2 ገትገ ጴጥሮስ 3

1ማሄሽ ኢዴበም፥ ገትጋ ኤተ በርቆተካ ካኻ አለአ፥ አል እል እምበንድ። ነገትጋ ነምበንድ አለአ በራኣጎካ መበኖቆ አኻ፥ ኤከማምባለኸሠን ዝንዜን ኤከምሳንዘኸሠንኳ። 2ሳንዘኸሥ እገሸ ደ መዪርጓ፥ ኤተ ቤገሸሥ አመዪዥሥ ደ መዪርጓ ነገሲቋ፤ ማኤምኸሠኼ መትገሣ አል ኤቶኳ፥ አል ኤተ መብዶቆ አኳ፥ ኤተ ባተገርኬቆ በበኽ ሰ ገትጋለማ ካኻ። 3ነዳ ነኮዎማ በኢካ ነጸገኻ አማገ ል ዳ ሜታ፤ ከምዌ ኖከ መርሸማ አደ ማሲሠማ፥ ደ በከኢካ ከመአጀበ በጫለማም። ከማሲዩሥ እማም አኻ ከምከሉዋ፥ 4"አባማ ዳ ኤተ በካጦኪል አ ኤከምኮሌ ከመዌያ? አፀካዬቆንኼያኽ? ካል ኦከ ቢከሸሽ እምበፈጎኳ ቤያሻኽ ዳ ኮዎማ ኤያሥ ቢከዘዜ ነገሲቋ።" 5ጸጋ ደ በከለካ ኤኤለአ ኢያኣጎካኼ ማምባለሠማ፥ ኤበዘዘኬ አረባ ገፀ ጎዛ ከኔያ ከሰማ። በጦካ ኤከምፔሥ እኔያ ኒል ኣያ፥ በገ ኬሥ አ ከኣያኳ። 6ቤኮል እኔያ አል ገፀ አ ቤከቴ ከኣያ፥ ኖከ ቤሎጎድ ኣይ መቴያኳ ቤያልምቆ እኔያ። 7ጎዛ ከኔያ አል እኽላኳ ከምኢዋ ኤያሥ ኤያ ካሥ አል ኦከ በኣጎካ ረባ። ነለአ ነቸቻኸን ከምቴዉካ ከማንጃ። ከምዳ አለአ ኖካ ኤተ ከምኸሠን ረባ ከጸጋ ደ በበፀካ ማገሳሥ ከአ፥ ኖከ ከምቴሥ እማምኳ። 8ማሄሽ ኢዴበም፥ መጻፀሠዳኼ አለአ ነኸኻኼ፤ በደካ ኖጎ ኤታ ኦካ ሜተም ኤግዣ ግቸማ አጥስኤር እል ማቁስ (1000)፥ ግዣ ግቸማ አጥስኤር እል ማቁስኳ ኤኦካ ሜታ። 9ኤበኦከሥ ጸጋ ሜታ ሜታ፥ በኢካ ከማም ኤከመንደደቾጎ ኤታ፥ ከመንደደቾጎኼ ኤታኸን መትቶቆ ማጦዪላ ኤተ በኸኬያ። በላ መዳን ኤለአ፥ በቀመኮቆ ካኻ፥ ከፄ በኦከሽ ኤከምበፃ መቴያን ጸጋ ሜታ። በኣጎካ ኤከማንዠሥ ጸጋ ኮዎማ እለማ። 10ከምዳ ኦከ መዌ ኤታኸን ኤመዌ ገልኳ። ኖካ ና ከምቴያ አጎዛ ከሳ ኤተ በኢካ ኤሰ ማንጃ ኤተ በከለካ "ዲ ዲ ዲ።" ከምጥጣቆ ከምዌያሥ ዝንዜን ዳ ኤተ በዪዥኮጎ ነጎዛ፥ ከምቴያኳ። ከማገማሠኼ እኔያ ከዳ ኤተ በኢካ ኒለማ ከማኮሊለማኼ። 11ኤበደካ ከምቴያ ዳ አለአ ኮዎማ ኤኤለአ፥ ሾካ አበማ ጸጋ በኢን አ አመዳ ካኻ? ከምዳ ካኻ አመዳ መዪዥሥ ጸጋ፥ ደ ባገሰካሥ መዱጎክ ከረባኳ። 12ዜኸኽ መዱጎክ በበሥ ኦካ አል ረባ! ሻምበኻ ካሥ ዳ ኤተ በኸፈለከሻ ኤከምዌን ኦከማ አ ፈላ። ኖካ ና ከምጥጣ ጎዛ ከማንጃ፥ ከምቴካ፥ ከምተ ገዘዛ ኮዎማኳ ከጎከ ዳ ከአ። 13በካጦኪል ረባ አኳ ከጎዘ ኽኻ ከኔ ኽኻኳ፥ ኖጎ ከምኢያ መኦሻለማ። በኮኢካ ነመዜኽ እኔ ኽኻ አለአ። 14ካኳ፥ ማሄሽ ኢዴበም፥ መኸከኢ ነመዜኽ አለአ፥ ሻምበኻ ዝንዜን ኤከምጨኻን ከረባ መገማ፥ ኤከምዸባን አረባ አኻ መዪዥሠማ በላ መጨኻን ቆቆማኳ። 15ዪርኻ ከገቀም ኤታ ኤንዶዋ ኤተ ከምዸበኸካ መብዳ። በቆተከንዥገን አማሄሽ ዱዌቦኳ ጳዉሎስ ከመገመኻ ኤተ በከኸኬ ረባ ካ ከፄ ዳ አለአ። 16አ ነገትጋለማ ኖከ በቆተካ ከፄ እገሻ አለአ፥ በገሸካ ኤያሥ አለአ። በኢካን ነገትጋለማ እገሻ ሜታ ሜታ፥ ኤተ ባፉንጨኮቆ አማምባለሠማ ጸጋ። ደ መኤመሸማ፥ ደ በበፀካ መዥጋኽ ነመገሚላኳ ቢያ ደከሥ እገሻ አለአ ኤያሥ ቢያ ደከሥ መጨገስ ሰ መዪዥሥ ሎርጋ ጃጀንዳ ኮዎማኳ። ከለአ ከምሩኬቆ መቴያ ኪልቆማም። 17አኻኸን ማሄሽ ኢዴበም፥ በኢካ አመገማ አለአ ካኻ ነመሲቆማ። ዜኸኽ ጸገኻ፥ ኤከምበፃ መቼሥ አኻ መደካሽ አመንጠኽ ጋገንሠ ጸጋ፥ ኤከምበፃ መፋተኻ ነመዥግ መኢቾጓለኻኳ። 18ፈገኸካቆ ከመገ፥ ነመገም ኤቶኳ ኤተ በብደኮቆ አኳ ያሱስ ክርስቶስኳ። ነድ ገሂን ካ እኽላ ካል ግዢ ግዥኳ። ኣሜን።

will be added

X\