መደዳ አል ሰ ገትገ ክርስቶስ 26

1ቤከል ኣግሪጳኳ ከጳዉሎስ፥ "ከምፈላሽ መገሻ ከፄ እልቀኡ።" ቤጦ ጳዉሎስኳ ኤለማ፥ ቤያጦሽ መጻንዶቆ እገሻ ነጸገማ ቤከል፥ 2"አም ጥስ ኣግሪጳ! በራገ ካይል በቦቆ፥ ኤከምዳ ካራ ኖካ ነለአ አመጻንዶቆማ ነታሰኡ እገሸ ተምባ ኤተ በጨካ ዶጎ ዪሁዳ ነጸገም ኮዎማ። 3በራገ ካይል ከበቦቆኳ፥ ከፄ ባገምካ አም ዝንዜን ቾጎ መንዳ አል ዶጎ ዪሁዳ ማከለማለማም ኮዎማኳ፤ እኽላኳ በርሎቆከሥ አም፥ ኤከምገሳቆን እገሻለም ከገቀማ። 4"ኤተ በራጦከሽ ካል ኦከ ኢዳ፥ ኤበከኢካ መንዳለም ኤያብ፥ ነድ ነኤበም ነድ ነዬሩሳሌምኳ፥ በገምካ አዶጎ ዪሁዳ ኮዎማ። 5ቤርኢን ነጋሮቆ ደ ገዴራ ናል ኤበምላ ኤተ በዻቆከሽ እንዶ ገዴራ ዝንዜን፥ ቢኦካ ጸጋ ደ ፋርስኳ። ጸጋ ደ ቤገም አራ ነገፀ፥ ኤቢምሄሻ ቢምፈለሽ መዳ ኸገሻ ካራ። 6በርከኢከቾጎ ዚያለአ ነኸ ተምባ፥ ከፄ በርዜከኽ ዝንዜን ኤከምትታቆ ማጦዪላ ኤተ ቤጦ አረባ ከምበበምላ። 7ከፄ ማጦዪላ አለአ ቢዴረካ ሾካለምላ አሤር ኖቆማ እምበንድ ከረባ ነመጎኳ ከኦካ። አም ጥሳ አለአ፥ ዳ በከተምበኮቆ ዶጎ ዪሁዳ አራ፥ ካሥ ፄ ማጦዪላ ከለአ። 8ኤበፈርኮቆ ረባ ጸጋ ነመሻ፥ ካሤ በኸከሳንዘከሥ በኸከለካ 'ካፈላሸኼያ?' 9"አራ ቤርከሮቆ ከእለም፥ ካሥ ቤያፈላሽ ካራ፥ ኤከምጦራ በበኽ ገንሠ ዳ ነፄ ያሱስ ጸጋ አል ናዘሬት። 10ቤርኢ ነመጦ አለአ ነዬሩሳሌምኳ፤ ቤርሮቆ ገፋሌያ ኖጎ እምበቦቆ ጥስ መፀ ገዴራ አል ዶጎ ዪሁዳ፥ ቤርከኩቆ ከለአ ነደ ገዴራ ኤማንጀማ ከመፀ ማፉንጫ፤ ኖከ ቢኸሥ መሻ ከማምኳ፥ ቤገሽ ኒለም። 11ቤርጦ ከኦኪል በበኽ ቢኦች እማም ነመፀ ገሙንፃ ናል ዶጎ ዪሁዳ ነኮዎማ፥ ቤራኣጎ መጦማ ኤከምሽጡዋን መገሚላለማም። ቤርመሥ እማም በቦቆ ቤርሙች እማም ካሥ ኤዬባ ኤተ በኢካ ነኤብላ ከጃጻ።" 12"መርከኢ ነመደዳ ነለአ፥ ቤርሮቆ ገፋሌያ ኖጎ እምጥስ መፀ ገዴራ አል ዶጎ ዪሁዳ እምበቦቆማ ቤርሎቆሥ ኤከምኹዊለን መዻ ካራ ከደማስቆ። 13አም ጥሳ አለአ፥ ኖከ ቤርኢ ነመዻ ነንዶዋ፥ ቤርገመሥ ኒል ኦካ መዪዦጓ ኤተ ቤሙቾቆ መዪዦጎ ኦካ ቤበሌ ነጎዛ፥ ቤዪዦጎ ነጋንዲለም ከጋንዲ ጸጋ ደ ቢለንኮርሻ። 14ቢልምፋት ኬያኮዎምላ ከኔያ፥ ቤርገሶቆ ሳ ኤተ ቤገሼ ካራ ከሰ ዶጎ ዪሁዳ ቤከል፥ 'ሳኦል! ሳኦል! ካሤ ባካሙቸኪል አራ? ኤከምቱቧኣ መመስ ቻጋ ከማቀዛሥ ጸገኡ።' 15"ቤርከል አርኳ፥ 'ዎዴያሲቆ አማ ኤተም?' ቤኮሎቆ ኤተምኳ ቤከል ካራ፥ 'አራ ያሱስ ኤተ ባኢካ ነማሙWለማ። 16እኽላኸን ፈርሥ ኢቾጎ ከቾገኡ፤ ዳ በርካገምካሥ ካም፥ ኤከምሽለርሠን አም ከኤተ መደዳ ከሹዳ ከዳ ኤተ ባገምከሣ ከዳ ኤተ ከምትገርሥ ካም ካለንኳ። 