2 ከጢሞቴዎስ 3

1ኣገሚል ኤከምዌ አገንሠ አንጅ ኖካ ናል መርሸማ። 2ከምእያሥ ጸጋ ከጸገማ፥ ከምሲያሥ ከለማና፥ ከምሾጎ ከምቶኮሥ ጸገማኳ፥ ከምያ ጸጋ፥ ከምገሶቆኼ ከዶጎ ኤበማ፥ ከምኮሎቆኼ መገ ላ፥ ከምኻኼ ገሂን ከረባኼ። 3ከማንዢጋ ማሄሻ፥ ከምሄሸኼ ማገ፥ ከመቴሥ ፄ ጸጋ፥ ከምዜኸኼ ጸገማ፥ ከማንጀራኼ እለማ፥ ከማቸከካኽ ከገሸል ዳ፥ 4ከማጠቸች ጸጋ፥ ከምቱጉሠኼ ጸጋ፥ ከምባቻ፥ ነመሄሽ ረባ ከምሄሽ ኣሥ ማገ ል ጸገማ። 5ኤቢዪርካ ኖቆ ቤ ጸገማም፥ ቢኢካ ኤጸጋ አል ረባ። ከመደዳለማምኸን ቢትገከሥ ኤበምሜካ አመዥጋ አል መገሚላ ኒለማም። ሃታቆ ነጸገ ሾከ ጸጋ ነለአ! 6ነማም ነለአ በኩከኽ ጸጋ ሜታ ሜታ ከመፀ ጸጋ፥ ቢንጠከኽ መሌእልኽ ጋፋ፥ ደ በዪጨኮቆ አበበኽ ገንሣ ነጸገማም፥ ባንዙበካሽ ከመአጀባ ከጅንሰማ ከጅንሰማ። 7ሾከ ጋፋ አለኣኳ ቢያኣጎካ ኤከምገሙሽ መዱጎክ፥ ኢዳካሸኼ ሜተል ከማምባለሥ ኸገሻኼ። 8ኤያሥ ቢንስ እምያኔስ ከያምብሬስ ሙሴ፥ ኤያሥ ኤያ በንሰካ ጸጋ አለኣኳ ኸገሻ። በንሠከንዥገን ሳምቢርቆማም፥ ባንጅርተካ አመገሚላለማምኳ። 9ከምፀቆኼ በነ መደዳለማምኼ፤ ኤያሥ ቤያትጋሥ መንተሞቋ አል እምያኔስ ከያምብሬስ፥ ኤያሥ ኤያኳ ከማትጋሥ መንተሞቋ አል ጸጋ አለኣኳ ነኸ ጸጋ ኮዎማ። 10ባከሁለከንዥገን አምኸን መትገሣለም፥ ቾጎ መንዳለም ከመሻምባለም፥ መገሚላለም፥ ገቀማለም፥ ማሄሻለም፥ መፈለሸማለም ከገቀማኳ። 11ባገምካ ማሙቾቋ ከማኣንሠሣ ኤተ በደካ ነጸገም ነኣንፆቂያ፥ ነኢቆኒዮን ከልስጥራኳ። ማሙቾቋ እንዘሥ በርፈለከሸንዥገን ከገቀማኳ! ነለአ ነኮዎማኸን በ ጻንደከኽ አኤታ ነጸገም። 12ኤያሥ ኤያ ከማሙቹቆ ደ በኣጎካ ከንዶጎ ያሱስ ክርስቶስ መዥጋ ነንዶ ገዴራ ኮዎማ። 13ጋገንሠ ጸጋ ደ በንጠኪልኽ ጸጋኳ ነገንሠማ ከምችርሽ ኮጎ በቦቆ ገንሠማ። ከመንጡኽ ጸጋ ከመንጡዋኽ እማምኳ። 14አምኸን ኣራቆካሽ ከዳ ኤተ ቢትገከሥ ካም ባርኮቆ ከመገሚላ፤ ባገምካ ኤበትገከሥ ዎዴ ካም። 15ባገምካ ከኸ ኢዳ መዪዥሥ ሎርጋኳ፥ ኤተ ከምፈለሽ መሮቆ አም ከመገመኻ፥ ኤከምብዳኣ ከንዶጎ መገሚላ ከያሱስ ክርስቶስ። 16በቆተካዬንዥገን መዪዥሥ ሎርጋ ኮዎማ ከማይቶቆ መዪዥሥ ገፉጫ፥ በጨካ በና ከመትገሠማ፥ ከመፖቆ መሸ ሠማ ከኸ እኔያ፥ ከሞጎ ኸማ፥ በገሸካ ከጸጋኳ ኤከምኢዋ ኤበኦከሽ ረባ። 17ዳ ኤተ ከምተጸሥ አኳ፥ ኤከመገሠን ጸጋ ደ በደካ ካል ረባ ከመደ ጋገሸል መደዳ ኮዎማ።

will be added

X\