2 ከደ ቆሮንቶስ 9

1ከፄ መኸ ማተጸሣ ከገሙንፀ ደ ገዴራ አል ዬሩሳሌም፥ አኣጎካኼ መቆተማ ካኻኼ። 2አኻ ደ በኢካ ነኤበ ኣካያ፥ በርገምካ አበኸገ ከሥ ከመተጸሠማ፤ "ደ ገዴራ አል ኣካያ ቢያጦከሽ ካል ግዣ ቢገ ከሠንዥገና" በርከለካ፥ በርከሸኮጎ ከአኻ ኖጎ ደ ገዴራ አል ማቀዶኒያ፤ በበነኮቆ መጥጢላለኻኳ በበኽ ጸጋ። 3በርትገከንዥገን ኢዴባ አ ካኻ፥ ኤከምበፃ መዳ መሾጓለምላ ከአኻ መገ ፥ ኤከምደኻን ኸገሻ ደ ማገሣ ኤያሥ በርከለካ አርኳ። 4ኤከምዌ ደ ማቀዶኒያ ሜታ ሜታ ከአራ፥ ኤከምገሙሥ አኻ ናኽከመገ ሠን፥ ከመዪፆቆ መሾጓለምላ ከአኻ አይላ፥ ከምዪፀኻቆ አኽኳ ዝንዜን። 5ኤከመገሠን ደ መኸ ማተጸሣ ኤተ በኸካጦኪል አኽ፥ በኢካ ካራ ኤገሸለማ አመሎቆሥ ኢዴባ አለአ ኤቢሲኬቆ እማም ነመዌያ ካራ ኮጎኻ። ዳ በርከጦካ አለአ፥ ማተጸሣ አለአ በላ መዳን ኤደ መኻ ደገበጋ፥ ነገሥ ኤደ መኻ አል ደ መገኽ እላ። 6ሳንዘኸሥ ሳ ኤተ በከለካ፥ "ኤተ በዋሸካ ዱፀን፥ ከማሙንፆቆ ዱፀን፥ ኤተ በዋሸካ ከበበኽኳ፥ ከማሙንፆቆ በበኽ።" 7ካ ከፄ በሄከሽ አረባ ጸጋ ኤተ በኸካ ከማገ ላ፥ ነኸ ጸጋ ኮዎማ ኤያሥ በኦከሽ ኒለማ፥ መኻኼ ከጀንደ እላ ኤያሥ ኤያ ከምተገኻኼ። 8መዱጎክ ከንዶጎ ኮዎማ ኤከምጨኻን ዳ ኤተ በኻኣጎካ ጸገኻ ኮዎማ፥ ረባ ከምፈለሽ መፈገኽ መገለማ ካኻ፥ ከምጦዋ ኤከምጨኻ ኤማንጀማ ከመደ ጋገሸል መደዳ ኮዎማኳ። 9ኤያሥ ቢቆተካ፥ "በንዘ ካ፥ በኸካ ከደ ዢጋ፥ መዪዥሣለማኳ ካሥ አል ግዢ ግዥ።" 10ረባ ኤተ በኸኬ ሾካ ከኤተ መዋሸማ፥ ኤደ መሳኳ እጋ፥ አ ከምኻ ሾካ ካኻ ከምብጅኽኳ፥ ከምፈጎቆ ኸ መዪዥሣለኻኳ። 11ኤከምሌአኻይል በላ ማገበገኻን፥ ከምጦዋ ረባ አኻ ደ መጨማ ከንዶጎ ኮዎማ። ከምኻ በበኽ ጸጋኳ መገ ላ ከረባ ከማተጸሣለኻ፥ ኤተ ቢርኮቆ እማም ኖጎምላ። 12መደዳ አል ማተጸሣለኻ ከምጦዋ ኤከምፈጋኸን መገ ላ ኤተ ከምኻ አጸጋ ከረባ፥ ካሥ መነ ኽ ዢገ ደ ገዴራ አል ዬሩሳሌምኼ። 13ከፄ በኸትገከሥ ማገሳሣለኻ ከመትገሣ አል ክርስቶስ፥ በላ ማገበገኻን ዳ በኸንዘኪል ከማም ከጸጋ ከኮዎማኳ፥ ከፄ ማተጸሣ ኤተ በትገከሥ መገሚላለኻ፥ ከምኹካ አጸጋ በበኽኳ መገ ላ ከረባ። 14ነገዴራ ኤተ ከምጦዉዋ እማም ካኻ፥ ከምሳንዙዋ ከማሄሻ ካኻ ከፄ መገ ኤተ በንተርኮቆ ነኮዎማ፥ ኤተ በኸኬ አረባ ካኻ። 15ነድ መገ ላ ከረባ ከፄ መኻለማ ኤተ በበፀካ መንዘኽ።

will be added

X\