤተ ቤጦ አረባ ከምበፈገኻ፥ በዪርካ አኻኳ። ቤከል ረባ ከኣብራሃም፤ 'ከንዶገኡ ከመገሥ ሾካ አል ኤበ እኔያ ኮዎማ።' 26ካኽላ፥ ኤከመገሥ ረባ አኻ፥ ኤከምኮሌቆን ጸጋ ኮዎማ ነንዶ ገንሣ፥ በፈርኬቆ አ ዱማ፥ ከበቦቆኳ በትገኬ ካኻ።"

will be added

X\