2 ከደ ተሳሎቄ 2

1ኢዴበም፥ ከፄ መዌ ኤቶኳ ያሱስ ክርስቶስ ከፄ መሙንፆቋሎኳ ከአ፥ ቢልጨካ ዳ ኤተ ከመገሽልሥ ካኻ። 2"በዎኬንዥገን አኦከ ኤታ" ኤተ በከለካ ኤከምገሰኾቆ ነሰ መዪርጓ ከማቲሳ፥ ኤያሥ ኤያኳ ከመቆታ ኤዳ ቢቆት ከንዶጎምላ፥ መተምዘኻኼ ፈላ ማሰሲኻሠኼኳ። 3መንጠኸኼ ጸጋ ሜተል አኻ ነዳ ነሜተልኼ! በላ መዌን አኦከማ አ ነገሲቋ፥ ከምሽጣ በበኽ ጸጋ ረባ፥ ከማትጋሥ ገንሠ ጸጋ ኤተ ከምኮዪል ማቶቋ፥ ኤተ በኢካ ከምቴያ። 4አ ከመጦኽ ጸገማ ከምጻ ከምንሳ ኮዎማ፥ ኤተ በከከለካ አጸጋ ረባ ካሥ ዳ ኤተ በከዴረካ አጸጋኳ። በላ መዳን ኣሥ አለአ፥ ከምኩ ከመዪዥሥ መፀ ገዴራ አል ረባ፥ ከምከላ "አራ ረባ" ከመንዥጋ ቆኽ ከምኢሽ። 5አኸሳንዘከሠኼያኽ ኤቤርገሸሥ አለአ ካኻ ኖከ ቤርኢ ኖጎኻ? 6በኸገምካ ኤበኢካ ዳ ኤተ ከምረስ አ፥ ኤከማትጋሥ ናሥ አንጅ ማ። 7ማጸፆቆ ገንሠ መዥጋ አ እኽላኳ ነመደማ በኢካ፤ እኽላኸን ከማትጋሠኼ ካሥ አል ኦከ ከምፐሥ ኤተ በረከስ አ ነንዶዋኼ። 8ነለአ ነቸቻ ከማትጋሥ ኤተ ከምኮዪል ማቶቋ፤ ከምሸኮቆ ኤታ ያሱስኳ አ ከገሾኳ ኤተ ከምፔሥ ነሰማ፥ ከምቴከሥ አ ከመዌያለማ ከማትጋሣለማኳ። 9ከምዎኬ ገንሠ ጸጋ ኤተ ከምኮዪል ማቶቋ አ ከመዥግ ሴጠና፤ አ ከማትጋሥ ከበቦቆ መዥጋ፥ ከምዳ ጋገሸል ዳ ከዳ አል ገተምዛ ኤተ በንጠከኽ ጸጋ። 10ከምዳ ሾከ መንጠኻ ገንሠማ ኮዎማ ነጸጋ ደ በቴካ። ዳ ኤተ ከምቴካ ጸጋ አለአ፥ ከፄ ቢበፀካ መሄዉሽ ኸገሻ ኤተ ከምብዱካ። 11ከፄ አለኣኳ ኤከምገሙዊለን ከጎልጎዛ፥ ከማተገሮቆ አረባ እማም ከምኻ ከዳ ኤተ በንጠከኽ ጸጋ። 12ዳ ከምጦካ አለአ፥ ኤከምኸካሠን ከደ ባ ገ ካይል ከገንሠ ዳ፥ ከደ በበፀካ መገምኪል ከኸገሻ ኮዎማኳ። 13ደ በኻሄካሽ ከኤታ ኢዴባለም፥ ከምዳ ካይላ ኤከምኽልካ ከፄኻ መዱጎክ መገ ላ ከረባ። ዳ ኤተ ከምኽልካ መገ ላኳ፥ ከፄ በቶካ አረባ መሽልሥ አኻ፥ ኤከምብደኻን ከመዪዣሣለኻ ከንዶጎ መዪዥሥ ገፉጫ ከመገሚላለኻ ከኸገሻኳ። 14ኤከመንዘኺለን ነገሂን አል ኤቶኳ ያሱስ ክርስቶስ፥ በከኦካ አረባ አኻ ከሰ ማገ ላለማ ኤተ ቢላቲከስ ካኻ። 15ካ ኢዴበም፥ ከሳ ነድ ከመቆታኳ፥ ራቆኸሽ ኸገሻ ኤተ ቢለገሸከሥ ካኻ ኢኸካ! 16ኤቶኳ ያሱስ ክርስቶስ ኪልቆማ ከረባ በቦኳ ኤተ በሄከሽ አኳ፥ ኤተ በኸኬ ከመገለማ መንዥገሣ አል ግዢ ግዥ ከገሸል ማጦዪላ ካኳ፥ 17ነንዥገሥ እልኻ፥ ነኸ መዥጋ ካኻኳ፥ ኤከምደኻ መዱጎክ ገሸለማ ኤከመገሸኻ ገሸለማኳ።

will be added

X\