2 ገትገ ጴጥሮስ 1

1ኤተ በቆተካ ገትጋ አለአ አሲሞን ጴጥሮስ፥ ኤተ በደካ ኤተ መደዳ ከሰ ገትጋ አል ያሱስ ክርስቶስኳ። በርቆተካ ከጸጋ ከኮዎማ፥ ከደ በከኸኬ አረባ መገሚላ ኤተ በጨካ መዥግ በና ኤያሥ መገሚላለምላ ደ ቢልደካ ሰ ገትጋ። በኮዸበከንዥገን ኮዎኳ መገሚላ አለአ ከንዶጎ ያሱስ ክርስቶስ፥ ኤተ በደካ ረባሎኳ ከኤተ መብዶቆ አኳ፥ መዪዥሠማኳ። 2ነፈጋኽ መገ ከመገማ ካኻ ከመገም ረባ፥ ኤቶኳ ያሱስኳ! 3በኸኬንዥገን አመዥጋ አል ረባ ካኳ ዳ ኮዎማ፥ ኤተ ከምገሸላ ከመኢያሎኳ፥ ኤተ ከምገ ከመዥጋሎኳ ነንዶ ገዴራኳ። በኮዸበከንዥገን አለኣኳ ከመገም ኤታ ያሱስ፥ ኤተ በኦካ አኳ ኮጎ ገሂንለማ፥ ኮጎ መገማለማኳ። 4ከንዶጎ አለአ ባኸካዬሸንዥገን ካኳ ዝንዜን በቦቆ ማጦዪላ ኤተ መዥግ በና። ከምፐኸከሥ ከደ መኻ ከለአ ነመቴያ ኤተ በኢካ ነኔያ ነለአ ከፄ መአጀበ በጫ፥ ከምፈለኸከሽ መንዘ ለማ ነመኢያ አል ረባኳ። 5ካ፥ እኽላኳ ሻምበኻ ከመሻምባ ከኮዎማ! ኤበኸጨካ መገሚላ፥ ተጸኸከሥ ጋገሸል መደዳ። ከጋገሸል መደዳኳ ተጸኸከሥ መገመሸማ። 6ከመገመሸማኳ ተጸኸከሥ መዜኽ ጸገጸጋ፥ ከመዜኽ ጸገጸጋኳ ተጸኸከሥ ገቀማ፥ ከገቀማኳ ተጸኸከሥ መንዥጋሣለኻ ነንዶ ገዴራ። 7ከመንዥጋሣለኻ ነንዶ ገዴራኳ ተጸኸከሥ ማሄሽ ኢዴባ ደ ገዴራ፥ ከማሄሽ ኢዴባ ደ ገዴራኳ ተጸኸከሥ መሄሽ ጸጋ ኮዎማ። 8ኤከማገማሥ ዳ አለአ ኮዎማ ኖጎ ጸገኻ፥ ኤከምፈጋቆኳ፥ ከማምባለኸከሥ ነበቦቆ ከበቦቆ ኤቶኳ ያሱስ ክርስቶስ፥ ከማሸኻኸኼ በላ መጨኻን ኸኻ ኤያል ደ ገንዞዋኼ። 9ጸጋ ኤተ ባኤምካሥ ዳለአ ኮዎማ ነጸገማ፥ አ ኤመፐሮሮኽ ጸጋ፥ ፐሻኳ። ባኤምከሠንዥገን አ፥ ኤበዪዥከሥ ረባ አ ነገንሣለማ ናል ገሲቋ። 10ካ ኢዴበም፥ ሻምበኻ ኤከማገማሥ ነመኢያለኻ ማኦዋ አል ረባ መሽላሣ አለኻኳ ኤበደካ ኸማ። ኤከምጦኻ ኤለአ፥ ከምሥኻኼ ሜተል ነንዶ ረባኼ። 11ኖካ ና ከማኻሽ ካኻ ከበቦቆ፥ ኤከምኩኻን አኽ ከገፋሌ አል ኤቶኳ ያሱስ ክርስቶስ፥ ኤተ በብደኮቆ አኳኳ። 12መኸከገም አኽ አለአ፥ መኸከዥግ አኽ ከኸገሻ ኤተ በኸርኮቋ፥ በራኣጎካ መዱጎክ መጦርከቁንዝ አኻ ከዳ አለአ ኮዎማ። 13ካሥ አል ኦከ ከምኢራ አር በኢካ ካራ ኤገሸለማ፥ ኤከምበነሮቆ አኻ ከምጦርከ ቁንዘን አኻ ከለአ። 14ኤያሥ በትገኬሥ አኤቶኳ ያሱስ ክርስቶስ ካራ፥ በርገምካ ኤከምፐርሥ ፈላ ነመኢያ ነለአ። 15እኽላኸን በርሻምበካ፥ ኤከምፈለኸሸን አኽ መዱጎክ መሳንዘሥ አለአ ነመሻለም ነን። 16ኖከ ቢለገሸከሥ ካኻ ከፄ መዥጋ ከመዌያ አል ኤቶኳ ያሱስ ክርስቶስ፥ ኢልሁለካንኼ ዬዳግዣ ኤተ በሳንዘከሥ ጸጋ ከመገመኻ በገ ከሠናኼ። ቢልገምከሠንዥገን ከኸምላ መዳለማ ዱ ረባ፥ 17ኖከ በርኮቆ አ መፈጋቋ ከገሂን ኖጎ ረባ በባ። ረባ ኤተ በጨካ ገፋሌያ ነኮዎማ፥ በከከለካ፥ "አለአ ዱዋለም ኤተ በርሄከሻ፥ በርካገ ካይላኳ።" 18ቢልገሰኮቆንዥገን ሳ አለአ መከዌ ነጎዛ፥ ኖከ ቢልኢኬ ከአ ኖቆ መዪዥሥ ዶላ። 19ከለአ በኮከራቆከሽ ዝንዜን ከሳ ኤተ በገሸከሥ ደ መዪርጓ ካኳ። ከምደኻ አኽኳ ገሸለማ፥ ኤከማጦኸኪል ፄ ከምርኸቆን። ሳ አለኣኳ ኤጅ ናዪዦጎ ኒል መጓ ካሥ አል ኦከ ከመጅባጎ፥ ከምዪዦጎ ቤዋ ነጸገኻኳ። 20ከበቦቆኳ ዳ ኤተ በኢካ አመገመማ ካኻ አለአ፡ ሰ መዪርጓ ኤተ ቢገሸከሥ ነመዪዥሥ ሎርጋ ኮዎማ መጨገስዳኼ ጸጋ ሜተል ኤገሳንዛ አል እልቆማኼ። 21ከፄ በካይተካቆ ደ መዪርጓ ከመዪዥሥ ገፉጫ፥ ቢገሸከሠን ዳ ኤተ ባኸካዬሽ ከማም ኖጎ ረባ፥ አፐኬሠንኼ አመገሽ ሰ መዪርጓ ሜተል ነመኦሸማ አል ጸጋኼ።

will be added

X\