መደዳ አል ሰ ገትገ ክርስቶስ 20

1ኖከ ቤጽኽ ማከላ ቆሳ ነን፥ ቤሙንፆቆ ጳዉሎስ ደ ገዴራ ኮጎማ፥ ቤንዥገሥ እማም። ነለአ ነቸቻ ቤኽ ዳገ ከማም፥ ቢንሰ፥ ቤፈርሥ ከምዻ ከማቀዶኒያ። 2ቤተሪል ኤባ ኤተ በኢካ ነጓ፥ ቤንዥገሥ ደ ገዴራ ከበበኽ እገሻ፥ ቤዌ ከግሪክ። 3ቤኢሽ ነጓኳ ጽጃ ኦካግ። ኖከ ቤከገሥ አ ከምዻ ከሶሪያ ከለማዲያ፥ ቤያገሚል ኤቤያኣጎ ዶጎ ዪሁዳ መሾቆ አ። ካ ቤሪል ኤከምኮላ ከንዶ ማቀዶኒያ። 4ጸጋ ደ ቤዽ ነቾጎማኳ ሶጳጥሮስ ዱ ጲሮስ፥ ጸጋ አል ቤሪያ፥ እምኣርስጥሮቆስ ከሶኮንዶስ ደ ተሳሎቄ፥ ጋዮስ አል ደርቤ፥ ጢሞቴዎስ፥ እምቲኪቆስ ከጥሮፊሞስኳ ደ እሲያ። 5ቢቼስ እማም አለአ እንዶዋ፥ ቢዜኽ አይላ ነጥሮኣስ። 6አይላኸን ኖከ ቤተር ኦከ ገቻንዳ ነን፥ ቢልከፈርሥ ከለማዲያ ነፊሊጲሲዩስ ቢልረበሽ እማም ነመዥጋ ማቁስ ነጥሮኣስ፤ ቢልዥጌቆ ነጓኳ እል ሥሠ በንድ። 7ኖከ ሙሳ ነሸጋዥጋ ቢልሙንፆቆ ኮጎ ሜታ ከመንፂል እጋ። ከፄ ቤያኣጎ ጳዉሎስ መዻ ነገዳዱኳ፥ ቤጎ ሥ እገሻለማ ካሥ ጋፂል መጎኳ፥ ቤገሽ ከጸጋ። 8ቤበል በበኽ ጅ ነመፀ ጎዛ ኤተ ቢልሙንፀቆና። 9ቤኢ ዱ ገሸላ ኤተ ቢኦ ፄማ ኦይጢቆስ ነመኢሻ ነሰ ጋምቦ መፃ። ኤቤጎ እገሸ ጳዉሎስኳ፥ ቤታሽ አኸ መዥጋ ዱዋ አ፤ ኖከ ቤኢ ኖጎ መዥጋኳ፥ ቤፋቴ ነጋምቦ መፃ አል ጎዛ ነመንጦቆማ ነኦካግ ከኔያ። ቢፈሮቆ ጸጋኳ መሸማ። 10ቤብቴ ጳዉሎስኳ ኖቆ መፃ ከኔያ፥ ቤፋት ከጸገማ ቤሃኮቆ ቤከል፥ "መተምዘኸኼ፥ በካኢከሽ ከኻምብደማ።" 11ነለአ ነቸቻ ቤኮል ጳዉሎስ ኮቆ መፃ፥ ቤንፂል እጋ ቤስ ከደ ገዴራ፥ ቢከጅብሦጓ ከገሻ፥ ነለአ ነን ቤዻ። 12ቤሮቆ ጸጋኳ ዱ ገሸላ ከኻምብደማ፥ ቢከኩ ከመፃ ኤተ ቢኢና፤ ቢንዥጋሥ በቦቆ። 13ጳዉሎስ ቤያኣጎ መዻ ነንዶዋ ነኔያ ከቾጎማ ከኤባ ካል አሶስ፤ አይላኸን ቢልከቼስ እንዶዋ ከለማዲያ ቢልዳሽ ከአሶስ። ቤገሸሥ ካይላ፥ ኤከምዻ ቶኲልቆን ነጓ ነለማዲያ። 14ቢለገመሥ ነአሶስ፥ ቢልቶኮቆ አይልኳ አ ነለማዲያ፥ ቢልከዳሽ ከኤበ ሚጢሌኔ። 15ቢልከፈርሥ ነጓ ነኸማቱቁማ ከለማዲያ፥ ቢልዳሽ ከጋንዞ ቆ ኪዮስ ከኤባ አል እል ኣያ፤ ከኦኪል እምበንድኳ ቢልዸቦቆ ከሳሞስ፥ ቢልዳሽ ነጀንደ ኸማቱቁማ ከሚልቴ። 16ኤያኣጎንኼ ጳዉሎስ መግዣ ነኤበ እሲያኼ፤ ካ ቤከር መዻ ከመተሪል ኤፌሶን ከለማዲያ። ከፄ ቤበበቻ፥ ኤበከማፈላሻ ቤያኣጎ መኢሻ ነዬሩሳሌም ኖከ ዚፈ ጴንጠቆስጤ። 17ቤትግ ጳዉሎስ ነሚልቴ ጸጋ ኤከምኦዉኬ ደ እምፈጋ አል ገሙንፀ ደ ገዴራ አል ኤፌሶን ኮጎማ። 18ኖከ ቢዾዌ ደ እምፈጋ አኳ ኮጎማ፥ ቤከከል፥ "በራጦከሽ ከኤተ በርከዎኬ ከኤባ ካል እሲያ፥ በኸገምካ ኤያብ ኤበርኢካ ኖጎኻ መዱጎክ። 