2 ከጢሞቴዎስ 2

1ዱዋለም፥ እንዥጋሥ ከመገ ኤተ በኸኬ ያሱስ ክርስቶስ ካኳ። 2ኤተ ባገሰኮቆ ኖጎም ነታሰ በበኽ ሹዳኳ፥ ኣተገሮቆ ከጸጋ ደ በገምኪላ፥ ደ በፈለከሽ መትገሠማ ከጃጀንዳኳ። 3እንዘ ል ነማኣንሠሣ ኤመገሚል ለጋዪድ ያሱስ ክርስቶስ። 4ጸጋ ኤተ በገ ከሥ ከማሻ ኤከማገ ል ጥስ ለጋዪዳለማ፥ አኩኪልኼ መደዳ አል ኸ ያኼ። 5ጸጋ ኤተ በኢካ ነኤፃገ ፃጋ፥ ኤከምበፃ መዱጓ ኤመንደማ፥ ከምዸባኼ ዠለ መሙቾቆማኼ። 6ኤተ ገሌያ ኤተ በዥገካ ነገሌያለማ፥ ከምደካ ነገሲቋ ኤከምዸባ ነጋትጋ ኸማ። 7ሳንዘሥ ዳ ኤተ በርገሸከሥ አለኣኳ፤ ከምኻ ኤታ ማምባለሠማ ካም ኤከማምባላሠን ኮዎማ። 8ሳንዘሥ ያሱስ ክርስቶስ፥ ኤተ በደካ ሾከ ዳዊት፥ ኤባፈርካዬቆ ነደ በሸሸካኳ። ኤኤለአ በከለካ ሰ ማገ ል አል ረባ ኤተ በራቲከስ አር፥ 9ኤተ በርካፉንጨካቆ አር፥ ቢያርከፉንጨካ ኤደ ገንኳ። ነደንኳ፥ ከምፈለሸኼ ጸጋ ሜተል መፉንጭ እገሸ ረባኼ። 10በርጹርካ አለአ ኮዎማ ከገቀማ ከፄ ጸጋ ደ በሽለከሥ ረባ፥ ኤከምብዱዋን እማም ከንዶጎ ያሱስ ክርስቶስ ከምዸብዋን ገሂን አል ግዢ ግዥኳ። 11ኸማ እገሻ ኤተ በከለካ፥ "ኤበኮሸካ ከክርስቶስ፥ ከምኢኳ ኮዎኳ፥ 12ኤከምፈለኮሽ ከገቀማ፥ ከመሙቸኮቆ ኤያሥ በሙቸኮቆ ክርስቶስ፥ ኤከምኤመኮሽ አኸን፥ ከምኤመሽ አኳ አኳ። 13ኤከምበፆኳ መዶኳ ከመገሚለማ፥ ከማሻኽ አ ኤያሥ በደካ መገሚለማ፥ ከምፈለሸኼ አ መኤመሽ መዳለማ ከኤተ መብዶቆማኼ።" 14ጦ ኤከምሳንዘሥ ጸጋ፥ እገሸካ ከማም ዝንዜን ነታሰ ረባ፥ ኤከምበፁዋ መንቱዉሥ እማም ነገሻ። ሾከ አለአ ከምቴሥ ደ በገሰኮቋኳ፥ ከምጫኼ በናኼ። 15ሻምብ ኤከምዪራ አረባ አም ኤኤተ መደዳ፥ ኤተ በዻምበካ አ በርኮቆና፥ ኤተ በበፀካ መዪፀካቆ ከመደዳለማ፥ ኤጸጋ ኤተ በዪዥከሥ በትገከሥ መትገሣ አል ኸገሻ። 16ሃተኻሥ ነገሻ ኤተ ቢከከለካቆስ መገ  ባንዢገካ ኸማ፤ ሾከ እገሻ አለአ በጦካ ኤከምሃታሥ ጸጋ ከበቦቆ ነጸገ ረባ። 17ሾከ መትገሣ አለአ ኤብሳ ናከዸሽ ከመፈጋይላ፤ በኢካን እምሄመኔዎስ ከፊሌጦስ ነጸጋ ደ በትገከሥ ሾከ መትገሣ አለአ። 18እማም አለአ ቢበከንዥገን ነንዶ ኸገሻ፥ ቢከለካ፥ በደከንዥገን አመፈርሠ ጸጋ ነመሻ። ኤኤለአ ቢቴከሠንዥገን መገሚላ አል ጸጋ ሜታ ሜተምኳ። 19ነደንኳ፥ ሸማ ኤተ በጦከሥ ረባ፥ ከማፈላሸኼ መንደሸማኼ። በቆተካንዥገን ኖቆማ ሳ ኤተ በከለካ፥ "በገምካ ኤታ ደ በደካ ካለማ፥" ኤያሥ ኤያኳ፥ "ደ በኦከፄ ኤታ ኮዎማ ነበፀሽ መደ ገንሣ።" 20ኒል በቦቆ መፃ አኢካንኼ ኣሥ ዳ ኤተ ቢገ ከሥ ነኣያ ከለማናኼ፥ በኢካን ኤያሥ ኤያኳ ዳ ኤተ ቢዘዘካ ቢገ ከሥ ነጃ ነዬዛኳ። ከምዳ ሜታ ኤተ ከምጦዉሠን ዳ አል መዥግ በና፥ ከምዳ ጀንዳኳ ከኤተ ከምከንቱቆን ሱብራ። 21ኤከምዪዥሥ ጸጋ ጸገማ ነገንሠ ዳ ኤተ በርገሸከሥ ነለአ ከምጻ፥ ከምዪዣሥ ነሱብራ። አ ኤዳ ኤተ ናከንዴል ኤተ መፃ ከዳ ኤተ መዥግ በና፥ በገ ካሠንዥገን አ ከመደ ጋገሸል መደዳ ከኮዎማኳ። 22ሃታሥ አምኳ ነገንሠ መአጀባ አል ኦከ ጋሸላ። ከደ በኦካ ፄ ኤታ ከመዪዥኽ እላ ከኮዎማ ሻምብ ነገሸል መንዳ፥ ነመገሚላ፥ ነማሄሻ ነመገማኳ። 23መኩኣኼ ነማከል መንተሞቋ ኤተ ባንዢገካ ቾጎማ፤ ባገምካ ኤበዎኬ ነማከለማኳ ማቱሣ። 24ከምደካኼ ከኤተ መደዳ አል ኤታ ያሱስ አመቱሥ ጸጋኼ። ከምደካ አመዳ መፉጨኸማ፥ ኤተ መትገሥ ገሸለማ፥ ኤተ በጨካ ገቀማ። 25ከምኮሎቆ ደ በንሰካ አ ዝንዜን ከመገ  እላ ከገሸል ኸ እንዶዋ። ኢገም ከምኸካ አረባኳ እንዶ ማንዠሥ እላ፥ ኤከማምባሉሠን ኸገሻ። 26ኤኤለአ ከሞገኽ እለማም፥ ከምትሹ ኤለ በጎላምብ ሴጠና፥ ኤተ ቤኩቆ እማም ኪል ኤለ መኦሻለማ።

will be added

X\