2 ከደ ተሳሎቄ 1

1አይላ እምጳዉሎስ ከሲልዋኖስ ከጢሞቴዎስ ቢልቆተካ ገትጋ አለአ ከገሙንፀ ደ ገዴራ አል ተሳሎቄ፥ ደ በደካ አል ረባ በቦኳ ካል ኤታ ያሱስ ክርስቶስኳ። 2መገ ከመገማ ነድ ከአኻ ኖጎ ረባ በቦኳ፥ ኖጎ ኤቶኳ ያሱስ ክርስቶስኳ። 3ኢዴበም፥ ከምዳ ካይላ ኤከምኽልካ ከፄኻ መዱጎክ መገ ላ ከረባ። መጦማለምላ ኤኤለአ ገሸለማ፥ ከፄ በፈገካቆ መገሚላለኻ በቦቆ፥ ዳ በከፈገካኽ ማሄሻ ኤተ በኻጨካ ኖጎ ኮዎኻኳ። 4ቢልካመከሥ ከአኻ ነገሙንፀ ደ ገዴራ አል ረባ፥ ከፄ በኸቀመኮቆ ነማሙቻቋ ከማፉንጮቋ ኤተ በደካ ነጸገኻ ነኮዎማ፥ በኸዥገካ ነመገሚላ። 5ዳ ኤተ በትገከሥ አለአ ኤበደካ አመኸሣ አል ረባ መዪዥሠማ፤ ከፄ በኻኣንሠካሥ ነመገሚላለኻ በቦቆ፥ ከምደኻ ከደ መኩና ከገፋሌ ረባ ኤተ በኸከኢካ ነማፉንጮቋ። 6ከፄ በደካ ረባ መዪዥሠማ፥ ከምጦዋ ማፉንጮቋ ነጸገ ደ ባፉንጨኮቆ አኻ። 7አኻ ደ በኻፉንጨካቆኳ ከማፉጨኻቆ ከአይላኳ። አንጅ ከመዳ አለኣኳ፥ ኖከ ከምብቴ አኤታ ያሱስ ከማገማሥ ከመዥግ ሰ ገትጋለማ ነጎዛ 8ነመበል ማንጃ። ኖካ ና ከምርካ በና ከደ በሽጠካ ረባ፥ ከደ በበፀካ ማገሰካሥ ከሰ ማገ ላ ከፄ ኤቶኳ ያሱስ። 9ከምሃቱዋሥ እማም አለአ ነታሰ ኤቶኳ ከበቦቆ ገሂንለማኳ፥ ከምሩካ ከማም በነ መቴያ አል ግዢ ግዥ። 10ኦከ ከምዳ አለኣኳ፥ ኖከ ከምዌ ኤታ ኤከምኸካን አደ በዪዥካሥ ካ ገሂን፥ ኤከምዪሩዋን አደ በከገምኪል ካ ኤዝራ። ከፄ በኸገምኪል አኻኳ ኤተ ቢልደካ ካኻ ኸገሻ፥ ከምኢኻ ኖጎማም። 11ከለኣኳ መዱጎክ ቢልዴረካ ካኻ፥ ኤከምጦዋን አረባ አኻ ደ ከምዳ ከማኦዋለማ፥ ከመዥጋለማ ኤከምትቶቆን ማሄሻለኻ ከመደ ገሸል ዳ፥ ኤከምሄቆን መደ መገሚላለኻኳ። 12ከለአ ከምዸበካ አፄ ኤታ ያሱስ ገሂን ኖጎኻ፥ ከምሂንኸካሥ አኻኳ ኖጎማ። ኤተ ከምደካ አለኣኳ ከመገ አል ረባሎኳ፥ ካል ኤታ ያሱስ ክርስቶስኳ።

will be added

X\