2 ከደ ቆሮንቶስ 6

1ካ አይላ ደ ቢልደካ ዳ ከረባ፥ ቢለገሸካ ካኻ ኤከምበፀኻ መርኾቆን መገ አል ረባ መገ  ኤለአ። 2ከፄ በከለካ አረባ፥ "በርገሰኮቆ ካም ኖከ መገ፥ በርተጸከሥ አም ኖከ መብዳኳ፤" እኽላ ኦከ መገ፥ ኦከ መብዳኳ። 3ኤከምበፃ መዸባን አመደደ ሰ ገትጋለምላ ገንሠ ፄያ፥ ኢልደካኼ ከጸጋ ሜታ ከደ መሥ ሜተልኼ። 4ነደንኳ፥ ከዳ ከኮዎማ ቢልትገከሥ ኤቢልደካ ደ መደዳ አል ረባ፤ ከመቀሞቆ በበኽ ዳ፥ ከማፉንጫቋ፥ ከማኣንሠሣ፥ ከማጥፆቋ፥ 5ከማኦቻ፥ ከማፉንጫ፥ ኖከ ከማንዱዋ እገሻ ነጸገምላ፥ ከመሌአ፥ ከማንዢግ ኸ መዥጋ፥ ከኤዴበናኳ። 6ኤያሥ ኤያ ቢልደካ ከመዪዥኽ እላ፥ ከማምባለሠማ፥ ከገቀማ፥ ከመገኽ እላ፥ ከመዪዥሥ ገፉጫ፥ ከማሄሻ ኤተ ባንዢገካ ጎልጎዛ፥ 7ከገሸ ኸገሻ፥ ከመዥጋ አል ረባኳ፤ ኤተ ቢልካሸካ ቢልከጻንደኮቆኳ ቢልጨካ መዪዥሣ ኤሙ ማሸማ። 8ቢኸካ ገሂን ካይላ፥ ቢዪፀኮቆ አይላኳ፥ ቢልጨካ ገንሠ ፄያ ከመገ ፄያኳ፤ ቢዪርካ አይላ ኤደ መንጠኽ ጸጋ፥ ነደንኳ ቢለገሸከሥ ኸማ። 9ሚከገመን አይላ፥ ቢልደካ ከደ ገኤማ፤ ቢዪርካ አይላ ኤደ በሸካ፥ አይላኸን ቢልኢካ፤ ቢልደካ ኤያል ደ ቢኦቸካ፥ ኢልሸካንኼኳ፤ 10ኤቢቱከሠን እለምላኳ፥ አይላኸን ቢላገ ካይል መዱጎክ፤ ኤቢልደካን ደ ዢጋኳ፥ ከንዶጎ ገፉጫ ቢልጦካ ጸጋ በበኽ ከተቃ፤ ቢልደካ ደ ማንዢግ ዳ ሜተል፥ ነደንኳ ቢልጨካ ዳ ኮዎማ። 11አኻ ጸጋ አል ቆሮንቶስ፥ ቢልዪዥከሥ ቢለገሸከሥ ካኻ፥ እልላኳ ማጨገሰማ ካኻ። 12አኻ በኻፉንጨኮቆ እልኻ ካይላ፥ ኢልፉንጨኮቆንኼ እለምላ ካኻኼ። 13በርገሸካ ካኻ ኤኢዳለም፤ ኤያሥ ቢላጨገከስ እለምላ ካኻ፥ ኣጨገኸስ አኽኳ እልኻ ካይላ። 14ማኩኾቆኼ ከደ በበፀካ መገሚልኼ፤ ኣሥ ቢያጨከሥ መዪዥሣ ከገንሣ? ኣሥ ቢያጨከሥ አመዪዦጓ ከመጓኳ? 15ኤያብ ከማገሰኪልሰን ክርስቶስ ከሴጠና? ኣሥ ቢያጨከሥ ኤተ በገምኪላ ከኤተ በበፀካ መገሚልኳ? 16ኣሤ ቢያጨከሥ መዪዥሥ መፀ ገዴራ አል ረባ ከምሙሳ? አኳኳ መዪዥሥ መፀ ገዴራ አል ረባ መኢማ፤ ቤከል ረባኳ፥ "አራ ከምኢራ ኖጎማም፥ ከመኮለረኽ ኖጎማምኳ፤ ከምደራ ረባለማም፥ ከምዱዋ እማምኳ ሾካለም።" 17በከተጸካ አረባ በከለካ፥ "ካ ፐኸሥ ኖጎማም፥ ኣሰኻ ኢኻ ከጺኻ፥ መደኸሠኼ መዦጎ ዳ ከኤለኻኼ፤ ኖካ ና ከምሄርሽ አኻ፥ 18ከምደራ ከበበኻ፥ ከምደኻ አኻኳ ኢዳለም ጋጉንዛ ከኢደ ዳጎናኳ፥ በከለካ አረባ ኤተ በደካ ነመዘዛ ነኮዎማ ኤታ።"

will be added

X\