17ከምትገራ አም ኮጎ ዶጎ ዪሁዳ ኮጎ ጸጋ ደ በበፀካ መዳ ሾከ ዪሁዳኳ፥ ከምገርዸኽ ነጸገኡኳ። 18ከምዳ ካም ኤከምኮራኣስ ኸማም፥ ኤከምፑሥ ነመጓ ከመዪዦጓ፥ ነገፋሌ ሴጠና ከገፋሌ ረባኳ። ከምትገራ አም፥ ከመገሚላ ካራ ኤከምዸብዋን ማምበፀሽ ገንሣ፥ ኤከመንዘ ዊለን እማም ነጸጋ ደ በሽለከሥ ረባ።"' 19"ካኽላ አም ጥስ ኣግሪጳ፥ አርኮከቆንኼ አር መጎሎጓ ኤተ በዎኬ ካራ ነጎዛኼ። 20ነማጦሸማ በርገሸከሥ ከጸጋ አል ደማስቆ ከጸጋ አል ዬሩሳሌም፥ ነለአ ነን ከጸጋ አል ኤበ ዪሁዳ ኮዎማ ከጸጋ ደ በበፀካ መዳ ሾከ ዪሁዳ፥ ኤከምበፁሸን እንዶ ገንሣ ከምኮሉዋን ኮጎ ረባ፥ ኤከምዱዋን ዳ ኤተ ከምገሙካ መበፀሽ እንዶ ገንሣለማም። 21ከፄ አለአ ቤዻቆ ዶጎ ዪሁዳ አራ ነመዪዥሥ መፀ ገዴራ፥ ቢያኣጎ መሾቆ አራ። 22በተጸከሥ ረባ አራ ካሥ አል ኦካ አለአ። ካኽላ በርደካ ከኤተ መደ ኸገሻ ከደ ቢዪርካ ኤኢዳ ከምበቦቆማኳ። ዳ ኤተ በርከለካ አርኳ፥ ኣሥ ዳ ኤተ ቤገሸሥ ደ መዪርጓ ከሙሴ ኤተ ቢከል እማም ኤከምዳ። አኳ፥ 23ኤበኢካ ከመሲያ አመሮቆ ማኣንሠሣ፥ ኤከምዳን መሲቆማ ነመፈርሣ ነመሻ ነደ በሸሸካ። ኤያሥ ኤያኳ ኤበኢካ ነጸገማ፥ ኤከመገሸሥ መዪዦጎ መብዳ ከዶጎ ዪሁዳ ከጸጋ ደ በበፀካ መዳ ሾከ ዪሁዳኳ።" 24ኖከ ቤጻንዶቆ ጳዉሎስ ተምባ ከገሻ ከለአ ነጸገማ፥ ቤከከል ፌስጦስ ከበቦቆ ሳ፥ "ጳዉሎስ አም ባሜለካ፥ ማጠጤም ሎርጋ አሉ በበኽ ባሜለኮቆ አም።" 25ቤኮሎቆ ጳዉሎስኸን ቤከል፥ "አም መሂንቆ ፌስጦስ፥ በርገሸከሥ እገሸ ኻምብድ ጸጋ፥ በርገሸከሥ ኸገሻ፥ አርሜለካኼ። 26ከፄ በገምካ ጥሳ ኣግሪጳ ቾጎ እገሻ አለአ ኮዎማ፥ ከምፈለርሽ መዪዥርሥ መገሸርሥ ነታሰማ። ቤርገምኪል ዝንዜን፥ ኤከምበፃ ነገሻ ነለአ መፐኽ ሜተል አ። ኖጎ በደኮጎ አለኣኳ፥ ኖጎ ገጸፃኼ። 27አም ጥስ ኣግሪጳ፥ ኣገምኪላኽ ዳ ኤተ በገሸከሥ አደ መዪርጓ? በርገምካ ኤባገምኪላኳ።" 28ቤከል ኣግሪጳኳ ከጳዉሎስ፥ "ኣኣጎካ አም ከምጦዋኣ አራ ናሥ ነመጸል ኦካ ነለአ ከክርስታናኽ?" 29ቤኮሎቆ ጳዉሎስኳ ቤከል፥ "ነድ ኦከማ መጸለማ፥ መጎ ማኳ፤ በላ መዳን ኣሥ አም፥ በርዴረካ ረባ ኤከምዱዋን ጸጋ ደ በገሰኮቆ እገሻለም ኖካ ነለአ ኮዎማ ኤያለም። ነደንኳ፥ አራኣጎካኼ ኤከምፉንጩዋ እማም ኤያለምኼ።" 30ነለአ ነቸቻ ቢፈርሥ እምጥስ ኣግሪጳ፥ ኤተ ኤባ ፌስጦስ ከበርኒቄ፥ ከጸጋ ደ ቤማኢሽ ነጓ ኮዎማኳ። 31ኖከ ቢፐሥ ነጓኳ ቢከል፥ "አደካንኼ መዣ አለአ ዳ ሜተል ኤተ ከምኸከሥ መሻ ኤያሥ ኤያ ማፉንጫ ካኼ።" 32ቤከል ኣግሪጳኳ ከፌስጦስ፥ "በምበፀካ መከላ መዣ አለአ፥ 'ናተገር እገሸማ ካራ ከበቦቆ ጥስ ዶጎ ሮማ' ቢምፈለከሽ መጨገሰማ።"

will be added

X\