2 ከደ ቆሮንቶስ 8

1አኻ ኢዴባ አለአ፥ ቢላኣጎካ ኤከምገመኻን ከፄ መገ ኤተ በኸካ አረባ ከገሙንፀ ደ ገዴራ አል ማቀዶኒያ። 2መከዻምበን አበቦቆ ማፉንጮቋ እማም፥ ቢያገ ካይል ዝንዜን፤ ሚካንዢገን ሰ ሜተልኳ፥ ቢሌአካይል ከመኸ በቦቆ ማተጸሣ 3በርደካ ኸገሻ፥ ኤቢኸካ እማም ከማሄሻለማም ማተጸሣ ካሥ ጎ ባፈለካሽ ከማም፥ ነመፈለሸማለማም ከምጻኳ። 4ቢሎቆሥ እማም አይላ ዝንዜን፥ ኤከመንዘ ዊለን ነመገ ከመተጸሥ ደ ገዴራ ደ በኢካ ነዬሩሳሌም። 5ነዳ ኤተ ቢልካጦኪል አይል ነጸገማም፥ ቢሲኮቆ ቢኸካ እልቆማም ከኤታ፥ ና ነቸቻኳ ቢኸካ እልቆማም ካይላ ኤማሄሻ አል ረባ። 6ከለአ ኤያሥ ባጦከሽ ቲቶስ ነገሲቋ፥ ቢለንዥገከሠንዥገን ኤከምትቶቆን መደዳ አል መሌአይላ አለአ ኖጎኻ። 7ኤያሥ በኸጨካ ነዳ ነኮዎማ በቦቆ፥ ነመገሚላ ነድ፥ ነገሻኳ፥ ነማምባለሠማ፥ ነመጥጣይላ ከገሸል ዳ ኮዎማ፥ ነማሄሻ ኤተ በኸጨካ ካይላ፥ ቢላኣጎካ ኤከመንተርኾቆ ነመደዳ ናል መሌአይላ ነለኣኳ። 8ዳ በርከከለካ ኤለአ፥ ኤቢጥጠካይል ጃጀንዳ ከመደዳ ኤለአ፥ ከመዻምብ አኻኳ ኤበደካ ማሄሻለኻ ኸማ፤ አርከለካንኼ ከመጦሥ ዳ ሜተል ነጸገኻኼ። 9በኸገምካ ዳ ኤተ ቤጦ አኤቶኳ ያሱስ ክርስቶስ ከማሄሻለማ፤ አ ኤቤድ ተቃ፥ በደከሥ እልቆማ ከኤተ ዢጋ ከፄኻ። በከደካ አለኣኳ፥ ኤከምደኻን አኽ ደ መጨማ ከመዳለማ ከኤተ ዢጋ። 10ከፄ እገሻ አለአ ኤተ ከምዳ ካኻ ኤገሸለማ በርገሸከሥ ቁንዘም ካኻ፤ ነግዣ ኤተ ናተራ፥ በላ መዳን ካሥ መኸማ ከመጦሠማ ነመደዳኳ፥ አኻ ደ መሲቆማ። 11እኽላ ትተኾቆ መደዳ ኤተ በኻጦከሽ ከማሄሸማለኻ፤ ኸኻ ኤያሥ መጨማለኻኳ። 12ጸጋ ኤበገከሥ ከመኸማ፥ ከማሄያሽ ኣሥ ዳ ኤተ በፈለከሽ አ መኸማ፥ ከምሎቁከሠኼ ከዳ ኤተ ባንዢገካኼ። 13ዳ በርከከለካ ኤለኣኳ፥ ኤከመንዘኻቆን ኮዎኻ፤ ኤበኻፉንጨካቆ አኽ ከመኸማ፥ አርከለካኼ ናፉጫቆ ጃጀንዳኼ። 14ኤተ ከማኤያሽ ነጸገማም ካለን ኤከምነ ኽ ዢጋለኻ፥ እኽላ ኤተ ባኤካሽ ነጸገኻኳ፥ ነነ ኽ ዢጋለማም። ኤኤለአ ከምዳ ማንዞቋ። 15ኤያሥ በከለካ አመዪዥሥ ሎርጋ፥ "ከኤተ በሙንፀኮቆ በበኽ፥ አከኤካሸንኼ፤ ከኤተ በሙንፀኮቆ ዱፀንኳ፥ አከፀካቆሰንኼ።" 16ነድ መገ ላ ከረበ፥ ኤተ በጦከሥ ኒል ቲቶስ መሻምባ ካኻ ኤያለም። 17መዌ ቲቶስ ኮጎኻ ከማሄሻ ካል እልቆማ፥ ከበቦቆኳ ከፄ በሻምበካ ካኻ፥ ካሥ ፄ በርኮቆ እገሻለምላኼ። 18ቢልትገከንዥገን ከአ ዱዌባ ኤተ ባሄካሽ ነገሙንፀ ደ ገዴራ ኮዎማ ነማቲስ ሰ ማገ ላ አል ረባ። 19በላ መዳን ኣሥ አለአ፥ ቢሽለከሠንዥገን አመገሙንፀ ደ ገዴራ ዱዌባ አለአ፥ ኤከምዻን ከአይላ ከመሮቆ ደ መኸ መሌአይላ አለአ ከገሂን ኤታ ኤያሥ ኤያ ከመትገሥ ገሸል ማገኻለምላኳ። 20ከፄ በበኽ ለማና ኤተ ቢኸካ ከመሌእላ፥ ኤተ ከምዳ መርልቆ መዽልካ፥ ቢልዜከኽ ኤከምበፃን አጸጋ ሜታ ማንዠሥ ገንሠ ፄያ ካይላ። 21መደዳለምላ በላ መዳን ነታሰ ኤታ፥ ቢላኣጎካ ኤከምዳን መዪዥሠማ ኖጎ ጸጋኳ። 22ኤተ ቢልዻምበካ ኦኪል በበኽ፥ ቢላምባለከሠን መጥጢላለማ ነበበኽ ዳ፥ ቢልትገካ ዱዌባ ጀንዳ ሜታ ከማም። አ ከፄ በገምኪል አኻ በቦቆ፥ ከምሻምባ እኽላኳ በቦቆ ናል ገሲቋ። 23ከፄ ቲቶስ፥ አ መዠም ኤተ ቢልደካ ካኻ እምበንድኳ፤ ከፄ ኢዴባ ጃጀንዳኳ፥ ቢትገኬ እማም ነገሙንፀ ደ ገዴራ፥ ቢትገከሥ ገሂን ክርስቶስኳ። 24ትገኸከሥ ማሄሻለኻ ከችዳ ካ ከገሙንፀ ደ ገዴራኳ፤ ትገኸሥ ኤበደካ አመሾጓለምላ ከአኻ ኸገሻ።

will be added

X\