2 ከደ ተሳሎቄ 3

1ከመተጸማኳ ኢዴበም፥ ዴረኻ ካይላ ኤከምፈጋኽ እገሸ ኤታ፥ ኤከምሂን ኤያሥ በሂንካ ኖጎኻኳ። 2ዴረኻ ኤከምብዶቆ አረባ አኳ ነኤለ ደ ገንሣ ከደ መሸ ሠማኳ፤ አገምኪልኼ አጸጋ ኮዎማኼ። 3ኤታኸን ኤተ መጦሥ እገሻ ነኸማ፤ አ ከመንዥገሥ አኻ ከምጻንዶቆ ሴጠናኳ ነጸገኻ። 4እኽላኳ ነድ ኮጎ እልኻኳ፥ ቢልገምኪል አኻ ከንዶጎ ኤታ፥ ኤከምትተኾቆ ዳ ኤተ ከመገሽልሥ ካኻ ኮዎማ። 5ነጦኽ ኤቶኳ እልኻ ኮጎ ማሄሻ አል ረባ፥ ኮጎ ገቀማ ኤተ በኸካ ክርስቶስኳ። 6እኽላኳ ኢዴበም፥ ቢለገሸከሥ ካኻ ከፄ ኤቶኳ ያሱስ ክርስቶስ፥ ኤከምሃተኻሥ ነደ ገንዞዋ ከደ ገዴራ ደ በበፀካ ማኢካ ከመትገሣ ኤተ በኸርኮቆ ኖጎምላ ኮዎማ። 7በኸገምካ አኽኳ ኪልቆኻ፥ ኤከምዳ አመኮ መኢያለምላ ካኻ፤ ኖከ ቢልኢኬ ኖጎኻ ኢለንዞካንኼ ነመደዳ፥ 8ኢልሰካንኼ እገ ጸጋ ሜተል መገ ኼ። አይላኳ ቢልሌኤካ ቢልሻምበካ፥ ቢልደካ ኖካ ከመጎኳ፥ ኤከምበፃ መዳን ከጸጋ ሜተል ከገጹራ። 9ቢልደካ ካኻ ከመኮሣ ኤከምኮኻን አይላ፥ ኢላንዥገካንኼ ገፋሌያ ከመሎቆሥ አኻ ከማተጸሣኼ። 10ኖከ ቢልኢኬ ኖጎኻ፥ ቢልኸከን ማቶቋ ካኻ ቢልከለካ፥ "ጸጋ ኤተ ከምበፃ መሄሽ መደዳ፥ መሳኼ እጋኼ።" 11እኽላኳ ቢልገሰኮቆ፥ ኤበንዞካ ናኻ ጸጋ ሜታ ሜታ ነመደዳ፤ ኣሥ መኩ ነመደዳ ናል ጸጋ፥ ኢደካኼ መደዳኼ። 12ሾከ ጸጋ አለአ ኤከምኢዩሸን ትል፥ ከምዱዋ ኤከምሱዋን ኣሥ አለማም፥ ቢልተኮቆ ከፄ ኤታ ያሱስ ክርስቶስ ቢለገሸካ ከማምኳ። 13ኢዴበም፥ አኻኸን መንዞኻኼ ከመደ ገሸለማኼ! 14ጦኸሥ ኒልኻ ጸጋ ኤተ ከምበፃ መገሶቆ እገሸ መቆታለምላ። ኤከምዪፃቆን አኳ ማኩኾቆኼ ከአኼ። 15ነደንኳ፥ እገሸኸካ ኤዱዌበኻ፥ መዪርኻኼ ኤብታኼ! 16ነኸ ኤታ አል መገማ ኪልቆማ መዱጎክ ከንዶጎ ኮዎማ መገማ ካኻ፤ ነድ ኤቶኳ ከአኻ ከኮዎኻ። 17አራ ጳዉሎስ ከኤለም በርቆተካ ዳገለም ካኻ፤ መቆታለምኳ ኤኤለአ፤ ዳ ኤተ ከምገሙካ ገትጋለም ኮዎማ፥ ካሥ ከለአ። 18ነድ መገ አል ኤቶኳ ያሱስ ክርስቶስ ከአኻ ከኮዎኻ።

will be added

X\