19ኖከ ባሙቸኪል ዶጎ ዪሁዳ አራ፥ ነማፉንጫቋ ኤተ በደካ ነጸገም፥ በርደከንዥገን ከኤታ ከመጦኽ ጸገም ከገቻ፥ ከኸ ጹሻኳ። 20በራቲከስ እገሸ ረባ ካኻ፥ በርትገከሥ ነኸ ጸጋ ነመፃ ነመፃኳ። አኢካንኼ ሜተል ዳ ኤተ በርጸፀኮቆ ካኻ ነንዶዋ አል መብዳኼ። 21በርከገሸካ ከጸጋ ካል ዪሁዳ ካል ግሪክኳ ዝንዜን፥ ኤከማንዡሥ እለማም ከምኮሉዌን ኮጎ ረባ፥ ኤከምገሙኪለን ከኤቶኳ ያሱስ ክርስቶስኳ። 22ነዚያ አለኣኳ በላ ማገመሪለን ዳ ኤተ ከምዶጎ ነጸገም፥ በራገሰካሥ ከመዪዥሥ ገፉጫ ኤከምዸራ ከዬሩሳሌም። 23ነደንኳ በገሸከሠንዥገን መዪዥሥ ገፉጫ ካራ፥ ኤከምዜኽ አማፉንጫ ከማኣንሠሣ አራ ነኤዬባ ነኮዎማ። 24አራኸን በርዪርካ መኢያለም ኤዳ ቤያንዢግ በና፤ በራኣጎካ መትቶቆ ኣሥ ገትጋ ከመደዳለም ኤተ በርዸበካ ኖጎ ኤታ ያሱስ፤ አኳ ኤከምደራ ኸገሻ ከሰ ማገ ላ አል መገ አል ረባ። 25"በርገምካ እኽላኳ ኤከምበፀኻ መኮለኼ መገመኸሥ እልኸም፥ አኻ ደ በርዎኬ ኖጎኻ፥ ደ በርከገሸከሠን ከፄ ገፋሌያ አል ረባ። 26ካኽላ ከመገሸርሥ ካኻ ኖካ አለአ፤ ኤከምቴያ ናኻ ጸጋ ሜታ ነንዶዋ፥ ከምሎቁከሠኼ አራኼ። 27አራሸከኸንኼ አር መገሸሥ መኦሻ አል ረባ ኮዎማ ካኻኼ። 28ዜኸኽ ጸገኻ፥ ዜኽ ጃጃ አል ረባ ኤተ በከጦካ አመዪዥሥ ገፉጫ አኻ ደ መዜኸማ፤ ጃጃ አለኣኳ ገሙንፀ ደ ገዴራ አል ረባ፥ ኤተ በከጦካ አረባ ከመሃ ሜታኽ ዱማ ካለማ። 29ኖከ ከምደራሻ ነን፥ በርገምካ ኤከምኩ ጋገንሠ ጸጋ ኤያል ዬላዉዋ ኪልኻ። ከምበፁሸኼ እማም ጃጃ በላ ማቀዙሠን። 30ናኻኳ ከመገሹሥ ጸጋ ሜታ ሜታ መቁልሥ እገሻ፥ ከምጅሩካ ደ መሁል ቾጎ ያሱስ ኮጎማም። 31ካኽላ ኣምበንኻሥ፥ ሳንዘኸሥ ኤበርገሸካ ከኸ ጹሻ ከሜታ ሜታማለኻ ከግዣ ኦካግ መዱጎክ ነመጎኳ ኪል ኦካ። 32እኽላኳ ከምኸራ አኻ ከኤለ ረባ ከገሸ መገለማኳ፤ አ ከምፈለሽ መዥገሥ መገሚላለኻ፥ በጨካ መዥጋ ከመኸማ ካኻ ዳ ኤተ ቤካጦዪል አ ሾካለማ። 33አራኣጎካንኼ አር ኖጎ ጸጋ ሜታ ለማና፥ ኣያ፥ ኣኳ። 34በኸገምካ አኽኳ ኪልቆኻ፥ ኤበርደካ ከኤለም ዳ ኤተ በደካ ማኣጎማ ካራ ከመመዠም። 35በርትገከሥ ካኻ ከንዶ ኮዎማ፥ ኤከምዳ ነጸጎኳ መሻምባ ኤኤለአ ኤከምፈለኮሽ መተጸሥ ደ ገማዋ። ሳንዘኸሥ እገሸ ኤታ ያሱስ ኤተ ቤከል፥ 'ነመሮቆማ ባገ ኪል አመኸማ ጸጋ።"' 36ኤቤከል ጳዉሎስ ኤለአ ነቸቻ፥ ቢያኩኩን ከማም ቤዴራ። 37ኬያኮዎማም ቢሃኮ ጺ ጳዉሎስ ከሰ መእሳ፥ ቢንፅማኳ። 38ቢሳንዝ ከበቦቆ ከኤተ ቤከል ጳዉሎስ፥ ኤከምበፁዋ መኮሉዋ መገሙሥ እልኸማ፤ ቢዪቶቆ እማምኳ አ ካሥ ጎ ለማዲያ።

will be added

X\